أمبوووووو..!!

في حياة كل أمه يظهر كل مائة عام أحد العظماء في أي مجال يسجل نبوءاته ويسيبها للمؤرخين من بعده علشان في التاريخ يسجلوه..وده شفناه في إمامنا العظيم الشيخ الشعراوي اللي ساب ميراث إيماني عظيم وبرنامج كان الناس بيتابعوه..النوابغ في كل مكان ناس كانت سابقه زمانها ولها فكر ورؤيا مستقبليه وكل واحد له بصمة في كل محفل علم والكل بيذكروه..لكن في بلد النهضة أم الدنيا كان فيه واحد سابق سنه وعصره وكأنه كان عارف اللي حيجرى لينا في أيامنا السوده ديَّة وكانت قصيدته المشهورة اللي كلنا سمعناها بتاعة الواد وأبوه..قبل عصر النهضة بسنين طويله ظهر البروفسير عدويه وكسر الدنيا بأغانيه الحلمنتيشي وكلام أغانيه اللي كل سواقين الميكروباص كانوا بيسمعوه.. عدويه كان عنده وجهة نظر وكأنه حاسس باللي حيجرى لنا في عصر النهضة والوكسة واللي عاد بنا للعصر الحجري واللمبة الجاز وطلمبة الماء وعيدان الشمع اللي الناس رجعوا تاني يستعملوه..عدويه كان له شرف السبق وقراءة الطالع في قصيدته الهادفة الجامحة السح الدح أمبو..أتاريه كان عنده حس وطني ياعيني وحاسس باللي حيحصل للنيل اللي حيلتنا واللي مجراه حولوه..النيل شريان الحياة ومصدر خيالنا ووجودنا وخيالنا وتاريخ في حياة كل المصريين واللي عاشوا معاه وأحبوه..النيل توأم كل خير في مصر وشريك حياة لكل نبته وكل كائن حي فيها والشئ الوحيد اللي إتفق عليه أهل البلد دي جميعا وعشقوه..النيل شَربة الماء وسَقيَّة الزرع وقطرة الندى ومولد النسمة والدم الجاري في عروق واللي أجدادنا عرفوا قيمته وقدسوه..نيلنا العظيم أصل هاميس وأوزوريس وآمون بيتسرسب من بين أيادينا في عصر النهضة المزعومة وقادتها الهواه أرباب السجون اللي فرطوا في قضيتة وباعوه..جماعة الوهم والتأسلم اللي باعوا لنا الهوا في أزايز فرطوا في كل الثوابت من أمن قومي لمائي لغذائي ومرمغوا في الوحل هيبه وطن بيحكموه..جماعة المقطم مبسوطة بأخبار أزمة النيل وسد النهضة وأهي أزمة بتمد في عمر الحكم ولو فاق الشعب يدوروا على أزمة جديدة علشان يلهوه..مذبحة قضاء على خطف جنود على مشكلة أنفاق على إشاعة عزل السيسي على مجزرة وزارة الثقافة على قانون جباية وضرائب على هرولة تشريع في الشورى على بيع البلد بالصكوك على مشروع قناة السويس وياما في الجراب يا حاوي واللي لسه ياما حتشوفوه.. جماعة هواه لكن حواه بيعملوا من الفسيخ شربات مش لبسونا خازوق اسمه النهضة وحاكم من السجن جابوه..مش هم اللي بيفكروا في مصلحتنا وبعد ما نوروا حياتنا بالضلمه ورخصونا وغلوا الأسعار علينا ودلوقت جايين عالنيل وبيفرطوا فيه والشعب حيعطشوه..وكده يبقى فيه إنجاز جديد في كتاب إنجازات الرئيس الوهمية اللي أكيد حيكتبوه..وجفاف النيل فرصة عظيمة لجماعة المقطم في البرنامج الإنتخابي الجديد وده شئ أكيد لازم يستغلوه..النيل لما يجف حتبقى فرصة ويردموه..ويرصفوا مجراه ويخلوه طريق رايح جاي وبكده المرور على الناس يسهلوه..وكمان حيبقى فيه حل لمشكلة التحرش علشان الولاد الوحشين كانوا بيروحوا هناك وبيتمشوا عليه ويعملوا حاجات بطالة يا أخي تصدق بيروحوا هناك وبياكلوا بطاطا ويركبوا مراكب حتى الترمس بيأزأزوه..وبعدين مش حيبقى هناك مشكلة تلوث لأن النيل حيبقى مش موجود لأنه أصلا جففوه..وحتنتهي أسطوره اسرائيل الكبرى من النيل للفرات علشان النيل أصلا حيردموه..وحتسود الشفافية والمصداقية والإعلام الحر لأننا حنتخلص من الإعلام المضلل العلماني المشكك لأن النايل سات حيختفي مع النيل وعمركم تاني ما حتشوفوه..والميزانية حترحرح وتزيد بتوفير مصاريف وزارة الري اللي حتبقى من التراث وحتبقى ذكرى لإنجاز مشبوه..وكده تتحل أزمة الإسكان علشان الشقق عالنيل حتبقى عالصحراوي وترخص وكده حنفرح البنات والشباب حيجوزوه..شفت بقى خطة الإرشاد الجهنمية وشفت جهل الناس بحقيقة نواياهم ومخططهم اللي بيهاجموه..شفت الإجتماع السري المذاع عالهوا اللي كشفت خيبة أهل الحوار وفذلكة مستشاري رئيس هاوي الناس اللي بالصدفة إنتخبوه..شفت الهنا اللي بقينا فيه وتخيل ده بقى حال مصر بلد الخير العطشانة اللي آخرها آمبووو..بلد الحضاره بتجوع وتعطش في ظل منظومة فاشلة ومعارضة عقيمة وشعب سلبى آخره مظاهرة وشعار يشكروا بيه أو يرددوه..أشكري يا إنشراح وملعون أبو الخنوع على الركوع أمام جبروت أي حُكم ظالم مهما كان سطوة اللي خلفوه..ملعون أبوك ياخنوع وملعون أبو كل واحد خلى عروس النيل تقول أمبووو..أيوووووه أيوه أيوووووه وبالأسكندراني كمان وأعلى ما في مكتبكم إركبوووه..مبروك عليك الثورة وعصير الليمون وخليك قاعد في البيت لغاية ما يخرب وطن ثواره ظلموه..أي والله ثواره ظلموه..!!