المٌغير وهابيل ..!!

سبحان مُغيِّر الأحوال من حال إلى حال وسبحان من بدل النفوس والقلوب فيها..ارجع بفكرك زمان وافتكر وحدة الميدان وحناجر بتلعلع وبتنادي للحرية وبتصرخ بالروح بالدم نفديها..فاكر زمان لما الوجوه كانت متلخبطة وبالشعارات مرسومة ومتشخبطة ولا كنت تعرف تفرَّق بين أي مصري ومصري لأن الكل كان وقتها واهب قلبه وروحه بس ليها..لا كان فيه مسيحي ومسلم ولا يميني ويساري ولا علماني وليبرالي ولا صوفي أو سلفي وإخواني الكل كان طالع وشايل كفنه على ايده علشان من الفساد يحررها ومن ذئاب السلطة يحميها..كان فيه براءة وكان فيه سذاجة وكان فيه بلاهة لما الشباب صدقوا إن الرفيق اللي شارك في الميدان كان خارج معاهم وفي نيته يبلعها ويلغيها..المهم ومهما كانت النوايا كان الشعب واحد ويد واحدة فرض الإحترام على ثورته والكل كان منبهر بيها..هي دي مصر من أيام زمن الفراعنة والهكسوس والتتار والروم والتركمان وكل واحد كان عاوز يسيطر عليها ويحتل أراضيها..كنا متفرقين ووحدنا مينا وخلى جنوبها مع شمالها وادي جميل يزرع الخير وينشر السلام بين ربوعها وضواحيها..وفضلنا متوحدين طول السنين وباركنا رب الكون برحلة مسيح السلام وبعد دخول الإسلام بنوره ليزيد الحب والمحبة بين أهاليها..الناس في كل مكان شافوا مصر كبيره بوحدة شعبها وتوحد طوائفها من كل الأديان كنت تلاقي الكل بيضلل عليها ويحميها..ساعة الخطر متجمعين ووقت الجد مستعدين نحافظ عليها بدمنا وروحنا ونموت فداها ولا نخلي عدو مهما كان يتحكم فينا وفيها..كنا يد واحدة الشكل واحد والقلب واحد والوطن واحد والإله واحد للجميع بيهدي السكينة والبهجة والفرحة للعباد فيها..راجع تاريخك وشوف ثورة 19 وشوف الشيخ في الكنيسة والقس في المسجد وشوف إلتحام الناس ووحدتهم لأن مفيش غير وطن واحد في بالهم وقلوبهم وعقيدة حب الوطن غلاف بيصبغ لون الوطن بمعزوفة هارمونية بأوركسترا سماوية الكل بيغنيها..أنظر للمشهد بتمرد أو حتى تجرد وشوف إيه اللي بيحصل في المحروسة وشوف أرض " ادخلوا مصر إن شاء الله آمنيين " وخمن مين اللي قسمها وشطرها بسيف الباطل ومين اللي زاد الهم فيها..شوف كم الشهداء ودم الحسيني في الإتحادية ودم الضابط أبو شقرة ودموع أم مثكولة في ولدها وبتهدى روحه لرب رحيم هو أدرى مني ومنك بيها..أحكم بنفسك وشوف مين اللي فرق محمد عن أحمد ومحمد عن مينا ومين اللي حبس ثائر من الميدان وقتل صاحب كلمة حق ووقف يقول ويدعي على ناس معارضة وكبيرهم بيتمم على دعائه ضد شعب ثائر من أهاليها..شوف وراقب ضميرك وأحكم على كل خطوات السلطة والقرارات المتسرعة وسلق القوانين في الشورى في وسط الزحمة قانون بعد قانون للتمكين على مفاصل الدولة ولهطها من مستحقيها..شوف وطوف في أنحاء المعمورة وهات لي حاكم واحد في العالم بيخاطب فصيله وجماعته بس وبيتباهى بيهم وبيكفر معارضيه ودولة بتسجن الأحرار وبتكرم في الصفوف الأولى إرهابييها..!! راجع المشهد كمصري واسأل نفسك بضمير إيه اللي خلانا كده ومين اللي فرق المصريين..مين اللي خلى قلبوظ ملظلظ ينزل من المقطم وعامل فيها عنتر شايل سيفه بيهاجم المعتصمين..إيه اللي خلى هابيل العصر الحديث جايب عصابة حمادة وتوتو ورايح للمثقفين..حبيب رشا خد جزاؤه ورغم كده رايح بيتوعد وبيفضفض على تويتر زعلان مسكين..هابيل المغير راح إعتصام الثقافة علشان يقتل هابيل اللي هو واحد من المصريين..مين دول اللي بيهددوا بالدم وبيزايدوا على رئيسهم وإنه خط أحمر من الجيش والثوار والمعارضين..مين قال إرهابي لسه رائحة الدم في إيديه وبيهدد الأقباط والمسلمين..مين اللي فكك نسيج مجتمع كان جزء واحد أصبح بعد عام واحد من حكم جائر ميت ألف حته مفتتين.. أحكم بنفسك وقول اللي دمر السياحة وزاد البطالة واللي أسقط الإقتصاد مين..التطاول على القضاء مين اللي بيمارسه ومين اللي بيلاحق أي ناشط سياسي من المعارضين..شوف مين بيهاجم ويهدد بلد عربي شقيق صاحب أيادي بيضاء وتلاقى حزبه بيقول وجهه نظر شخصية ورئاسة ودن بس من طين..لما تكون عريان من المبادئ والأخلاق وناكر للجميل يبقى شئ عادى تتطاول على شعب مساند ومؤيد شعب من الأكرمين..لما يبقى محافظ أكثر بلد سياحية في العالم من فصيل دمر السياحة وقتل السياح العُزل بأفكار الإرهابيين..لما تبقى كل محافظة محافظها إخواني حواليها حصار من عامة الشعب إعتراضا على أخونة الدولة وإحتلالها من المتأسلمين المغتصبين..لما تلاقي سفيرة كريهة تبث السم وتضع خطوط سياسة بلد الهرم والنيل وزعيمة العرب وافريقيا وسط سكوت مفضوح وخنوع مهين..الخلاصة فرقتونا ومزقتونا يا دود الأرض يا عشاق السلطة يا عتاه المجرمين..مصر مش كده ولا حيبقى المغير هابيل ولا الثوار هابيل وحيرجعوا لجحورهم مذعورين..اقتل اظلم لفق تُهم واحبس أحرار شعب مصر حيفضل حُر ليوم الدين..لقد خلقنا الله أحرارا ولن يقسمنا حكم ظالم ولا جماعات الظلام والجهل ولن يرهبنا إرهابي متأسلم مدام هناك تمرد لشعب حر مسلمين وميسيحيين الكُل وطنيين..يا أغبى خلق الله إحنا شعب مصر إنتو مييييييين..!! said_elmasryfahmy@hotmail.com