دعوة خاصة جدا ..!!
كان زي أي واحد عادي كدة مننا ..عايش في حاله وكافي خيره شره زينا.. وحبه كان لبهيه كبير وحضر أحداث كتير شهدت علي أيام مجدنا.. عاش الهزيمة والنكسة واتأثر كثيرلما خسرنا أرضنا .. لكن لا كان حاسس بضيق وكان واثق إن الأرض راجعة ومعاها كرامتنا وأمننا ..وكان عنده يقين إن بكرة أحسن من النهاردة والدليل نصر أكتوبر المجيد اللي محا ذكريات ذُلنا ..وكان واثق إن الوطن بتكاتف ولاده درع واقي يحمينا ويلمنا..بإختصار عبد السلام كان شاهد علي اللي حصل في زماننا وعصرنا..لكن إيه هي المشكلة اللي كنا عارفينها كلنا ؟؟.. المشكلة كانت وصية أبوه خليك في حالك ياعبد السلام وإبعد الحكومة عننا..وإمشى جنب الحيط وأي واحد يحكمك لازم تقول له ياعمنا..خلينا في حالنا الله يخليك مش ناقصين حاجة تُغمنا..بلاش نخبط في الحلل ونرجع ونلوم نفسنا..أنا نبهتك ياعبد السلام وماترجعش تندم وتقول ذنبنا علي جنبنا..!! عبد السلام رغم تأثره بكلام أبوه كان مالوش ميول سياسية..بيتابع الأحداث آه لكن يخزنها جواه ولاكان منتمي لجماعة أنصار الثورة ولا يافطة الشهداء ولا سبوبة رابعة ولا أي مجموعة حزبية..كان بيؤمن بمبدأ حزب واحد ومفيش غيره اسمه باختصار حزب أم الدنيا بهية..وهو ده اللي حفظه دايما من عيون اللهم ما احفظنا لغاية دلوقت من غير ما يلبس قضية..لكن تفتكر ياتري بكره فيه إيه ياعبد السلام وإيه ياتري هي الخطوة اللي جاية..!! وفي يوم من الأيام كان ماشي ياعيني سرحان ومحتار..لسه جاي من شغله وعاوز يروًح يرتاح من تعب النهار..بص لقي صوان كبير وكهربه وأنوار..ويفط بتهني أهل الحته بواحد من الثورجية الكبار..وشاف علي بابه مسئول حكومي وحزبي وشيخ الحاره المختار..كان شيخ الحارة بيجمع الناس هيلة بيلة كدة من غير اختيار..أي واحد من الحته لازم يخش الصوان بالعافية والإجبار..الموضوع مش بمزاجك ياعبد السلام واللي عاوز يعمل فيها ثورجي لازم ينكوي بالنار..حتدخل وللا حتعمل فيها معارض أو ناشط سياسي أو تشتغل للثوره سمسار..بقول أدخل أحسن واحترم نفسي وأعمل فيها ناشط سياسي بتاع كله أو واحد من الثوار..وكده يبقى ما حدش فرض إرادته عليا ودخلت بكامل إرادتي قال يعني بإرادته إختار..!! المهم دخل الخيمة لقي ناس كتير وافتكر إنه شافهم كتيرفي الجرايد والمجلات..فلان بيه وثورجي باشا واللي من لجنة الدستور والسياسات..وشاف نجوم وفنانين عاملين شغل سياسة وكمان فنانات..وصحافيين عاملين معارضين وغيرهم مؤيدين من اللي بيطبلوا للإنجازات..لكن المفاجأه لما دخل لقي الكل بيصفق له اتعجب وضاع في المتاهات..أتاريه كان صاحب الرقم 1000 من ضمن المدعوين والمدعوات..مبروك ياعبد السلام بقيت راجل مهم وحسبوك علي البهوات..!! عريف الحفل ابتدا الحفل ورحب بكل الموجودين..وخص بالذكر عبد السلام وهناه بالرقم 1000 نيابة عن الحاضرين..قال في سره اللهم اجعله خير يارب تكون علاوة وأكون من المحظوظين..أتاري الجايزة كانت بطاقة دعوة لحضور الإحتفال بذكرى شارع محمد محمود اللي كان الدم فيه له أنين..!! عبد السلام شكر البيه المتحدث وسأل يعني إيه ثورة ويعني إيه شهداء وليه عاملين إحتفاليه..أنا عاوز بس أستفسر واعرف إيه هي القضية.. انت تقصد شهداء ثوره ينايربجد وللا اللي كتبوهم شهداء وهم ماتوا من البلطجة قدام الأقسام ومباني الداخلية..وللا قصدك كل واحد مش لاقي حاجة ويروح يعمل فيها ناشط سياسي أو منتمي لمنظمة حقوقية..هو انت لسه فاكر النفوس صافية وفاكر إن فيه ناس ناسية عودة الشرطة ووقوفها مع الجيش والشعب في ثورة حقيقية..المسئول افتكر عبد السلام بيهزر وبيعمل فقرة فكاهية..لكن عبد السلام واصل الكلام ونسي كلام أبوه وكمان الوصية..والنبي تعرفني ياسعادة البيه ياتري ليه ثار الميدان ومين اللي استفاد ومين عاوز بلدنا دايما مولعة والشارع في حالة سفسطة بيزنطية..لسه فاكر إيه هي مبادئ ثورتنا الفتية..وياتري لسه فاضل منها حاجة غير جيشنا العظيم وقدرتنا العسكرية..قواتنا المسلحة هي الشئ الوحيد الباقي من مبادئك الثورية..أبطالنا دول هم الأمل اللي بيخلينا نتمسك بالأمل والمصداقية..لكن عاوزك تقوللي فين راحت بقيه المبادئ والشعارات الثورية..قضينا علي التوريث وورثونا بتوع الصفقات المشبوهة الإستغلالية..قضينا علي الفساد وبعنا البلد لمنظومة متأسلمة إحتكارية..وكمان لاحظنا فقرة عجيبة بتنادي بإقامة عيش حرية عدالة إجتماعية..ناس واخدة كل الحقوق والغنائم وناس بتنام من غيرماتلاقي عشاء أو حتى قرص طعمية..ولا شفنا اسلوب ديمقراطي حقيقي ولا حتي ممارسة ليها فعلية..راحوا البهوات وشفنا عصر الدقون العيره واللي اتحكموا في حياتنا بمنتهي التعسف والديكتاتورية..أنا أسف يافندم مش حاقدر أقبل من سيادتك الدعوة ديه..وخلي صورة الثورة في خيالي جميلة كدة زي ماهي..المسئول دمه اتحبس وبرطم بكلام كتير مليان تهديدات ولوح بإجراءات أمنية..وقال مش من حقك ترفض دعوتنا الكريمة السامية..صحيح مواطن ماعندكش دم ولا تستحق حتي الهدية..عبد السلام كان بيكلم نفسه وهو خارج وبيقول مش حا أقبل أي دعوة من غير ماتكون حقيقية..ياحضرة المسئول هو دة خلاصة الكلام ولو مش عاجبك روح وارفع قضية..كفاية علينا جيشنا الهمام الأمل الوحيد الباقي في ربوع بهية..بأمارة إيه عاملين احتفال وتقولوا كام شهيد وضحية..هو مين راح عند مين ومين اللي خلاها ثورة حلمنتيشي بعيال سيس وبلطجية..ربنا يستر عليك ياعبد السلام بقي بدل ما تروح محمد محمود حفرت قبرك بإيدك ولا سمعت كلام أبوك ولا نفذت الوصية..!! said_elmasryfahmy@hotmail.com