بيات ثوري ..!!
حكمة وقالوها أهلنا زمان..عند الإمتحان يُكرم المرء أو يُهان..وفعلا هذا ما قل ودل وجملة خير من ألف بيان..والدليل واضح وصريح وهو ثورة سلمية شعبية قامت بجد في الميدان..قام بيها شعب وأيدها جيش وبفضل الله نجحت لكن حام حواليها الغربان..سماسرة النجاح والثورات وأدعياء الدين المتأسلمون الشاطر منهم والعريان..الثورة نجحت لكن سبحان الله سرقها يهود خيبر ورجعوا بينا ألف عام ولأيام جاهلية زمان..مصر الغالية العالية قعد على كرسي العرش فيها رئيس مأمور لا حول ولا قوة مسكين غلبان..معدوم القدرة والموهبة بيتحرك بالريموت من مكتب مشبوه جبان..لانت مصر وحان قطافها وفعلا قطفها مرشد واللي مخبر واللي إرهابي واللي قتل ودبح ولادنا في رمضان..لانت مصر وهاصت وظاطت جحور الثعابين والزمارين والمطبلتية وأصحاب بواقي الموائد في كل زمان..يا أخي حرام عليكم إيه الظلم ده إعطوهم فرصة مش بتقولوا تداول السلطة أبسط حقوق الإنسان..وسبناهم يحكمومنا سنة مرت كالدهر علينا وإحنا محلك سر وهم يقولوا ليس في الإمكان أحسن مما كان..شفنا إنجازات وهمية ويفط بإعلانات الطهارة والشفافية وتوزيع مناصب زي زمان على أهل الثقة والحرامية وهو ده اللي حصل واللي كان..والغريب مش في كل ده الغريب كان في الشللية وشلة المنتفعين واللي عامل ناشط سياسي واللي بيسفسط بشعارات فين حقوق الإنسان..واللي يبرطم في قناة دينية واللي يشتم في توك شو واللي يتفلسف في حوار بإعتباره فقيه دستوري وهو ياعيني كلامه على قده عايش في التوهان..الثورجية ما شاء الله زادوا وتكاثروا وربربوا على خير حبايبهم أتاريهم الكل في الهم إخوان..ميليشيات الناشطين السياسيين وبتوع الإنسان صالوا وجالوا وطبلوا للحكم المتأسلم الجديد في إتفاقية محبوكة لتجميل صورة جماعة الفيران..راحوا وانتشروا في الإعلام واتسرسبوا في كل وسائل الدعاية زي الديدان..دود الأرض صحي وفاق علينا وحاول يقنعنا بالفوائد العظيمة اللي حتمطر علينا من سماء الإخوان..حتلاقوا العدل والحرية والشقة والوظيفة ومصر مش حيبات فيها جعان..والعيش والحرية والعدالة الإجتماعية حتبقى حق للرجالة والنسوان..والشفافية والمصداقية حتبقى منهاج وحقيقة وسيبك من موضوع التزوير في المطابع الأميرية والحبر السري واللي زوًر واللي خان..والدنيا حتبقى بيس وحيعيش المواطن على طول في آمان..وياريتك ماتفتكرش حته أرض فرطنا فيها ولا حدود سبناها لجيراننا بمزاجنا علشان ليهم دين في رقابنا في هروبنا من الليمان..ومصر ماهي كبيرة وواسعة ما شاء الله إيه يعني 200 متر نديها لإخواننا في السودان..إيه يعني لما نفرج عن قتلة وإرهابيين مظلومين من العصر البائد كل ذنبهم إنهم قتلوا رئيس على كام ظابط على كام عسكري غلبان..خليك إيزي وخليك سبور وبلاش كلكعة وأوعي تكون من قتل شوية عساكر في رفح تكون زعلان..يا عم غمض عينيك شوية ناس ليهم عشم فينا وقتلوا ولادنا بدم بارد وهم صايمين في رمضان..يبقى ليه تنكد على نفسك وليه تعيش مهموم على حال بلدك روًق وعيش بيس يا مان..شفت بعينيك هو ده ملخص اللي انفرض علينا من الناشطين وبتوع المبادرات واصحاب دكاكين مكاتب الحريات وحقوق الإنسان..طنطنة وسفسطة وكلام وهمي عن كل العصور الظالمة اللي قبل حكم المتأسلمين وكأن ما عداهم كفر وهم بس العدل والإيمان..وكأننا كنا نعيش عصور الظلام وربنا كرمنا بعصر النهضة والمن والسلوى وناس طيبين حتكمنا بالشريعة والقرآن..هو ده كان حال الناشطين إياهم والحركات السياسية اللي استأثروا بالثورجة وكأنهم جينات نادرة في أي زمان..هو ده كان حالنا وحال الناس اللي راحوا بالصدفة هناك وسألوا فيه إيه لقوها ثورة وقعدوا شوية في الميدان..لكن خلاص الحقيقة خلاص بانت وكل شئ انكشف وبان..خلاص الشعب فاق وخلاص انكشف الساحر وشعارات الكوسة والباذنجان..مصر رجعت لجذورها والثورة عادت للثوار الحقيقيين الشجعان..مصر عادت من جديد دار أمن وأمان..مهما انتشر الإرهاب ومهما إزداد تطرف أي فكر كافر جبان..!!
الصورة بعد العتق من الخراب والتحرر من هوجة المتأسلمين وكسر قيود الجاهلية..الصورة اتغيرت بعد قرار شعب عظيم وقائد في الظل عظيم رجعنا من تاني لطريقنا ورجعنا نحس صحيح بالكرامة والحرية..لكن يا خسارة بقى فيه ناس مش عارفة إن البلد بقى فيها شعب وثورة بجد وقيادة حقيقية..
الكلام ده حصل وكان شوية اختفى وغاب عن الساحة السياسية..لكن هناك بعض رتوش المحاولات اليائسة لإعادة منظومة المتأسلمين ورجوعنا لعصر الجاهلية..البيات الشتوي للمتصالحين خطة جديدة من طابور خامس راقد في الدرة ومستني غلطة أو غفوة عن خارطة طريق مصيرية..البيات الشتوي للمتثورجين جرس إنذار ومسمار بيدق عاوز جنازة ويشبع فيها لطم المهم يكون في الصورة ويجاور أي سلطة وهي دي القضية..لكن قالوا اللي اتلسع من الشوربة بينفخ في الزبادي ومش كل مره حينضحك علينا ونصدق التمثيلية..مصر فاقت خلاص وعرفت طريقها والحكاية حكاية وقت وينكشف المستور ولا عزاء للناشطين والثورجية..آي والله الله رب مصر رب العالمين حينصر بهية..يارب انصر بهية..!!
Said_elmasryfahmy@hotmail.com