مذكرات ثورة ..!!!

زي أي حاجة في الدنيا تبدأ قوية عفية..زي الطفل البرئ اللي بيحبو ويقوم واقف على رجليه والكل حواليه والأم أولهم واقفة ومستنية..بتراقب بعيون العاشق الولهان رضيعها وهو بيسحف بإيديه ورجليه وبعدين يقوم ويمشي بخيلاء أو خطوة بتحط بصمتها على وجه الزمن بكبرياء وعزة وثقة حرة وقويه..والرضيع يكبر ويشتد عوده ونلاقيه يجري ويمرح مرح الحمام لما يطير في السرب في الفجرية..ويكبر ويطوًل ريشه ويعرف يعود من تاني لعشه في المغربية..العش هو الوطن والبيت والدار والدوار وهو الحمى لكل شارد في الكون مالوش غير سما وأرض وإنتماء أكيد لأصوله الأولية..هو كده الإنسان من ساعة وجود الكون ومن أيام أدم حتلاقيها هيً هيً..والثورة زي الإنسان تبدأ بصراخ وألم ولحظة مخاض مكتومة متدارية..تصرخ بصوت ولادها تقدر تقول ألم تقدر تقول ندم على السكوت والخنوع من سُلطة باطشة قمعية..تكبر وتزيد ويشتد عودها وتفضل بريئة لكن صلبة وحرة وقوية..إن اشتدت المحن تشتد عزيمتها وتظهر قوتها وبراءتها وإرادتها وتلاقيها اتحولت لوحش كاسر رافض للذل والعبودية..الثورة لما تقوم بتلاقي كل شئ بيلين والمستحيل يتحقق بإراده شعبية..المعووج يتعدل والمكسور يترمم والمشروخ يترمم بإراده فولاذية..لكن الثورة لازم تكون واعية وفاهمة علشان تحافظ على مكاسبها بالفعل الجاد مش بالطبطبة والحنية..ده حصل في ثورات كتير منها اللي نجح وغيًر الكون في لحظة من عمر الزمن تاريخية..وفيه اللي فشل وخيَب الظن فيه بعدم الخبرة واللعب مع الذئاب والبراءة وحسن النية..الثورة مش شعارات وندوة ولا مرشح ببدلة سوده اسموكن على شال رمادي أو كوفيه..الثورة لحظة يا تكون قادر عليها يا تسيبها مدام مش قد المسئولية..الثورة مش صوت عالي ولا نباح ولا زئير تفتكره صوت أسد ويطلع في الآخر قط شارد وطموحات صبيانية..الثورة طموح وذكاء وفطنة ووعيَ وأفكار مدروسة مترتبة وخطة مش حركات عشوائية..كل ده بيحصل للثورات في كل أنحاء الكره الأرضية..لكن ثورتنا كانت من فصيل تاني اعتمد على جبر الخواطر وبوس الخد ومشاعر تمثيلية..ثورة وقلبوها هوجة زي هوجة عرابي لما انتهت بين وليلة وبهتت ملامحها بعدم تقدير العواقب ومعرفة قوتها الحقيقية..ثورة من غير ثوار حقيقيين غير اللي كان طالع ثائر من الفقر والضياع وغياب عدالة اجتماعية..غير شاب خرج شايل كفنه على ايده ولا همه روحه كان كل اللي همه حرية بهية..غير مواطن بسيط خرج يحاول ينزع من الزمن أحلامه ويحارب حكامه على كل تفريط في كرامته ويقاتل كل سارق لأحلامه بينحت في صخر الظلم بالعرق والدم علشان يرسم لوحة كرامة لمستقبل بيتمناه وأيام هنية..الثورة كانت شاب في عز شبابه بأمال كتير في دماغه وبنت حرة بريئة ليها أحلام وردية..هي دي كانت الثورة وملامحها قبل ما يسرقوها ولاد الذي والذين تحت مسمى عيش حرية عدالة اجتماعية..