صعب علينا نشوف اللي بيحصل في وطننا كده وأصعب لما يضيع مننا الأمن والأمان..لما تلاقي علم بلادك والرمز يتحرق من شوية أنجاس كده عيني عينك ببساطة في الميدان..الميدان اللي أصبح رمز في كل العالم ودليل على صدق شعب لما يثور ويفور لما ييجي الآوان..صعب تشوف قله بتهتك عرض وطن احتواهم وضمهم جواه وييجوا في لحظة غدر يغدروا بأولادنا الجنود الشجعان..صعب نسيب الحبل على الغارب لكل من هب ودب اللي عامل معارض واللي عامل ثورجي واللي عامل فقيه في حقوق الإنسان..مين اللي قال وطن يصبح بين يوم وليلة حقل تجارب ومين قال نسيب وطننا كده تنعق فيه البوم والغربان..خلاص الصورة واضحة واللعب بقى عالمكشوف والشعب بقى شقين مواطنين وإخوان..وحكومة رخوة وأيادي مرعوشة والدم في الشوارع والفاعل مجهول رغم أنه واضح ومعروف للعيان..صعب نتهاون في أمن وطن هو مآوانا ودارنا والحاجة اللي حيلتنا على مر الزمان..ربنا سبحانه قال " ادخلوا مصر إن شاء الله آمنين" وإحنا نسينا كده وفرطنا ببساطة في كلام الرحمن..سايبين كلاب السكك وكل واحد فاكر نفسه ثوري يكسر ويخرب من غير عقاب ورضينا بكل خنوع بالذل والهوان..الوطن بيتفتت وكل يوم خبر مسموم وشماته من أصحاب الكف المقطوع وكل إرهابي خسيس ندل جبان..عربات مفخخة وقنابل غدارة ومواجهة قذرة غير مرئية وخير جند الله بيموتوا كده ببلاش من تنظيم أسود إرهابي عليه الوطن هان..لا قانون إرهاب صدر ولا حتى تحذير والعين الحمرا اختفت مع سبق الإصرار والترصد وبفعل فاعل أو بسكوت حكومة قرضت شجاعتها الفئران..آه يا وطن عيني عليك تبكي لما تهون على الناس وتلين همتك بعد ما كانت هيبتك جبل صوان..معقول كده تبقى بلدنا رهينة خوف ورعب وتنظيمات معلومة ومجهولة على كل الأشكال والألوان..معقول يطلع علينا فلاسفة التحليل وكل واحد عامل فيها خبير استراتيجي اللي انتشروا في الفضائيات والصحف والمجلات وفي كل مكان..كل جريمة قتل نشوف مانشيت كئيب ويتلفسفوا ويقولوا الإرهاب بيلفظ أنفاسه الأخيرة والنتيجة شباب زي الورد بيموت ضحية إرهاب خسيس جبان..القبضة الحديدية لازم تضرب بشده والمواجهة الحقيقية لازم تكون والعين الحمرا لازم تظهر ويبان..مين قال حراس الوطن نخاف عليهم وهم سبب عزوتنا وقوتنا وإحساسنا بالإستقرار والأمان..باختصار بلدنا عايزة حكومة دكر وقرار جرئ وشجاعة رجالة مش هلفطة وكلام نسوان..اشتقنا للشوارع من غير دم وفوضى واشتقنا ننزل من بيوتنا وسط الليل من غير قلق اشتقنا فعلا للأمان..مصر أكبر من أي إرهاب وأكبر من فصيل متأسلم عاوز يفرض إرادته مهما كان..مصر باقية وخالدة خلود التاريخ رغم كل واحد هانت عليه أو باع وخان..مصر ولاده للخير وفيها شعب طاهر مسالم صامد مؤمن برب واحد وبكل الأديان..أزمة وحتعدي ورب محمد وياما دقت عالراس طبول ومعدنها الأصيل عند الشدائد يظهر ويبان..آااااااه ياوطن صبرك جميل وأجمل ما فيك لما بتنتفض وتتطهر بإيديك وتطهر بصمودك ثوبك من غل كل حاقد غادر جبان..يا وطن طهر حدودك وافرض على الكل شروطك واحمي من الغدر جنودك وارجع لمجدك وهيبتك اللي ورثتها عبر الأزمان..يا وطن احمي ولادك ورجعنا نعشق من تاني ثباتك واظهر للخائنين عنادك وخلي الأمن والأمان يرجع تاني من جديد عنوان..يا وطن حقق كلام ربك فيك وأنشر رسالة للعالم تثبت فيها حروف القرآن..!!              اللي بيحصل في بلدنا جريمة مع سبق الإصرار والترصد بتخلينا عايشين تحت سطوة الإرهاب والتهديد..كل يوم مأساة كل يوم حادث جديد..ولا شايفين سياسة واضحة ولا حكومة عينيها حمرا وقانون طوارئ لا هش ولا نش ولا ضربة للإرهاب بيد من حديد..مازال النيل يجري ونهر الدم مستمر وبيانات التهديد والوعيد..إمتى بقى ترجع ليالي الأمان امتى نردع الموت وإمتى نفرح من جديد بالعيد..الناس بتسأل نفسها ليه بقينا كده وفين جينات السلم والموده والسلام اللي موروث فينا من أزمان بعيده وليه الحزن فينا بيأكدوه بالتقصير والتمديد..معقول نبقى عارفين أصل الأصابع فين ونكتفي بالبيانات والتنديد..يا ترى كان مين السبب في اللي إحنا فيه حكومة ضعيفة وللا إرهاب أسود ماقدرًناش جبروته وحرم قلب كل واحد فينا يبقى سعيد..مفيش تفاهم مفيش مجال ولا تراجع ولا استسلام يا إما تقدروا تحمونا يا تسبوها لصاحب قرار جرئ صنديد..!! مايحدث في الشوارع والجامعات من فوضى مسلسل تركي بنعيشه بصورة درامية..ورعشة الحاكم ذريعة وحُجة للعملاء والإرهابيين يسرحوا ويمرحوا في البلاد بصورة طبيعية..عاملين زي اللي على رأسه بطحة ونطبطب ونحسس على كل مخرب تحت دعوه إن ده مش انقلاب وإن ثورتنا شرعية..خلاص الشعب قال كلمته واختار والدور على صاحب الأمر ينفذ الأمر والوصية..لو مش قدها سيبوها وإحنا حنلاقي أكيد من بين شعب مصر اللي قد المسئولية..لو قدها يا سيسي إعلنها صريحة وإتقدم الصفوف وهات لينا من تاني الإستقرار والأمان ورجع أيامنا الهنية..تعالى ونضف الشوارع والميادين وأكنس الشوارع من أذناب المتأسلمين والسيس والبلطجية..تعالى وسيبك من شعارات حقوق الإنسان وإقطع للإرهاب كل إيد ولسان وحتلاقي وراك كل شعب بهية..خلاص كفانا حصاد المر وأنصاف الحلول مفيش وطن بيعيش بالصدفة ولا فيه شعب بيفضل أسير أفكار الجاهلية..تعالى وكمل جميلك يا أخي وأحمي ثورة شعب قام وثار وحطم قيد مخطط كان مكتوب نعيشه تحت دعوى الشرعية..تصدق وتؤمن بالله أنا حاسس إنك حتيجي وتحقق أمل شعبك فيك ودي إرادة شعبية..ما هو يا إنت يا الفوضي وأنت أكيد قدها وجربناك وعرفناك دايما قد المسئولية..أي والله إنت قد المسئولية..!!                                                              said_elmasryfahmy@hotmail.com