الدكر ..!!

عبد السميع اللميع تاجر وناشط سياسي وحقوقي وإعلامي وغاوي أنتيكات..محفلط مزفلط متابع وما شاء الله مواظب على الظهور في معظم الندوات..سياسي هاوي وغاوي وناوي يرشح نفسه زي كل مرة في الإنتخابات..له قدرة بارعة على التحليل والسفسطة وبارع في الكلام وخد وهات..مالي هدومه وله هيبه ممزوجة بالخيبة بس الأمانة له حضور مميز في الإجتماعات..اجتماعات حزبية ولقاءات دورية وأراء هلامية لا بتهش ولا بتنش في المنتديات..معارض تلاقيه مؤيد مفيش مانع المهم يكون موجود في الصورة مش مهم التعليقات..لا يجوز وماينفعش وكان مفروض على شوية كلام حشو على شوية خطوط حمرا على حبة ملاحظات..هو ده تمامه مجرد كلام في كلام من غير فعل ملموس حتى لو كان مجرد كومبارس في الأفلام والتمثيليات..مسكين مش عارف إن اللي إيده في الميه مش زي اللي إيده في النهار وحاسس ومتأكد إن اللي بيحصل في البلد اليومين دول بمبدأ أصل مصارين البطن بتتخانق يبقى ليه ننفعل ونخاف ونزيد في التأويلات..كان غايب عن المشهد وكأنه عايش في دنيا تانية ولا حاسس إن البلد كانت بتتسرق ولا حاسس بالديابة اللي بينهشوا فيها من كل الإتجاهات..جماعات إرهابية ومخابرات مشبوهة أجنبية ومنظمة في الجوار متأمرة حماسية وأموال من جزيرة عربية ومؤامرة أجنبية وأزمة إقتصادية وناس بس عاوزه تعيش مساكين ليهم احتياجات..عبد السميع كان مغيًب يا عيني مش دريان ولا فاهم أو حتى كان واعي باللي بيحصل حوالينا في المنطقة من تربيطات..آه كان بيتكلم ويقول لكن كلام نظري وفعل مفيش وفعله كمان لا كان بيوضح  للناس أي تفسيرات..قامت ثورة وللا ما قامتش متفرقش ولا مهم إيه التغيير اللي عملته ولااللي زرعته جوانا من تغييرات..لا همه ديكتاتورية ولا مبادئ اشتراكية ولا حكم الفرد كان طابع  بصمة على أسلوبه  ولا سايب أي علامات..ولا كان همه انفتاح ولا برطعة أجنبية في أدق أمورنا ولا إيه ممنوع ومباح كان عديم التمييز ولا حاسس أصلا بحال البلد ولا ببشاعة اللي حوالينا من مؤامرات ..وعاش 30 سنه تجريف وتهميش وتوريث ولا فتح بقه بكلمه وكان وأتلهى في البيزنس وتسقيع الأراضي وافتتاح المولات..الناس كانت بتئن وبتتألم من غير ما يتحقق شئ وإيه يفيد الدعاء لو ضمير الحاكم مات..!!          

               عبد السميع اللميع عاصر كمان ثورة التحرير وكان ماشي صدفة هناك في الميدان..وشاف بعينيه تسلسل ثورة زي مابيقول الكتاب وزي ما هو مفروض ويتعمل حسب تعليمات منظمات حقوق الإنسان..وشاف وجوه غريبه ووجوه قريبة وشاف كل من هب ودب بيمد إيده ويهبر من التورتة حته لما كانت بلدنا زي الدبيحة والكل عامل عليها مزاد علني وهي بتئن وجريحة وبيحوم حواليها الغربان..دقون من كل شكل ولون اللي متأسلمة وبيقولوا دينية واللي علمانية أو اشتراكية أوليبرالية كلها كانت دقون عيره وماسكات مدسوسة وواقفة بالدور مرصوصة مستنيه فرصه ويحققوا حلم الزمان..جوهرة التاج حلم السنين وبوابة الشرق وخلاص النية كانت من غير مواربة واضحة وكل شئ انكشف وبان..عبد السميع شاف بعينيه كل ده وشاف إزاي البلد إتقسمت واتبعترت واتعمل عليها مزاد والعطا رسي على الإخوان..عبد السميع كان زي ماهو بيهلفط بس بالكلام رغم إنه سامع وشايف لكنه كان هو وغيره مجرد بعبعة وفضفضة والبلد بتضيع قدامهم ومفيش غير لسان مجرد لسان..!!       

                 لكن عبد السميع نسي هو وغيره إن البلد دي ولادة منها فيها..بذور الحضارة جواها وبين وقت والتاني بتولد من بين طينها واحد دكر يطلع ياخد بإيديها..من أيام الفرعون والعجلة الحربية اللي مرسومة عالجدران واحنا عارفين دايما مين اللي أنقذها من الهكسوس والتتار والرومان واليهود ومين اللي حرر أراضيها.. مؤسسة ومنظومة وطنيه من أيام أحمس ومينا لغاية عرابي وناصر وأصغر جندي منتمي ليها..منظومة بتصنع رجالة مالهاش غير في الجد وساعة الجد لا بتتهز ولا تخاف من حد وحرية الوطن والشهادة أحلى أمانيها..منظومة مفيش فيها عبد السميع ولا فيها حد متهاون ولا مهادن ولا حد قدر يتسرسب جواها ولا قدر يحيط بيها..منظومة كل فرد فيها دكر عارف قيمه بلاده وحسه الوطني خلاه ينتفض ويقوم ويحمي شرعيه انتفاضه جماهير شعبه وحقق أمانيها..منظومة تخصص تكوين زعيم بين كل وقت والتاني وفي وقت الحاجة نلاقيه قدامنا ياخد بإيدينا وإيديها..بص وفكر وقول مين اللي خلصنا وخلصها من المخطط اللي كان مرسوم لينا وليها..مين اللي فك أسرها من حكم مافيا فرضوها عليها بالتدليس والتزوير وسيناريو شرعية وهمي فرضوه علينا وعلينا..مين اللي خلى ليلها نهار وفتح طاقة نور وأمل وحرية وبدد غيام لياليها..مين اللي كان قام وفي لحظة حطم أحلام اللئام وكل واحد كان طامع ومهووس بيها..مين اللي حطم مخطط مدروس من سنين وحلم استعماري كان مكتوب على الجبين لكن حكمة ربك وعزيمة سيسي دكر فك رموزها وحرر إرادتها وفرح ولادها وحقق أمانيها..!!           

                من أيام أحمس ومينا الشعب كان عارف حكامه وعارف مين يختار..الشعب عاوز قائد دكر مش عاوز عبد السميع ولا غيره مش عاوز فنجرة بق ولا صاحب أشعار..الشعب عاوز ناس قول وفعل مش ناس بلسان حلو أو صاحب يافطة وشعار..خلاص آن الآوان ولا عاد وقت للهزال ولا عاد فيه صبر للإنتظار..لكن اللي بيخليني أصبر إن الشعب عارف مين هو الدكر ومين اللي هو إختار..أي والله الشعب خلاص إختار..!!

Said_elmasryfahmy@hotmail.com