هي دي الثورة وأحلامها قبل ما يهبرها أصحاب المصلحة بكافة الأشكال والألوان واللي عملوا زي الذئب اللي ضحك على الراعي وهتك عرض الرعية..هي دي الثورة قبل ما تتلوث بملامح وبصمات ملوثة ودقن عيره وجلابية..هي دي ثورة الميدان اللي استولى عليها الغربان تحت ستار قال الله وقال الرسول وأتاري الإسم ثورة والفعل مخطط جهنمي بالصوت والصورة مثبوت بالدليل القاطع في ذاكرة الوطن التاريخية..هي دي الثورة بعد ما فرط فيها ولادها وسلموها تسليم أهالى بفعل فاعل معروف وجماعات مشبوهة على شوية ناشطين وشعارات حركات معروف هدفها ومصدر تمويلها حقد وكراهية..وزي ما قالها حكيم الفشل له صاحب والنجاح له ألف صاحب وثورة الميدان كانت زي الطفل اللقيط اللي الكل إدعى شرف بنوته وعمل فيها وطني شريف وإتلفح قال إيه بالوطنية..سمك لبن تمر هندي وسقوط أقنعة وشعارات مزيفة بهتت من أول نقطة دم سالت في الميدان حقيقية..مين قال ثورتنا يبقى عنوانها مرسي وللا دومة وللا علاء عبد الفتاح وللا أحمد ماهر وإسراء وأسماء وللا ميليشيات أبو اسماعيل وللا جماعات الإرهاب والبلطجية..مين قال ثورة شعب تتنشل في غمضة عين والسارق معروف وعينيه بجحة وقوية..الثورة كانت زي بنت البنوت اللي اتخطفت يوم فرحها وهتك عرضها قطاع طرق تحت مسمى الشرعية..كده من غير مأذون لكن بشهود زور على شويه منتفعين على حبة صايعين محترفي إنتماء لمنظمات حقوقية..ثورتنا لو نطقت حتنطق كفر بالمبادئ اللي حاوطوها بيها ومصوا دمها كده عيني عينك واللي أخدوا عزاها من عمر مكرم يوم الصباحية..ثورتنا سقطت في أول نظام فاشي استغلها علشان كده كان لازم تدخل ملحق 30 يونيو علشان تحسن مجموعها وتنجح بجد بمساعده خير جند الأرض وإرادة الشعبية..لكن زي ما بيقولوا اللي اتلسع من الشوربة ينفخ في الزبادي ودي مقولة معرفة في الأمثال العامية..يبقى لازم نفوق ونصحى ونفنجل عينينا على بتوع التلات ورقات والمنتفعين ومحترفي الهبر على كل الموائد وبتوع شعارات المصالحة الوطنية..لازم تكون العين الحمرا لكل عابث وإرهابي لازم قبضة حقيقية..بلدنا مش محتاجة ثورة لكن ثورتنا محتاجة بلد وربان ماهر يقودها بالعدل والحسم وترجع من تاني هيبتها المستحية..بلدنا محتاجة شعب واعي وقيادة حكيمة وحكومة واعية من غير ارتعاش وصاحب قرار جرئ قد المسئولية..بلدنا محتاجة ثوار مش محتاجة تجار يتاجروا بأحلامها وأمانيها ولا مقاول هدم ولا مفتي خراب زي الغراب بينبح من غير رادع بالقصد والنية..بلدنا محتاجة دكر عارفين يعني إيه دكر يعني واحد يحكمها ويخليها من جديد ست الدنيا ويعلمنا من جديد نعرف قيمة أم الدنيا بهية..هو قالها وإحنا صدقناه حنخليها ست الدنيا وساعتها تبقى فعلا ثورة ونبقى قد المسئولية..أي والله حتبقى ست الدنيا ولا عزاء للمتأسلمين وأصحاب الصباع المقطوع وبتوع الملوخية والفتة وأدعياء الشرعية..هي دي الشرعية..أي والله هي دي الشرعية..!!                                                   said_elmasryfahmy@hotmail.coma