تَمرَّد..!!

العقد شريعة المتعاقدين..مبدأ قانوني معروف للقاصي والداني والعامة والسادة القانونيين..وده اللي عليه انتخب الشعب رئيسه سواء بالليمون أو الكاتشب والكمون من أجل حياه أفضل للمصريين.. قالوا عيش حرية عدالة إجتماعية ولقينا نهضة وهمية وسُلطة عشوائية وجماعة مغتصبة ديكتاتورية يبقى الثورة قامت ليه ولمين.. قالوا مشاركة مش مغالبة ولقينا توغل وتوحش على كل المناصب بأسلوب المغتصبين.. قالوا حرية وديمقراطية وشفنا شباب الثورة بيزينوا سجون مصر ومحشورين في الزنازين.. قالوا مصر لأولادها ولا للتوريث لقينا مصر لإخوانها والبلد ورَّثوها لأصحاب الولاء والثقة وأولاد الذي والذين..قالوا ورثنا حكم مستبد فاشل وكسرنا قيود حجمت طموحنا ولقينا بلد بتخرج من حفرة لدحديرة وإقتصاد فاشل وبورصة بتخسر بالبلايين.. كانت مصر منورة بأهلها وطيبة شعبها وخلوها ضلمة في كل حاجة والعيشة بقت أسود غطيس والكل على كده شاهدين..شفت ذكرى 5 يونيو اللي إنجرحنا بيها كلنا وشفت كانوا هُم واليهود في شعبنا شمتانين..عمرك شفت سفالة أكتر من كده وعمرك شفت قلوب مليانة سواد وغل وحقد مخزون من سنين..أرجوك أبعد عن المشهد شوية وتجرد من كل انتماءاتك وبدون تعصب فكر في حال بلدك وشوف وصلنا في عام واحد من حكمهم لإيه وبقينا فين..شوف إنقسام شعب اشتهر بالوحدة والتوحيد وشوف إزاي بقينا مقسومين..لاحظ الخيبة وقلة الخبرة وضياع الهيبة محليا وخارجيا وهواننا على كل الأصدقاء والأعداء وبقينا صفر عالشمال في المعادلة الدولية وعن حلفائنا مفصولين..لاحظ تطاول كل من هب ودب على الجيش في سينا والشرطة في كل مكان من البلطجية والمجرمين..شفت ولادنا إندبحوا إزاي بدم بارد وهم بيحرسوا الحدود وهُم صايمين..شفت ولادنا إتخطفوا إزاي ورجعوا في سيناريو كوميدي وعملية سرية وجماعة حاكمة سُكتم بُكتم بتداري على شعبها أسرار الفضيحة متعمدين..لاحظ ضياع روابط المحبة ورصيد العلاقات العربية والإفريقية اللي بناها أجدادنا طول السنين..شفت الأداء الإعلامي الرسمي ووزيره الهمام ومجزرة الثقافة على يد وزير مجهول صاحب التار البايت مع المثقفين..شفت توزيع المناصب والأدوار والوزارات على القرايب والنسايب وأصحاب السوابق والمجرمين..شفت دود الأرض ملوك الإرهاب وسفك الدماء واللي قتلوا رئيس سابق وذبحوا كُتاب وقضاة وضباط وجنود وهُم في صفوف التكريم والمناسبات الوطنية قاعدين مُكرَّمين..عمرك شفت دولة تلاقي كل صاحب دقن وجلابية طالع في الإعلام يهدد بالويل والثبور لكل المعترضين..عمرك شفت نظام بيسمح لأنصاره بمحاصرة الأمن والقضاء وبيناور للإستيلاء على السلطة القضائية للتحكم وتمرير القوانين..أرجوك حاول تكون هادئ وفكر بشويش وإسأل نفسك عن قضية تزوير المطابع الأميرية ومين المستفيد ومين المزورين..إسأل كمان فين اللي عذب الناس عند الإتحادية وبالصوت والصورة وفي التحرير وكل الميادين..شوف الهرولة والبرجلة والمهزلة في مجلس الشورى الوهمي والنهم والهلع والهرولة في سلق القوانين..إسأل نفسك صاحبك وجارك وصديقك الشهيد ودمه اللي راح ببلاش اللي حيدفع ثمنه مين..لو عاوز تعيش طرطور أسكت وطنش واستنى دورك بعد محمد الجندي وجيكا والحسيني أبو ضيف وبلاش تسأل الدور على مين..أسكت وطنش واعمل نفسك مش عارف أو مش فاهم مين اللي حطم بوابات السجون وهرَّب المساجين..حاول تنسى وطنش وبلاش تسأل عن تليفون الثريا والهروب الكبير لأصحاب الفخامة والنيافة اللي أصبحوا بين يوم وليلة عنا مسئولين..أرجوك هدي أعصابك وبلاش تشرب بيريل وانسى الأنفاق والحدود المسلوبة والمنهوبة وكم التهرب وسطوة المهربين..لاحظ عصر النهضة والخطف والسلب والنهب وطلب الفدية لتحرير الرهائن والمخطوفين..لو عند سيارة بلاش تعمل بلاغ أو تتعامل مع الشرطة روح وإدفع فديتها أو دوَّر عليها عند الأنفاق في سينا وهيَّ مع زمايلها على غزة رايحين..أرجوك بلاش تتعصب أو تتمرد وحاول تعيش في الضلمة المفروضة علينا وخلى الجيران يتمتعوا بنورك عليهم اللي أهل بيتك منه محرومين..أرجوك بلاش تتمرد وروح عيش في الأرض البور اللي محرومة من الماء وبتتروي من دموع الفلاحين..أوعى تتمرد وخليك في حالك وشوف السياحة وإزاي خربوها أصحاب النهضة بالضعف الأمني والإقتصادي بفضل حكومة فاشلة من أهل الثقة اللي من مكتب المقطم علينا مفروضين..أوعى تتمرد وكبَّر دماغك هو يعني حيحصل إيه لما تصنيف إقتصادنا يوصل للتصنيف سي ويبقى موقفنا المادي والإقتصادي عالميا في الطين..أرجوك أوعى تتمرد وإقبل بالذل والهوان وانسى مستقبل ولادك وقول وأنا مالي وإديله فرصة واصبر على جارك السوّ ياتجيله مصيبه أو يرحل وأدينا منتظرين..أوعى تتمرد وعيش زي الخرفان وروح خُد البركة من مكتب المقطم وبالمرَّة تتعشى وتشرب شاي بالياسمين..لكن أوعى تنسى إن البلد دي بلد أمن وأمان كتب الرحمن عنها ادخلوها آمنيين..بس إسعى يا عبد وأنا أسعى معاك واللي علينا الكل عارفه وميعاده يوم تطهير أرض الأمان من المتأسلمين..فاضل على الحلو دقة والبركة في تمرد كل المصريين..ياااااااه وحشتنا بلدنا وحشتنا مصر وحشتنا طيبة قلبنا وحشتنا وحدة شعبنا وحشتنا كلمة شعب واحد وحشتنا كلمة