المهاجر..!!
العيد فرحة وسنة هجرية جديدة هلت علينا وكل سنة وانتم جميعا طيبين..عيد الهجرة مر علينا زي الطيف واحنا كالعادة مشغولين..الدنيا لهيانا وواخدانا علي فين مش عارفين..ذكرى الهجرى الكريمة مر علينا واحنا باللي اللي إحنا فيه مشغولين..وكالعادة لا بناخد عظة ولا عبرة ولا استفدنا من اللي حصل لأجدادنا واللي خلاهم يحكموا العالم ويصنعوا حضارة عاشت قرون وسنين..الهجرة الحدث الجلل والفعل الفاصل القاطع اللي أنقذ رسالة الإسلام من الكفرة والمشركين..ربنا رب العرش كان له حكمة لما أمر رسوله الكريم بالهجرة لدار الأمن والنجاة من قوم وأهل وعشيرة فسقوا في الأرض وعاثوا فيها بلا ملة ولا دين..الهجرة كانت للنور والحق والعدل اللي كانوا منه محرومين..الهجرة كانت لبناء دولة وعقيدة وطريق واضح وحضارة أبهرت الأصدقاء والحاسدين..كان الميزان وقتها عادل واضح حازم كانت لحظة تأسيس لدولة وتأسيس للشخصية الحضارية الإسلامية اللي سادت العالم سنين وسنين..لكن سبحان مغير الأحوال وحسبي الله في كل اللي فرط في سماحة شخصيتنا السمحة باسم الدين..حسبنا الله في اللي هاجر من سماحة أهل بلدنا وطيبة أهلها المسالمين..نبينا هاجر للمدينة علشان يبني حضارة وأمة عظيمة ويغرس جوانا مبادئ ثقافة التكاتف والتألف ومعني كلمة السماحة في الدين..الهجرة كانت لله وحده مش علشان سلطة ولا كرسي وشرعية وهمية ولا حب تملك وكلبشة في الدنيا من حثالة المتأسلمين..الهجرة كانت للبناء وصب قواعد متينة لأساسيات الوطن مش التظاهر بالصوابع في الميادين..الهجرة كانت علشان زرع المحبة بين الناس والخوف والحرص على دماء المسلمين..الهجرة كانت للمبادئ الإنسانية ونشر السلام والمحبة بين الناس مش زرع الخوف والهلع والرعب بين المواطنين..الهجرة كانت لحقن دماء الناس والمسلمين مش للقتل والخراب والدمار وأدينا على أرض سينا شايفين..الهجرة كانت للتسامح وتقديس معني كلمة أمة ووطن مش بذر الخراب وسفك الدماء من حثالة الإرهابيين..احتفالنا بالهجرة السنة دي غير كل سنة لأنها أيام حاسمة نكون فيها أو لا نكون ونشوف آخرتها مع ولاد الذين..الهجرة معنى وقيمة ومحتاجين وبجد نهاجر ونخلع من علينا كل مظاهر للسلبية في سلوكنا ونبطل نطاطي ونبطل نولول عالماضي زي الولايا المقهورين..لازم نهاجر من خنوعنا وذلنا وخضوعنا لازم نطهر جروحنا من بقايا حكم عام حفر في عقولنا الشر والفرقة والكراهية وشكك البعض في صورة الشرع والدين..لازم نهاجر من عبودية الفرعون وألوهية الأشخاص وعشق مظاهر الجبروت وعيشتنا بالذل راضيين..لازم نهاجر من أفكار السلبية وتناول أمور سيادتنا بسلبية وتسليم قرارنا لغيرنا بعنجهية ونعرف قيمة ومعنى وقَدر أننا مصريين..الهجرة فرصة وقيمة لازم نعيش معناها ونشعر من جوانا يعني إيه كلمة وطن وقد إيه كلنا عنه مسئولين..لازم نهاجر من كل سلبيات ماضي قريب ونتكاتف ونتسامح ونتحد يد واحدة ضد فلول جحافل التتار الجديدة المتلفعة بالدين..هو ده عيد الهجرة وهي دي الهجرة الحقيقية اللي تاخدنا للأمام وتعلينا بين الأمم وتوهبنا خلود الأبدين..لازم نهاجر يعني لازم نهاجر وكفاية علينا بقى ظلم وجهل وخنوع وتفريط في كتير حاجات مهمة طول السنين..!!
الهجرة ذكرى عظيمة وفرصة فعلا للعظة هامة وحقيقية..كل مواطن مهاجر شعار لازم نرفعه ونعليه جوانا وننسى ماضي فات وشعب بيعشق السلبية..لازم نسمي الأشياء بمسمياتها فعلا ونقول للأعور أنت أعور في عينه وننسى بقى شروط الهيمنة والتبعية..الهجرة فرصة نهاجر من كل صورة حشرنا نفسنا فيها وسلمنا مصيرنا تسليم أهالي لأصحاب شعارات براقة وهمية..الهجرة فرصة نعرف مين هي بلدنا وقيمة قدرها وليه رب العالمين كرمها في كتابه بصورة حصرية..لو هاجرت من خنوعك وخضوغك لأفكار قديمة وعقائد موروثة وناس بيشتغلوك بحاجات هم أصلا بيستغلوها لمصالح شخصية..تمرد أو هاجر من خيوط عنكبوت بترسم خطوط حواليك وتكبل طموحك في حياة نظيفة مليانة حب وأمل ورفاهية..هاجر من أفكار ماضيك واتمرد من جواك وما تنساش إن وطن بحاله اتحرر من عنكبوت سام كان خلاص حيحكم قبضته عي مصير وطن كل طموحه كان مجرد شعور بالأمان والتحرر من عبودية شعارات قول حق يراد بها باطل بيقولوا عليها دينية..تخيل لو المواطن مهاجرش مرة ولا طلع في 30 يونيو كانت حالة بلدنا حتبقى إيه وإيه كان حيكون مصير بهية..تخيل لو أي ثائر على حال بلده أو أي غيور كان استكان ورضي باللي هو فيه زمان ولا كانش هاجر للميدان كان زمان حالنا إيه تحت وصاية مكتب إرشاد مشبوه وعصابة في قصر تحكم فينا بالتبعية..هاجر دايما وخليك مهاجر ولا تحبس نفسك أبدا تحت أي شعار أو مبدأ يحرمك من الإحساس بالمسئولية..هاجر لبلدك قبل ما وطنك يهجرك وساعتها يا صاحبي حتغني ظلموه أو ظلموني وباين في عينيهم وساعتها حتبقى من غير سعر أو وطن أو قيمة حقيقية..خليك مهاجر وهاجر دايما لكل شئ جميل وساعتها حتشوف حتوصل لفين بهية..حتبقى ست الدنيا وقد الدنيا زي ما قالها إبن السيسي اللي منتظراه الراية والمسئولية..آي والله مستنياه الراية وهو قد المسئولية..آي والله قد المسئولية..!! said_elmasryfahmy@hotmail.com