تدخل بعض الدول في سيادتنا بقى شئ غير محتمل وبغيض وخارج عن اللياقة السياسية..اللي له واللي مالوش بقى بيحشر مناخيره فينا وكأننا بلد من جمهوريات الموز ولا كأننا الولايات المتحدة العربية..مصر بلد كبير وعظيم  وكل قزم لازم يقف وهو بيكلمها ويبقى قد كلمته ويتحمل الغلط والمسئولية..بلدنا وإحنا حُرين فيها وشعبها شعب واعي وعارف إيه أصل جماعة السوء وليه هي إرهابية.. البلد دي فيها شعب وجيش حر صاحب إرادة وفاهم خيوط اللعبة وحس بقدر المؤامرة وخرج مع شعبه وهدم المعبد على دماغ صناع المخطط وكشفهم وظهرت وبانت كل خطة دنيئة لهدم وتقسيم أم الدنيا بهية..مرة علبة كبريت ومرة المستر أردوغان وختامها كان كمان وزير الخارجية في المنظومة الفارسية..الكل ياعيني زعلان ومقهور ومفروس من الجدع اللي اسمه سيسي اللي فهم اللعبة بدري وقلب الطاولة وهدم مخطط سنين كانوا بيحلموا ينفذوه ونسوا أن في البلد دي عيون سهرانه رضعت من خير البلد دي حب وإنتماء وفداء لكل حبة رمل مصرية..الخلاصة البلد دي ليها أصحاب عارفين قدر بلدهم حتى لو جالهم إحباط من اللي بيمثلوا وزارة بتفتقد الجرأة والشجاعة وبتتعامل للأسف في مسائل الكرامة بنعومة ودبلوماسية..!!      

                              وكمان اللي زاد وغطى تخاذل الداخلية على مظاهرات وإرهاب كل واحد عامل فيها متأسلم وماسك رق وتار..بيخرجوا على الشعب الأمن بالسلاح والمولوتوف عاوزين يحرقوا الدار والدوار..عاملين زي عفريت العلبة ومبرطعين والداخلية قال إيه بتلتزم بضبط النفس والله يا أخي الواحد بجد من الأشكال دي اتلخبط واحتار..مواجهة الإرهاب مش عاوز نعومة ولا طبطبة ولا سكوت على حرق عربات الشرطة عاوزه دكر بجد وراجل صاحب قرار..البلد دي فيها شعب خرج بالملايين وقال كلمته ورأيه يوم 30/6 وأثبت للعالم أنه صاحب الكلمة والأرض والدار..اللي خايف من المنظمات إياها المشبوهة يقول واللي على راسه بطحة يغور لأن البلد دي بلد أحرار..اللي خايف يقولوا إنكلاب واللي خايف من الحساب يسيب مكانه الوقت وقت الحسم ولا عاد فيه مكان لمتخاذل ولا لعميل خائن غدار..ونرجع من تاني نقول المرحلة دي عاوزة العين الحمرا والقيضة الحديدية من حاكم واعد قوي جبار..أي مهادنة تبقى تخاذل وتهاون في سيادتنا وهلفطة وخزي وعار..اشتقنا لبلدنا بلد الخير والأمان اشتقنا للفرحة والإستقرار..مش شوية رعاع متأسلمين بدقن عيره حيتحكموا فينا ويقلقونا شوية عملاء بينعموا بإرهابنا بفضل الريال والدولار..مش كل خيال مآتة حيتنطط علينا وإحنا نغمض عينينا ونقول معلش عيل وغلط ونسيبه يقلب بلدنا فوضى ودمار..لازم نفضح كل مخطط وكل خيال مآته فاكر نفسه آمن لازم يعرف إن اللي يهزر مع البلد يبقى بيلعب بالنار..لازم نفضح كل عميل وكل متآمر البلد أمانه والوقت اللي إحنا فيه مش محتاج هزار..آن الآوان نشم هوا نضيف ونطهر بلدنا من الهاموش والجاموس لازم نخلص بلدنا من الغيم والغبار..افتحوا كل الملفات وعرفوا الشعب كل خطوة وشاركوه وعرفوه كل الأسرار..هي دي الحقيقة وهو ده المخطط واللي مش فاهم كده يبقى وعفوا يبقى في الأصل حمار..خلاص فاضل عالحلو دقة وأهو الدستور جاي والباقي أنتوا عارفينه خلاص فاضل على الليل دقة ويطلع علينا نهار..نهار مصر القوية الجريئة العفية صاحبة الكرامة الحقيقية والإرادة الفولاذية المستقلة بلد خير أجناد الأرض الثوار الأحرار..أي والله هم دول بجد ومهما قالوا أصحاب الأرض هم دول اللي بجد الثوار..أي والله هم دول اللي بجد الثوار..!!