احمد عفيفي يكتب : فاتن حمامة ماتت .. و" البيه " مش عاجبه كلامي!
تخيل كده واحد شافك زعلان ومتضايق عشان مثلا ام كلثوم ماتت ، فبدلا ما يواسيك ويقولك البقاء لله او كلنا لها او يذكرها بكلمة حلوة تبل الريق ، تلاقيه بيبص لك باستنكار وغيظ ويقولك : هى يعني كانت من بقية اهلك ، ما كلنا حنموت!
ماشي ..  تخيل بقى امبارح وانا فعلا حزين على موت فاتن حمامة وماسك دموعي بالعافية ، اقوم الاقي واحد زميلي " لسه إخواني رغم كل اللي حصل " بيسألني : مالك زعلان كده ليه ؟ رديت : ابدا بس فاتن حمامة كانت قيمة غالية اوي .. الله يرحمها .. بعدين قلت له : اكيد انت كمان زعلان عليها .. قام رد رد استفزني جدا وهو بيقول : حازعل عليها ليه .. هى حتكون عندي أغلى من امي .. راحت ولا جات ممثلة اخدت حقها بالطول والعرض .. شهرة ومال وجاه وسلطان .. كفاية عليها كده .. هى حتنهب؟!
قلت له : انا بكلمك عن فاتن حمامة .. إش دخّل امك في الموضوع .. حد جاب سيرة امك .. مالي انا ومال امك ، ومال فاتن حمامة اساسا بالست والدة حضرتك؟
قام رد : اصلي شايفك حتموت من الحزن على واحدة ممثلة ماتت .. والرئاسة طلّعت بيان قال ايه بتنعي فيه الامة العربية موت فاتن حمامة ، تصدقوا انتوا معندكوش دم!
قلت له : انت عارف مين فاتن حمامة؟
رد : ما انا قلت لك ممثلة .. او مشخصاتية .. مش عالمة ذرة يعني ولا من اولياء الله الصالحين.
كاتما غيظي : ماشي .. شفت لها مثلا فيلم " الحرام " ؟
قال : انا من فترة طويلة بطّلت اتفرج على السينما والمساخر دي .. بس متهيألي شفت الحرام زمان في التليفزيون .. فيلم ابن كلب كئيب.
سألته : يعني فاكره .. فاكر عزيزة؟
رد : ايوه .. المرة " .... " اللي نامت مع واحد غير جوزها وحبلت منه وفي الأخر ربنا انتقم منها وماتت.
قلت : نهار اسود ومنيل .. هو انت كل اللي خرجت به من الفيلم انها مرة " ... " نامت مع واحد في الحرام؟
رد : وهو يعنى الفيلم فيه ايه غير كده .. ده حتى اسم الفيلم " الحرام "
قلت : يعني " الحرام " – كفعل - اللي عملته عزيزة ، ولا الحرام الحقيقي اللي خلّى عزيزة تعمل كده؟
انا سألته السؤال ده .. راح " متنّح " .. ومحطّش منطق وراح قالب الموضوع ، وقام وسابني وهو يردد : زعلان اوي على فاتن حمامة ، ومش زعلان ع اللي ماتوا في رابعة .. والله انتوا ماعندكوا دم!
... ليه انا حكيت الحوار ده دلوقتي ؟ .. لان هذا " الاخ " الغريب " إخواني " زي الكتاب مابيقول .. سيبك من انه قلب الموضوع على رابعة والكلام ده .. هو مجرد بس عايز يعمل فرقيعة والسلام .. انما عايزك تشوف هو واللي زيّه شايفين الفن ازاى .. اولا مفيش عندهم الحس الوجداني اللي موجود بالسليقة عند أغلبية المصريين .. يعني لا أغنية حزينة تبكيهم .. ولا مشهد من فيلم يحرّكهم ، ولا رسمة حلوة لفنان كبير ، على الاقل ، تلفت نظرهم .. همّا زي ماكان رئيسهم بيقول " جلدنا تخين .. مبنحسش " .. اللي ماكانوش حاسين بفوران الشعب كله ضدهم .. وزهقه منهم ومن أفعالهم .. حيحسوا يعني ايه واحدة زي فاتن حمامة تموت ، " موتة تاخدكم كلكم يابُعدا " .. اذا ماكنش فيه احساس اساسا .. وهما لو كان عندهم شويه منه ، كان ده يبقى حالهم.
انا امي كانت بتعشق ام كلثوم وتعشق صوت الشيخ محمد رفعت .. قولوا عليها بقى كافرة ، اذا كانت بتسمع ام كلثوم .. ايه اللي يخليّها تسمع محمد رفعت .. ماهو يا اما دي يا اما ده .. مينفعش .. الاتنين مع بعض مينفعش .. هما شايفين كده ، ولو كانوا اتمكنوا مننا وحكموا وعرفوا يقضوا على 30 يونيو .. كنت تعالى واتفرج على السينما بتاعتنا والمسرح والدراما كلها .. كل ده " كنسل " يعنى امسح واردم .. بلا فن بلا مسخرة .. اجري يابني انت وهو صلي لك ركعتين ، استغفر ربنا على الوقت اللي ضاع وانت بتتفرج على فاتن حمامة وتسمع ام كلثوم.
ومش بعيد نشوف داعش وهى فصيل قذر ممتد من الإخوان وشارب منهم .. مش بعيد  في الأيام اللي جاية ، نلاقيهم بيقطعوا راس واحد بعد ماصلى العصر مثلا .. راح سامع ام كلثوم بتغني سيرة الحب ولا بعيد عنك حياتي عذاب .. وتبقى ليلة امه زرقا لو قفشوه مثلا  بيتفرج على فيلم لالهام شاهين ولا ليلى علوي ، ساعتها حيحسبوهم من المفسدين في الارض الذين تقطّع أيديهم وأرجلهم من خلاف!
الحمد الله انهم غاروا في داهية .. مش عشان كان ممكن يعملوا فينا كده وبس .. لأ .. لأن جلدهم تخين بجد .. لايعرفوا احاسيس ولا مشاعر ولا يحزنون .. ناس " جِبلّة " ، لو الكلام يحرّك الحجر .. هما – ابدا – ميتحركوش!!