إستاد الإخوان الدولي ..!!!

سيداتي أنساتي سادتي مساكم الله بالخير والبركة وبارك لكم وفيكم أجمعين..أهلي وأحبائي وعشيرتي وكل واحد معاه كارنيه الجماعة اللي اتجمعوا من كل القرى والنجوع وشرفونا منورين.. إلى كل شاب وفتاه وكل واحد كلف نفسه وشرفنا بطلعته البهية وجاهد وحارب علشان يكون من ضمن المعزومين..بارك الله فيكم جميعا وكاد بيكم العوازل واللي عاملين فيها بتوع إئتلافات وقال إيه معارضين..الاحتفال النهارده إحتفال كبير وترسيخ وتأكيد لمشروع النهضة اللي قاد الأمة لنصرنا اللي صنعناه وحققناه بعرقنا وجهدنا طول السنين..والغريبة إنه الحق بيصادف أهله وربنا أظهر الحق ورجع من تاني لينا فضل تحقيق نصر أكتوبر المبين..وأهو كله من ثمار ثورة يناير اللي خلت العالي واطي والواطي عالي وكله عند الثوار صابون زي ما أنتم عارفين..المهم إحتفالنا النهاردة مش أي إحتفال وليلة ولا ألف ليلة لأن ده أول إحتفال بنصر أكتوبر يشرفه أصحاب النصر الحقيقيين..اللي حاضر النهاردة في إستادنا الدولي هم الأبطال اللي عانوا وصبروا وخططوا للنصر ده طول السنين..الكوكبة الموجودة دي ناس عانت وكافحت في السراديب والسجون علشان تخطط للنصر ده بس أنتم مش واخدين بالكم بسبب الإعلام الضال في عصر الفساد والمفسدين..اللي في المقصورة والمدرجات دول هم أصحاب النصر واللي حطموا خط بارليف وهم اللي فتحوا نفق شبرا وكمان خط المترو الرابع من حلوان للتبين..لو أنت داخل الإستاد ياريت تقرأ المعوذتين وتقول يا ساتر وتدخل برجلك اليمين..ولو عايز تحضر الإحتفال أصلا فيا أهلا ومرحبا بس لازم ولا بد تكون من أحبابنا وعشيرتنا يعني من الآخر تكون معاك تصريح من مكتب كبيرنا في المقطم ومعاك ورقة التعليمات والتلقين..لو دخلت خلاص حتلاقي لجنة من بتوع التنظيم والإرشاد علشان يدلوك حتهتف إمتى وليه وإزاي وكمان حتقعد فين..لو قعدت مكانك ياريت تاخد بالك وعينك تبقى على السيد مرشد الحفل وراقب حركة إيديه وحاول تقلده لأنه هو مايسترو الحفل وهو دليل السادة الأفاضل الحاضرين..لو بصيت في الأستاد حاول تستفيد وتغير معلوماتك وسوء فهمك وتتعرف على أبطال النصر الحقيقيين..بص ودقق كويس وشوف جنود النصر اللي حققوا أكبر نصر لمصر ونرجع من تاني ونقول لأن التكرار بيعلم الإخوان زي ما أنتم عارفين..الناس الحلوة دي اللي في المدرجات سُلالة أصحاب إنتصار بدر وحرب رمضان المجيدة واللي خرموا الأوزون في التحرير وكمان حطموا خط بارليف المنيع المتين..بص عالمقصورة حتلاقي السيد رئيس البرلمان المخلوع بجانب رئيس الشورى وكمان السيد نائب الرئيس اللي إختارناه بالتعيين..بص وشوف ودقق وأوعى فكرك يروح لبعيد وتفتكر إن دول قواد الجيش اللي حارب أو حقق النصر لأ يا بابا لأ يا بابا اللي بالي بالك دول هناك في بيوتهم قاعدين..