خروف الجهاد..!!
العيد فرحة ..عيد سعيد علينا كلنا وعلى كل المصريين..كل عيد ومصرنا بخير ويارب تكمل فرحتنا ونرتاح من وجع الدماغ وبلطجة السادة المتأسلمين..اللي حاولوا يضيًعوا بهجة الناس وفرحتهم بيوم النصر المبين..مرة مظاهرات ومرة بيانات يا عيني متبرجلين..ضايعين..مش فاهمين..قال إيه بيقولوا شرعية وكأنهم في القرن الماضي عايشين..هرج ومرج ومظاهرات بالعشرات وشعار أصفر زي قلوبهم وهم من الناس ملفوظين..وتجربة سوداء في الحكم خرجوا بيها بضربة معلم مهزومين..وانتشروا في البلاد وآذوا العباد وتفننوا في الفساد ولكن بطبيعة المصري مش عارفين..خروف الجهاد موجود داخل كل منهم استغل فترة الإنتصارات والأعياد وأراد عكننه شعب الطيبين..قنابل بدائية الصنع وسيارات عبيطة ملغمة والنتيجة شباب من خير جند الله وثكالى ويتامى في بيوت البسطاء من المصريين..ودعاء في العلن باللعنة والفناء للجيش المصري الحامي والواقي والأمين..عمرك شفت خسة وندالة أكتر من كده قال إيه من جماعات بتتكلم باسم الدين..عمرك شفت ناس تشكك في انتصار جيشها وتشارك عدوك في التقليل من نصر أكتوبر المبين..وبهجه وفرحة وشماته في نكسة يونيو وكأنهم في معاهدة شماته مع كل عدو للمصريين..خروف الجهاد عارف نفسه وقيمته ومكانته وبيعلن عن نفسه كل يوم في بيان من هنا أو هناك في سرداب أو مغارة هربان فيها مع اللي من ضمير الأمة مطرودين..حلاوة روح ونجاسة ضمير وغل موجود جوه النفوس دفين..جر البلاد للفوضي وعدم الآمان وهدم الإقتصاد وبث الفرقة بين المواطنين..فيها لأخفيها شعار وعقيدة مزروعة جواهم ومبدأ ساري في دمهم الملوث اللي بينشر دعوى المتعصبين..لكن نسوا وتناسوا أن هذه البلاد محروسة وأهلها في رباط ليوم الدين..نسوا وتناسوا أن شعبنا شعب أصيل صاحب تراث وحضارة ومخزون حضاري عبر السنين..يمكن الدنيا شوية فوضى وفيه شوية برجلة ولخبطة والناس متلخبطين..يمكن فيه شوية تراخي وحكومة غير محسوسة ومظاهرات في قانون طوارئ ومعاملة أمنية بمنتهى اللين..يمكن الجبهات المفتوحة كثيرة ويمكن خارطة الطريق كتير بيكعبلوها بمكر ولاد الذين..يمكن فيه شبه حكومة ولا فيه مشروع قومي محسوس ولا فيه حاجة أكيدة في آخر الممر بلت ريق المصريين..يمكن فيه فذلكة وسفسطة وفلسفة وتنطيط وادعاءات من أدعياء أو أوصياء على البلد من ناشطين أو حقوقيين..بسم الله ما شاء الله الكل بقى بيفهم وصاحب وصاية ورأي على وطن مش عارف يلملم أطرافه والكل عارف إننا وبلدنا مرصودين..خروف الجهاد عارف مصيره رغم كل دهائه ولكن جينات الغباء بتغلب على مخططه وبينفضح ويتلفظ من الشعب ذليل مهين..لكن حنقعد نتفرج ونراقب اللي بيحصل ونصفق للعبة الحلوة واحنا واقفين محلك سر سلبيين..يا ترى حنسيب بلدنا للغباء والتطرف من غير مقاومة ولا دفاع عن بلدنا بلاد المصريين..من غير ما ندافع عن تراثنا وحاضرنا ومستقبل أولادنا من فكر بائد اتسرسب لكرسي الحكم في لحظة غباء واحنا مغيبين..مش العيد هو الفرحة وإن نكون فرحانين..مش العيد هو اللمة والبهجة ونكون على الخير مجتمعين..على السعادة والخير والمستقبل السعيد متعاهدين..يد واحده وهدف واحد وفكرة واحدة ونكون كلنا داخل برواز الوطن متحدين..موجودين..فاعلين..إيجابيين..ضد الإرهاب صامدين..لجيشنا العظيم داعمين..للعهد على صيانة الوطن حافظين..أكيد لازم نكون قد القول ونعرف يعني إيه وطن ويعني إيه مصر وهي من هي ونعرف مكاننا ومكانتها فين..لازم نفوق بالعمل والإجتهاد والتوحد ضد فكر الغلاة المتشددين..لازم نبني ألف سد عالي ونحفر من تاني ألف قتاة سويس لازم نحفر في الزمن بسواعد البناة المحبين..لازم نتوحد خلف قائد حقيقي وربان ماهر يحقق وحدتنا من جديد ويجمع كل الطوائف ويبني من جديد أساس وطن جديد بمخزونة الحضاري بأساس وبنيان متين..يارب العيد هو الفرحة والبهجة أكمل علينا سترك وحفظك لنا كما ذكرت في قرآنك وكلامك الحكيم الرصين..أنت من وصفتها هي مصرك يارحمن وأوصيت الدنيا كلها أن أدخلوها آمنين..هي مصر يا رحمن يا رحيم أمانة عندك فبث في قلوبنا وقلوب الناس حبها وعشقها وأرحمنا من المتأسلمين الأغبياء الكارهين..يارب هي مصر كنانة الله في الأرض أم هاجر ومسرى عيسي وموطن كليمك موسى وأنت أعلم بها وسيد العالمين..اللهم إحفظا واجعل أيامها أعيادا وأرحمنا من كل حاقد كاره لنفسه وغبى منه فيه باسم الدين..إن شاء الله اللي جاي أحسن وأفضل وبكره مصر تبقى قد الدنيا زي ما بشرنا القائد الأمين..بكره أحسن بإذن الله وأكيد بفضل رعاية الرحمن ووحدة المصريين.. عيد مبارك بالخير وهانت هي حلاوة روح وتروح وخروف وبكره يعقل ويعرف مكانته بين المصريين..مصر أبقى وأقوى بإذن الله مهما مأمأ مولانا أو سيدنا أو أي واحد بيسفسط باسم الدين..لو مش عارف قيمة البلد دي روح لغاية المدبح وشوف ضحايا التعصب والمتخلفين..لو مش عارف قيمة البلد دي وناسها روح وامشي في الشوارع وشوف فرحتهم بفضل الله وقوة جيشهم واثقين..آمنين..رغم بذور الإرهاب صامدين..مستبشرين..بالله الحافظ الحامي مؤمنين..كل عيد وأنتم طيبين..كل عيد وأنتم مصريين..!!
Said_elmasryfahmy@hotmail.com