مبدئيا كده وقبل ما ندخل على الحادثة الدموية اللي قالبة الدنيا في مصر حاليا ، خليني الاول نشوف حكاية مسخرة من مساخر الشرطة المصرية ، حكاية الطفل اللي محكوم عليه بـ 25 سنة سجن نتيجة قتله لأربعة أفراد وحرق مديرية أمن الفيوم ، وانا هنا لمّا أقول طفل ، مش بمعنى ان الطفولة في عُرف القانون محسوبة من سنة لـ 16 سنة كعمر ، انا هنا بتكلم عن طفل بجد عنده 3 سنين و5 شهور ، ونتيجة خطأ فادح في التحريات تم اتهام هذا الطفل صاحب الاسم المذكور في الاوراق وصدر ضده حكم قضائي ، وراحت مباحث تنفيذ الاحكام تقبض عليه ، فين فلان الفلاني ؟ .. أمه قالت لهم اهه ، " بيبي " صغير .. هو ده اللي انتوا بتسألوا عليه ، فبدلا من ان يضحك ضابط تنفيذ الاحكام على الموقف ويتداركه بسرعة قام قابض على ابوه،المهم انه يرجع وفي إيده اى حد والسلام .

ابوه شفته مع الابراشي امبارح في برنامج العاشرة مساء ، راجل غلبان ومسكين وكان الولد الصغير نايم في حضنه ، وفي نفس الوقت تتصل مرات الراجل وام الطفل وتقول للابراشي ، لسه قوة من مباحث تنفيذ الاحكام ماشية دلوقتي من عندي عشان كانت جاية تقبض على الطفل.
طيب كل ده أمر يُضحك ويُبكي في نفس الوقت ، تقوم الرياسة حسب ما قريت على احد المواقع تصدر بيان عاجل نصه كا الأتي : بأمر السيد رئيس الجمهورية عبد الفتاح السيسي ، صدر عفو رئاسي عن الطفل فلان الفلاني المحكوم عليه ب 25 سنة نتيجة اعمال ارهابية وخلافه.
انا مش عارف مين العبقري اللي كتب البيان الرئاسي ده ، لأن معنى البيان إقرار واضح وصريح بأن الطفل فعلا مُدان في القضية وعليه حكم ، وهاهو رئيس الجمهورية يعفو عنه ، طبعا بيان مُضحك - إن كان صحيح وبج - وكان المفروض يكون عكس كده تماما ، بيان صارخ بمحاسبة كل من أخطأ في تحرياته ليكون هذا الطفل هو حامل الاسم بالخطأ وهو المطلوب تنفيذ الحكم عليه .. محاسبة شديدة وتعويض أهله تعويضا ماديا محترما عن كل دمعة نزلت من عين الراجل الغلبان نتيجة خوفه على نفسه وعلى ابنه .. مش بيان بعفو كأنه العيّل  " البيبي " ده ارتكب فعلا الجُرم وقد عفونا عنه!!

مسخرة من ضمن المساخر الكتيرة اللي خلتّنا نخاف بجد من اللي جيّ ، حكاية قتيل " الضرب "  الاحمر ، ونفس السذاجة المفرطة من اللواء بتاع العلاقات العامة في الداخلية .. الحادثة يادوبك لسه حاصلة ، تقوم مذيعة تتصل بسيادة اللواء ، فيقول إيه كأنه الحكاية دي من يومين وتم معرفة كافة تفاصيلها : مشاجرة في منطقة الدرب الاحمر بين أمين شرطة وسائق وانيت واختلف الاثنان على الأجرة فحدثت مشادة وتبادل الضرب واللكمات ، تجمهر الناس حول أمين الشرطة ، فأخرج مسدسه وأطلق أعيرة نارية في الهواء فأصابت طلقة بالخطأ الطرف الأخر فمات على الفور.
يخرب بين ابو ده بيان .. ده انت كأنك كنت معاهم وشفت بعينك وبتتكلم بقلب جامد ، مش قاعد في مكتبك وجات لك اشارة لاسلكية باللي حصل من نص ساعة .. يا أخي قول كلام يدخل العقل مادام معندكش اى معلومات .. ومحدش حيلومك لو قلت : اننا لحد دلوقتي معندناش اى تفاصيل عن اللي حصل ، وسوف نحقق في الموضوع واذا ما تبيّن ان الأمين مخطأ ، فسوف يُحاسب جنائيا دون اى انحياز منا ، القانون فوق رؤوس الجميع.

صعبة دي ؟ .. متهيألي مفيش اسهل منها ، وكانت تعفيني من الحرج بعد ان تبيّن ان سيادة البيه الأمين ضرب الشاب السواق طلقتين في رأسه عمدا وواحدة في بطنه وخلّى دمه يغرّق المنطقة كلها.
     أقول ايه واعيد ايه .. حتقوللي حادث فردي ، حاقولك إخرس ، اعترف ان عندك مشكلة رهيبة اسمها أمناء الشرطة ، اعترف انهم بيعانوا من أمراض نفسية بشعة نتيجة احساسهم انهم ليسوا في قيمة الضباط واقرب في التدني لقيمة العسكري النفر .. اعترف ان تكرار الحوادث اللي بتقول عليها فردية لازم تبان لك وللأعمى انها ظاهرة لابد من كبت جماحها قبل ان تستشري كالسرطان وتقضي علينا كلنا.
مش ممكن اللي بيحصل ده ، لسه قبل ما اكتب المقال سامع على اليوتيوب نقيب شرطة بيتكلم بمنتهى الصراحة " وأظن انه سينال عقابا شرسا نتيجة كلامه ده " .. بيقول م الأخر : ان فينا وبيننا ناس كتير بتخطىء ولا تُحاسب ، احنا هنا لا بندافع عن مظلوم ولا بنطارد مجرم .. لامؤاخذة احنا مشغولين بتنفيذ الأوامر بحراسة الباشا فلان والبيه فلان والتشريفة الفلانية ، احنا طالع عنين ابونا وأمنا وأهلنا ومطحونين زيكم بالضبط ، والمنظومة كلها خربانة ومش باين لها إصلاح.!!
.. قتيل" الضرب " الاحمر مش حيكون أخر ضحايا تعنت الشرطة وغبائها ، كان زمان اقصى حاجة ان ضابط ولا أمين يعتدي على واحد بالضرب ، قلم ، شلوت ، يشتمه بأمه ، وكانت بتعدي ، دلوقتي الدم الاحمر بقى كتير ، مش حنسى ابدا الطبيب البيطري اللي مات نتيجة احساسه بالإهانة من ملازم أول ضربه على وشه وقفاه وهو يناديه يادكتور الحمير .. الدم كتر ياجماعة ، والناس قرفت ومش حتسكت ولا تصبر كتير ، فكفاية اوي لحد كده ، وإلا .. ماتظنونه بعيدا ومستحيلا ، اقسم بالله في غمضة عين يحصل وتتملي الميادين تاني ، وإذا فضل السيسي بيتعامل بالحنية دي مع المخطئين من اجهزته ، فحيشوف اللي ماشافهوش مبارك ولا مرسي!!
خلص الكلام !!!