جمهورية كفر الغلابة للمغتربين..!!

كانت البداية زي أي بداية في أي فيلم تجاري من الأفلام العربية..البطل يا عيني بيعاني والبطلة تهرب من أهلها وسكوت حنصور وتدور الأحداث بقصص كتير تافهة وبعيدة عن الواقعية..المهم في الآخر تلاقي الفيلم إنتهى والبطل فاز بست الحسن والجمال وراحوا يتمشوا على النيل في لقطة كتير رومانسية..هي دي النهاية اللي بنشوفها في الأفلام لكن اللي بنشوفه في حياتنا بجد شئ يفوق الخيال ومغموس في الهموم اللي بنعاني منها بصورة واقعية..أتاري الدنيا صعبة والمواطن يا ولداه مطحون بين الرحايا بين هات وخد وتعالى وروح وأسعار ملهلبة وطناش مسئولين عن مهمتهم الرقابية..المواطن عندنا يا ولداه طول عمره حقل تجارب من مسئوليه بيجربوا فيه كل النظريات الوهمية..من أول ثورتنا المجيدة في الخمسينات شفنا وجربوا فينا كل المراحل الحلزونية..من إنغلاق حتى إنفتاح ومن نظام عسكري لنظام متأسلم والنتيجة سمك لبن تمر هندي على أداء سياسي مغموس بالملوخية..عشنا كل المراحل مع كل الأسماء وعانينا من تجاربهم فينا وإحنا لا حول ولا قوة ولا رأي لينا في القرارات المصيرية..كبت سياسي وعجز إرادة لغاية ما بلعنا في يناير حبات الفياجرا الثورية..لكن للأسف حبات فياجرا الثورة أصابت الكل بهيجان سياسي وإسهال في القذف والترصد للأخر بالدفاتر القديمة والحصاد في النهاية أداء باهت وفشل إقتصادي وسفسطة سياسية..الخلاصة هو ده الحاصل واللي حيحصل في المحروسة من غير تشاؤم ولا أي وجهة نظر شخصية..تقوم ثورة أو يتبدل ألف نظام حكم الحال زي ما هوّ مع إختلاف الأساليب والشخصيات وهو ده للأسف قدر ومكتوب علي جبين المحروسة بهية..!! علشان كده فيه ناس قرأت الطالع من زمان وغيّروا حياتهم واتخذوا القرار..راحوا وسعوا في بلاد الله مع خلق الله علشان يجملوا حياتهم ويبنوا مستقبل ولادهم ويحموه من الإنهيار..وعاشوا في بلاد الغربة يحفروا في الصخر ويتحملوا كل أنواع الصعاب بمختلف ألوانها أبسطها الغربة والبعد عن الأهل والأحبة وصبروا وواصلوا الصمود ليل ونهار..كل واحد مغترب وراه قصة وحكاية كفاح منسية للأسف مش موجودة في الأخبار..المغتربون المصريون قصة نجاح جميلة وصادقة وأساتذة في الإنتماء لوطن فيه ناس كتير جواه قدام المصاعب بيقولوا يا فرار..لكن للأسف الشديد لقوا مسئولين مش حاسين بيهم ولا بيقدروا كفاحهم وبينظروا لمشاكلهم بكل إحتقار..المغتربون المصريون بيتعاملوا من مسئولى بلدهم بالإهمال والسلبية وكأنهم سبايا عند مقاول أنفار..مين قال التفرقة العنصرية بين المواطن هناك والمواطن إبن الجارية ( الجالية )في أي مكان في الغربة يبقى بطريقة فاقوس وخيار..مين قال المغترب يتعامل في بلدنا أو سفاراتنا وكأنه بقرة حلوب مالهاش حقوق  وكأننا شقة مفروشة بالإيجار..عيب قوي وطن محترم عمره 7 آلاف سنه يعني بلغ سن الرشد يتعامل مع أولاده في الغربة بكل سلبية وتبقى علاقتنا بالوطن زي المشتري والسمسار..