تعرف ياباشا : لما الواحد مننا يكون جاعان وما يلاقيش رغيف العيش بيعمل ايه ؟ .. ايه ؟ ممكن يسرق عشان ياكل .. ممكن يقتل لو كان حاقد .. ممكن يبيع نفسه وغيره لو ماعندوش ايمان بقضية .. ياااا ه .. للدرجادي ياجزماتي ؟! .. نعم واكتر من كده يا باشا .. طيب خلاص خلاص بلاش وجع دماغ .. امسحلي الجزمة وانت ساكت .. حاضر ياباشا .. على فكرة ياباشا : ليه واحد قريبي عاوز يشتغل" نايب" في اللي ما يسمى " البرلمان " .. البرلمان مرة واحدة يا جزماتي ؟! .. ايوه ياباشا .. امال مرتين؟ .. اصل قريبي ده كان شغال خدام مع واحد مسئول كبير اوي في وزارة الاسكان زمان وبعدين اعطاله المسئول " حتة " ارض قبل مايسيب الوزارة وقاله :" دي علشان انت خدمتني .. خدها لعيالك وبكرة تدعيلي " . ايه الكلام الفارغ ده يا جزماتي ؟ .. انت بتهزر معايا ؟ .. لا يا باشا ..هو انا اقدر ..بس صدقني هو ده اللي حصل .. طيب وبعدين ؟ قريبك ده عمل ايه؟ .. قريبي لم خلجاته بعد ما اخد عقد الحتة الارض وعليه توقيع المسئول وراح سور عليها وكتب " ملك ورثة مسئول الاسكان فلاااااان ومش للبيع " وكتب عليها رقم تليفون عمدة بلدنا وسبها وراح اقعد في البلد يخدم في دوار العمدة زي ما كان .. ايه دا يا عبيط؟ فاكرني هصدق كلامك ؟ .. وانا هكدب ليه ياباشا ؟ .. طيب كمل وبعدين ؟ .. بعدين ياباشا من يومين زارني قريبي وكان باين عليه النعمة جوي .. ازاي يعني ؟ .. افهمك ياباشا: لقيته بعد ماكان بيلبس كستور بقى بيلبس جوخ .. وبعد ماكان بيمشي حافي لقيته لابس جزمة ايطالي .. امال ياباشا ما انت عارف انا بافهم في الجزم كويس اوي . ماشي ماشي وجعت دماغي خلص وانهي حكايتك قبل ماتغور في داهية من هنا .. عندي ضيوف جايينلي الوقت في المكتب يالا بسرعة خلص .. حاضر ياباشا .. المهم ياباشا قريبي قالي ان جاله تليفون من زبون سقع عاوز يشتري حتة الارض عشان يبني علها فندق سياحة .. ايوه ماهو سعادتك عارف السياحة بتكسب اوي اليومين دول .. وبعدين يافيلسوف؟ .. صبرك ياباشا .. قريبي قالي انه باع حتة الارض بملايين .. ملايين ؟! .. ايوه ملايين ياباشا .. ده حتى اشترى فيللا في المعادي لسه امبارح ..علشان اللي بيجولوا عليه ده .. يكمل برستيجه .. ياه !! طيب وبعدين ؟ .. ولا قبلين يا باشا .. هو قالي اكلم سعادتك لو تساعده يدخل مجلس الشعب الدورة الجايه .. يخرب بيتك لبيت قريبك ياواولاد ال.... ليه كده ياباشا ؟ .. عموما كتر خيرك اهي الجزمة خلصت ومش عاوز تمن المسحة زي العادة .. غور جاتك ارف انت وقريبك .. يا خميس : ايوه يافندم .. ابقى شوفلي جزماتي تاني غير الولد المقرف ده . حاضر ياباشا .. بس روق كده ياباشا .. انا م الصبح واقف فى البوفيه وعاوز اعملك فنجان قهوة بس قلت لما تفضى .. شكرا يا خميس انت عسكري هايل .. وكمان خدام امين .. شكرا ياباشا .. بقول ياباشا ؟ نعم ياخميس .. الجزماتي اللي حضرتك مشيه صعبان عليه اوي ماتشوفله طلبه ياباشا واهو كله بصوابه .. والله فكرة ياخميس .. طيب ناديله بسرعة وطيب خاطره .. اوامرك ياباشا .. ايوه يا سيدي اساعد قريبك ازاي ؟ .. والله ياباشا لو تقف جانبه لما يقدم اوراقه في المجلس يبقى كتر خيرك .. وكمان ياباشا لو تراعيه في فرز الاصوات هو برده هيقدر ده .. ايه يا ابن ال .. صبرك ياباشا .. كل اللي مطلوب انك توصي عليه حد من الكبار اوي اللي فوق .. فوق اوي .. طيب ياجزماتي والتمن ايه ؟ .. هيراعيك ياباشا بقرشين تامن بيهم مستقبل العيال لما تطلع ع المعاش .. معاش ؟! . ايوه ياباشا .. معاش انت فاكر انك هتخلل فيها .. جاتك قرف عليك وعلي الفاظك .. كمل كمل .. حاضر ياباشا .. هكلم قريبي واقوله ان الباشا موافق .. ماشي بس ما اتفقناش ع المبلغ .. مبلغ ايه ياباشا .. بقولك معاه ملايين .. طيب انا موافق واعتبر قريبك خلاص دخل المجلس .. الف مبروك .. شكرا ياباشا .. وادي الشيك .. شيك ؟! ايه ياراجل يامخبول انت ده ؟! .. ايه ياباشا ؟! .. اصل انا وكيل اعمال قريبي .. والشيك ده فتح حنك بس لغاية ماينجح .. يخرب بيوتكم يا اولاد الكلب !!! .. طيب بلغ قريبك انه خلاص اخد عضوية المجلس .. انا كنت متاكد ياباشا من قدراتك .. وعلى فاكرة ياباشا : لما تطلع ع المعاش هخليه يشغلك عنده .. كمان!! .. محمود عابدين .. mabdeen221@yahoo.com