اللي بيقولوا عليهم دول أنهم حققوا النصر يا إما تحت الثرى شهداء يا إما مُحالين للتقاعد أو محسوبين علينا مستشارين..أوعي يغرك جسمك أو حتى عقلك وتقول أن اللي قاعدين في صدر الإحتفال دول هم اللي صنعوا النصر لأ يا خفيف لأن اللي شاركوا في النصر حسب شرعنا وقانوننا بقوا خلاص معزولين..مش فيه نورماندي1 ونورماندي2 يبقى أكيد فيه أكتوبر 1 وأكتوبر2 بس من غير اللي عاشوا اللحظة وبقوا منسيين..مش قالوا الأيام دوّل ورجال يبقى ناس تحارب وتنتصر وناس تعزل وتحتفل يبقى ليه تتعجبوا وليه مستغربين..لو إنت قاعد في المقصورة حتلاقي نفسك قاعد بين كوكبة من حزبنا اللي كله حرية وعدالة وحتلاقي ضحكاتهم ملعلطة وقاعدين يقرصوا نفسهم وكأنهم ياعيني مش مصدقين..لو لفيت بعينيك في المدرجات حتلاقي واحد بدقن أوعي تبقى عبيط وتفتكر إنه إبراهيم الرفاعي أسطورة الصاعقة وأمير الشهداء واللي دوخ اليهود من حرب النكسة حتى حرب ثلاثة وسبعين..وأوعى تفتكر كمان إنه عبد العاطي حامد صائد الدبابات واللي حطم لوحده 23 دبابة للصهاينة المجرمين..أو أوعى تروح لبعيد وتظن إنه الجنرال الذهبي عبد المنعم رياض اللي استشهد في أرض المعركة بغدر المحتلين..أو أوعى تغلط وتفتكر إنه الشهيد أحمد حمدي اللي استشهد فوق الكوبري اللي كان بتعدي عليه قواتنا للعبور لتحرير الأرض الطاهرة من الحثالة المغتصبين..الراجل اللي قاعد ده شارك في تحقيق النصر وكمان في تكريم صاحب قرار الحرب وصاحب نصر أكتوبر بالتخطيط لقتله مع مجموعة مميزة من إخواننا المجاهدين..على فكرة إحنا عاوزين نكرم أنور السادات وأخوه الشهيد عاطف بس حصل خطأ في كارت الدعوة وجل من لا يسهو ودي مش غلطتنا دي غلطة الطباعين..لكن وجود السيد الزمر المخطط لإغتيال السادات دليل على سماحتنا ويا بخت من قدر وعفي وربنا بيسامح يا أخي ليه إنت كمان ماتكونش من العافين..بانوراما إحتفال أكتوبر صدقني كتير مسلية وبتؤكد أن الدوام لله وهي كانت دامت لمين ..لكن لو تلاحظ أنه راعينا الحالة الإقتصادية للبلاد ووفرنا المصاريف بعدم توجيه الدعوة لأصحاب الفكر والقلم وقادة الجيش اللي حاربوا بجد والسادة الفنانين..وكمان رحنا واستلفنا سيارة قديمة كان بيركبها صاحب قرار النصر علشان الزفة الخاصة بصاحب نصر أكتوبر حسب إعلان تهنئة مسئولى البترول اللي يا عيني قالوا عليهم منافقين..الخلاصة دي عينة من اللي كان واللي حيكون ودي سياسة جماعة الخير زي ما أنتم فاهمين..المهم سهرة سعيدة وربنا يديم الأفراح وكل أكتوبر وأنتم طيبين..سهرة سعيدة وتصبحون على خير وميعادنا في 23 يوليو اللي جاي علشان نقعد ونحكي ذكريات الإخوان الأحرار اللي قاموا بالثورة ضد الملك فاروق وأمموا القناة وبنوا السد العالي وطردوا المستعمرين..هو ده التاريخ وهو ده الشاي بالياسمين بس ياريت تفهموا يا مصريين..!!!                                            said_elmasryfahmy@hotmail.com