المغتربون المصريون حقهم مسلوب ومنهوب في كل المجالات من أول مجزرة التنسيق لطلاب الثانوية لغاية حق التصويت اللي لغاية يناير يادوب أخدوه بالإجبار..معقول حوالي 10 % من عدد السكان يبقوا في طي النسيان من غير أي حقوق بإهمال متعمد وكأنهم من كوكب تاني أو كائنات غريبة من الأشرار..!!                                      المغتربون المصريون في كل بقاع الدنيا مُفترى عليهم من كل المسئولين ..في سفاراتهم وفي كل المؤسسات بيتعاملوا بدونية في الحقوق فقط أما الواجبات فرضينها عليهم مجبورين..سفارات لا بتاخد حق ولادها ولا بتتابع مشاكلهم ولا بتحاول حلها وعن أحوالهم مغمضين..فلوس تصديقات وقانون جمارك بلطجي ولو مش مصدق راجع النظام الجمركي الظالم اللي غصب عننا بندفعه مجبورين..روح وشوف خيرة شباب البلد وزهرة شبابنا أبناء الثانوية العامة اللي من التنسيق مدبوحين..بنقولها وحنقولها مليون مرة حرام عليكم يا ظلمة مين قال طالب  ب 98% يبقى من الفاشلين..مين قال 10% من تعداد السكان يبقى نصيبهم 5% في الجامعة بالذمة ده يبقى في شرع مين..إحنا بنطالب بحقنا وحق ولادنا في الجامعات والجمارك وكل شئ لأن ده حقنا مش منة من أي واحد إبتداء من الحاكم للسفير لأصغر واحد من المسئولين..يا أي مسئول عننا إتقي فينا ربنا إحنا عاوزين حقنا وال 10% حق مشروع لينا بكل اللغات والقوانين..المعاملة بالمثل حق شرعي ونصيب قانوني لينا لازم تبصموا عليه وتقروه في الدستور السري الجديد اللي بيألفوه المتأسلمين..أنا نفسي أعرف إيه دور السفارات وإزاي يتحججوا أنهم بينفذوا قوانين عليا وأنهم لا حول لهم ولا قوة طيب يبقى إيه لازمتهم وهم بيمثلوا مين..ممثلوا السفارات لازم يكونوا حائط الصد والمنادين بحقوق الجالية مش مجرد بصمجية وموظفين..ياتجيبوا حقنا يا تروحوا هناك جنب أصحاب المعالي اللي من المفروض عننا مسئولين..مش بيقولوا مفيش حاجة إسمها أقلية ولا مسلم ولا مسيحي أمال ليه بتعاملونا كأقلية وتنهبوا حقنا يا ناس يا مفتريين..الخلاصة يا تجيبوا حقنا يا ترحمونا من أي إلتزامات وتعتبرونا زي ثوار أيرلندا اللي عن وطنهم منفصلين..أنا عارف بتقولوا ياريت لكن ده بعيد عن شنبكم إحنا فوق قلبكم قاعدين..ده وطننا وده إختيارنا ولو دامت لغيركم من زمان لا كنا عمرنا شفناكم ولا كنتم أصلا موجودين..ملعون أبو العنصرية على السلبية على كل اللي أقسموا إنهم عن الرعية مسئولين..لو أن شاه تعثرت بأرض العراق لسأُل عنها عمر الله يرحم أيام الراشدين..بغلة مجرد بغلة ربنا حيسأل عنها الوالي فما بالك بألاف الطلبة اللي من التنسيق مدبوحين..رعايا كفر الغلابة المغتربين فاض بيهم الكيل خلاص وللعدل منتظرين..الظلم واضح وفاجر لكن تعمل إيه في حظك الدكر لما ربنا يرزقك بمسئولين ودن من طين والتانية من عجين..الله لا يسامح كل ظالم ولا أي واحد حاقد ناهب لحق المغتربين..اللهم آميييين .. اللهم آميييييين...!!!                                                                 said_elmasryfahmy@hotmail.com