خلاص انكشف كل شئ والمخطط ظهر وبان..الموت بقى في كل حته وبلدنا بقت خلاص مطمع للثعابين والغربان..فيها لأخفيها بقى شعار معروف ومكتوب بالدم في الشوارع ومطبوع على الجدران..بعد التفويض ورجوع البلد لأصحابها استلمونا دعاة الفكر الردئ وأصحاب الدقون العيره واللي بيخونوا العهد في كل عصر وكل زمان..حكومة مرتعشة بتاخد قرارها بعد خراب مالطا وبعد ما تخرب الدنيا ويفوت الآوان..في سينا وشفنا الخراب وفي جامعة الأزهر والدقهلية والنهاردة في مدينه نصر كمان..القتل والتفجير في بلدنا بقى شئ عادي وبقينا خلاص دم ولادنا ببلاش زي العراق وافغانستان..طيور الظلام بتدبح وتبرطع وحكومتنا بتقابل كل ده بمجرد استنكار في بيان..واحد بعد واحد بيموت من غير سبب وبدم بارد وحكومتنا مسطولة ساكتة وبتراعي يا عيني وهم اسمه حقوق الانسان..المؤامرة واضحة وظاهرة والارهاب بيتحرك حوالينا واحنا بنناقش قانون ساكسونيا وايه هو المفروض وايه اللي حصل وايه اللي كان..الأرهاب حوالينا شايفينه ولامسينه وبصماته موجوده في كل مكان..الارهاب بيسري جوانا زي الورم السرطاني وحكومة نايمة بتذيع اعلانات 57 57 لأورام الأطفال وسايبانا يتوغل الارهاب جوانا من غير علاج زي السرطان..مظاهرات وسايبنهم وطلاب يخربوا من غير حساب ولا متابعة ويهربوا جوه الجحور زي الفيران..الدم المصري بقى في الشوارع مش عايز يجف والمسئولين مطنشين زي ما طنشوا على جفاف مية النيل كمان..اللي بيحصل في بلادي محتاج قبضة حديدية حقيقية وعزم رجال مش خلاعة ومياعة نسوان..السكوت على بشاعة الارهاب وصمة عار على جبين كل مسئول متخاذل أو كل صاحب قرار بيطبطب ويحسس على مظاهرات شباب الاخوان..اللي بيموت ده بدم بارد واحد مصري مش يهودي من جندي مصري خايف وهربان..الدم المصري خلاص بقى رخيص وللا ايه وللا خلاص المصري ما بقاش انسان..لو استمر الوضع ده مش حيكون فيه حد مؤمن بالتفويض وكل واحد تمرد حيعيش ندمان..المواطن المصري من حقه يعيش ويمارس حياته بحرية محتاج يعيش في آمان..الثار مطلوب والسن بالسن والعين بالعين وهو ده اللي اتعلمناه من القرآن..!!
قلنا من زمان البلد دي عاوزه ومحتاجة قبضة حديدية..مش حنفضل كده مرعوبين من اللهو الخفي مش عارفين حنموت فين وامتى وليه وحكومتنا لا حول ولا قوة منتهى السلبية..البلد دي لازم يبقى فيها راجل على قدها راجل يكون قد المسئولية..خلاص الناس فاض كيلها وكرهت الطبطبة على اللي يسوى واللي مايسواش والحل معروف والهدف واحد هو أمن الرعية..احنا في زمن يا أبيض يا أسود ولازم نفلتر حياتنا من أصحاب الرقص على السلالم والمواقف الرمادية..رئيس جامعة بيؤيد المظاهرات ومسئول كبير بينادي بالمصالحة الوطنية..طالبات بتسب وتلعن دكاترتها وطلبة بيحرقوا ويكسروا في المباني الجامعية..بنادق خرطوش وسلاح أبيض ويقولوا طلبة ومؤمنين بمنهجهم وليهم قضية..الخلاصة اللي حضر العفريت يصرفه واللي نال التفويض لازم يكون قدها ويحقق الأمنية..والأمنية نرجع من تاني بلد الأمن والأمان وترجع أيامنا الهنية..الأمنية هي كشف الطابور الخامس اللي مزروع بيننا في كل مكان بيطلع منه قرار وبالذات المؤسسات الأمنية..وتطهير الاعلام والصحافة من الخلايا النايمة واللي كل يوم بنكتشف منهم اسم جديد بالصدفة أو بحسن النية..وتجفيف منابع التمويل ومراقبتها وفضح منبع الخراب وأصحاب الحوالات الدولارية..لازم حكومة صاحبة قرار وفعل مش رد فعل وتمنع البلاء قبل وقوعه مش تستني الخراب ونقع في شر البلية..القصاص القصاص هو الحق وهو العدل وهو الرد الشافي على الهجمات الارهابية..القصاص من كل واحد خان الأمانة وحق لكل مصري سالت دمائه الذكية..الأمن هو الأمان وهو رغيف عيش وهو كسوة صوف بتدفينا في ساعة برد شتوية..الأمن هو جلدنا والحامي الطبيعي لجسمنا والحافظ لحياتنا ودمنا والضمان الأكيد لحياة طبيعية..!!
باختصار علشان نعيش في البلد دي لازم نعيش في أمان ولازم ولا بد من القصاص..لازم ناخد حق الضحايا ونجفف منبع الارهاب في بلدنا من الأساس..خلاص آن الآوان ترجع البسمة للوطن والمواطن ونستعيد من تاني هيبتنا قبل ما تنداس..البلد دي ثروتها مش بس اقتصاد وسد وقناة البلد دي أغلى ما فيها الناس..لازم يتحرك كل أصحاب القرار ويشعروا بخوف المواطن لازم يكون في دمهم احساس..دم المواطن شئ غالي قوي أمن المواطن أغلى من الدهب والماس..!!
الخلاصة لازم نلحق البلد دي ونحميها بدمنا ونوحد كلمتنا ورأينا من غير عناد..لازم ترجع من تاني الفرحة عالوجوه ونحس أن الأمن عاد..خلاص الناس زهقت بعد ما بقى في كل شارع جنازة وكل بيت بقى مكسي بالسواد..وكل عين ودموعها فيها والقلوب قالت حداد..آه ياوطن قول لينا راح فين الأمن فيك قول راح فين دم الولاد..يا تحموها يا اما تسيبوها وربك اللي خصها في كتابه حيصونها ويحميها وهو أعلم بالعباد..يا تحمونا يا تفارقونا مفيش وطن بيحكمه مسئول هو في واد والمواطن في واد..يا تحموها يا تسيبوها واللي يقدر على مهر البلد دي عليه السداد..آي والله اللي يقدر على مهرها وامنها عليه السداد..!!
Said_elmasryfahmy@hotmail.com