سيسي نويل ..!!

في حياة كل أمة عريقة ترانيم حصرية وتقاليد وناموس..الأمم العريقة تمرض ولا تموت عارفة طريقها وتلاقيها في عز الضلمة يتولد واحد فيها يشيل بإيده الراية والإيد التانية ماسك بيها فانوس..فانوس ينور معالم الطريق ويحدد ملامحها ماشي في طريقه ولا همه غير مستقبل بلاده وعلى كل الموانع بيدوس..وبلدنا من النوع ده فيها كل الأنواع الوطني والثوري والحلنجي واللومانجي واللي فاهم الأمور واللي مخه زي الجاموس..بلد غريبة عجيبة كوكتيل من النوايا بلد من غير مراية نشوف فيها خطايانا ولا تعرف مين اللي بيخلص ليها ومين اللي بيقبض ثمن ثوريته فلوس..مين اللي منتمي ليها وعارف قيمتها ومين اللي عليها جاسوس..الكل عامل فيها ثورجي وزعيم وساعة الفرز تحتار رغم إن الأمر واضح مش محتاج تحتار فيه العقول والكل عارف اللي جوه القلوب والنفوس..الثورة بقت زي الخلاط خلطت الصالح بالطالح وكشفت كتير من اللي كنا فاكرينهم قامات واللي لسانهم بس قول من غير فعل ولا شئ في الأصل محسوس..بص حواليك ودوًر وهات لي واحد بس يوحد ربنا غيره اللي شال كفنه على إيده وقام وثار لأجل استقلالية بلاده وكانت دعوته بالتفويض هي الشئ الوحيد اللي حسيناه ملموس..مين اللي خرج مع شعبه ولبى نداه وخلص بلاده من براثن التتار المتأسلمين اللي أشر من الماجوس..مين اللي قال مصر كل الدنيا واللي حررنا من هيمنة الدقون العيرة مين اللي خلصنا بفضل الله وزاح بإراده شعبه من حياتنا كابوس..مين اللي اختزل الزمان وغيًر قواعد اللعبه من جماعة دراكولا اللي حولوا الوطن لذبيحة كل شئ فيها مباح وكل دم ليها ممصوص..مين اللي حول بلاده من سجن فاشي وأنقذها وحررها وحفظ أمانتها وأمانيها من حكم اللصوص..!!                     

             لكن علشان هي محفوظة من الرحمن كان لازم ربك يلبي من أهل المحروسة الدعاء..ربك عالم بحالنا وحكم بالأمن فيها وذكرها في كتابه الحكيم " ادخلوا مصر إن شاء الله آمنين " وعلشان هو كريم عمره ما خيٍب للمصريين رجاء..عارف سبحانه إن إحنا شعب غلبان بسيط بيننا وبينه وصال سبحانه له الطاعة والولاء..مصر بلد الأمن والأمان ودار الخير والسماحة مصر البسيطة العاليه الشامخة بلد الإيثار والعطاء..بلد مخلوق للشموخ والوجود مين قال مصر يحكمها جماعة من اللصوص والبلاهة والغباء..ونرجع من تاني نقول مين اللي إتولد من طين الأرض دي وحماها من الذهاب للمجهول والفناء..مين اللي وعد وصدق وحقق المستحيل وغيًر المعادلة مين اللي بيه اتحققت الأمنية وانقذنا بيه رب السماء..!!              الثورة قامت واختلط الحابل بالنابل وقلنا خلاص طلع علينا النهار أتاريه طلع سراب ولا شفنا غير الليل..دود الأرض طلع علينا من الجحور وشفنا القتلة والإرهابيين بيحكمونا ويتحكموا فينا ولا لقينا منهم خير ولا شفنا غير الويل..أينعم كان حكم سنة لكن كانت سنة شؤم وعام ولا ألف عام ممل طويل..كنا كلنا بنجري في حلقة مفرغة لا عارفين بداية من نهاية ولا عارفين نهاية السباق وبنجري في دايرة مقفولة زي الخيل..لغاية  ما الأمل طل علينا وهل البدر وطلع عالسطح سيسي لكن فرس رهوان مغوار في صورة سيسي نويل..!!                            

                             علشان كده الناس حست بيه وعقدت عليه العزم والنية..سيسي نويل كان هو الإختيار ورجل الأقدار اللي هبط من السماء عالبلد دي هدية..تقول عسكر تقول منصر بلاش فذلكة وحط لسانك في بقك وشوف إيه اللي كان مخطط لينا ومين اللي خلصنا من المصيبة دِيًة..فكر في مين اللي حرر ترابها من براثن جماعة الشر ومين اللي فداها ودفع ليها الديًة..العام الجديد جديد في كل شئ ومهما كان المخطط فوضي أو هدم البلد ماتخافش فيه إرادة جديدة من شعب واثق بقدره وإدارة حكيمة سيساوية..الفتى سيسي رهن الإشارة وعارف وفاهم حدود المؤامرة وقادر بإذن الله يطهر البلد دي من المؤامرة الإخوانية..السن بالسن كان مبدئه وبفضل شجاعته رجعت لينا الهيبة بعد زمن الخنوع والخضوع والإنهزامية..سياسة واضحة من غير ضحك عالدقون ولا عبارات مطاطة ولا تمسح بالدين ولا ألاعيب بهلوانية..أرجوك دقق في الصورة وشوف الفلتره وشوف أساطين الفبركة واللي احتلوا المشهد السياسي وأدعو الوطنية..أرجوك لاحظ اللي قفزوا عالسلطة وتحالفوا مع الدقون العيرة ووزعوا الأدوار ما بين مؤيد ومعارض وطلعوا في الآخر خلايا نايمة مستخبية..الخلاصة العام الجديد كشف نواياه وفي 25 يناير حيفرض السيسي بالإرادة الشعبية..خلاص الرؤيا وضحت والبلد مش محتاجة هزل وآن الآوان نصحى ونفوق ونعرف إن بلدنا هي اللي كانت عليها العين وهي اللي كانت لإخواننا البُعدا ضحية..سيسي نويل نازل وبقوه وده مطلب أكيد شعبي وهو ده المعنى الحقيقي للشرعية..هابي نيو يير يا مصريين وخدوا بالك أرجوكم خدوا بالكم وأعرفوا إن البلد دي محروسة من رب العالمين واسمها في القرآن كان هبه من رب العالمين وعطية..سيسي نويل هدية المصريين في العام الجديد وهو قد القول وقد المسئولية..تجيبها كده تجيبها كده هو مفيش غيره ولا عزاء لعبده مشتاق ولا عزاء لكل واحد عامل فيها زعيم وباع البلد والقضية..الزعامة مش عضلات ودقون وكلام متزوق ومتلون الزعامة شهامة ورجولة وموقف سيسي وواحد عارف قيمة بهية..الله حيٌ السيسي جاي وأخيرا لقينا راجل شارب بيريل عارف طريقه وفاهم اللعبة وقد المسئولية..أي والله هو قد المسئولية..!!                                                       said_elmasryfahmy@hotmail.com