متفق معاك تماما

الحكومة المصرية لازم تعرف ان احد اسباب نهوض الاقتصاد هم المغتربين ولا هما عايزيين عمله صعبه وخلاص انا شايف لازم نقوم بعمل ايجابي لتحريك الحكومة زي مثلا نعمل إتتلاف لجميع المغتربين في الكويت نعلن فيه ان مافيش ولا مغترب يعمل اي تحويلات بنكية لمصر ولا شراء اي شهادات استثمار باللعملة الصعبة .ولة ده حصل على مستوى الكويت وعلى مستوى كل المغتربين في جميع اجزاء العالم والحكومة تحتاس في ايجاد العملة الصعبة سوف تعرف الحكومة اهمية المغتربين وتقدرهم كما هو الحال في جميع البلدان.هل تعرفون ايها السادة ان تونس تعطي لمن تغرب اكتر من خمس سنوات الحق في انزال سيارة بدون جمارك تكريما له . اين نحن من ذلك لابد ان يعرفوا قيمة ما نؤيده من دور في توفير عملة صعبة واقاذ البلاد من الافلاس اهذا هوا جزاؤنا . لابد من ان نتحد لمغتربين حتى نكون قوة يعمل لها الف حساب

تحية الى الأستاذ سعيد فهمى والله العظيم كأنك ماسك مشرط وعمال بتقطع الهموم اللى الواحد شايلها على ضهره من يوم ما اتغرب من 10 سنوات انا عندى بنت 3.5 يعنى لسه عيله بس من كتر مباسمع على اللى بيحصل لأولاد المغتربين انا مخى ضرب وبقيت مش عارف تدرس منهج مصرى والا باكستانى ولا هندى لأن طبعا الأمريكى والبريطانى مش لينا وفى الاخر حتتشحور فى التنسيق اللى مايعرفش التنسيق يعنى اسم على غير مسمى المهم كلامك عن الحكومات المتعاقبة بديع وواقعى بس نعمل ايه مصر دى من يومها مالهش اهل يعنى يتيمة الأم والأب ييجوا المماليك يحكوموها ماشى مع انهم مش مصريين خالص بعديهم العثمانيين ماشى وايه كمان يبعولنا مسلسلات تركى فى الوقت الحاضر بعديهم الحج محمد على باشا ابو ابراهيم مش مصرى برضه ولما مسكها مصريين عبد الناصر وعبد الحكيم اول من قمعوا كان اهلهم المصريين بعدين بلدياتى المعلم الحج السادات اللى خربها وخلاها سداح مداح وقال ايه مسميه انفتاح بعدين المبدع الملهم القائد الركن المهيب صاحب الضربة النيلة اللى كرهت الواحد فى القوات الجوية السيد المخلوع الغير محاسب المرفه نزيل الفنادق المسماه فور طره ثم السيد المهيب زينة شباب النجع الأخ جمال ابو مبارك ثم ثم الدقون البيضاء والسوداء (على فكرة انا بدقن برضه) عشان محدش يقول بتتريق على سنة الرسول صلى الله عليه وسلم واللى فى الأصل لازم تكون فى السلوك والتعامل اما سفارتنا فى الخارج وعلى فكرة انا لى عشرة سنوات فى الخارج مابين الامارات والكويت فحدث ولا حرج عارف انا مسميها ايه وبحفظ بنتى الأسم مسميها الصفارة يعنى اهى حاجة ليها صوت بس العجيب انك اول لما تدخل اى صفارة مصرية تلاقى برواز بالحجم الكبير يعنى تلات تدوار مكتوب فيه الصفارة لاتدفع اقامات الفنادق الصفارة لا تدخل فى اة منازعات مع الكفيل الصفارة لاتدفع مصروفات تذاكر الطيران حوالى 18 بند محصلتها النهائية ان الصفارة مابتصفرش ومش حتصفر الا مع طلوع روح اخر المصريين بالخارج حيث بعدها تكون ادت مهمتها وبعدين انت فاهم الصفارة غلط دى عملها النظام فى مصر عشان اللى يفلت من مصر ويسافر بره يعرفوا يسقوه المر اللى فى مصر عن طريق الصفارة كلمة اخيرة نفسى يضيفوا للبرواز اللى فى مدخل الصفارات المصرية بالخارج بند كمان اخوكم مزنوق فيه اوى - الصفارة لا تتقاضى اية رسوم على تصديق الأوراق الخاصة بالمواطنين الأسرائليين

والله مش عارف اقولك ايه يا عم سعيد كلامك كله مرارة وعلى شوية كنت هبكي... عارف ليه لاني تخيلت اللي انت عايش فيه عشان ولادي هنا في مدارس الكويت بس لسه ابتدائي وتخيلت ان الحال لو فضل على كده ولهم نصيب يكملوا هنا هيحصل معاهم نفس اللي بيحصل مع كثير من ولاد المصريين... بس لازم يكون فيه وقفه مع الموضوع ده... أنا اقترح تكوين فريق من 5 اشخاص وأنا أولهم (رغم اني بعيد نوعا ما عن المشكلة) وينزلوا مصر يقابلوا اي حد من المسئولين أو حد يعرفنا رقم اي قناة فضائية من القنوات والبرامج اللي مصدعانا ليل ونهار ونعرض المشكلة وكل مشاكل المصريين بالخارج من تعليم وجمارك وبهدلة وكل حاجة وكمان نروح نحاول نقابل الريس... شكلي باحلم صح؟؟؟ ولا حتى الحلم أصبح محرم علينا.... أنا أتمنى من كل واحد ابنه تضرر من هذا الوضع انه ياخد موقف لان عصر السلبية انتهى روحوا اعملوا وقفة احتجاجية قدام القصر الجمهوري او رئاسة الوزراء من غير كده محدش هيسمع صوتكم ولا يحس بيكم وحسبنا الله ونعم الوكيل في كل مسئول ساكت عن الحق وخصوصا سفارتنا في الكويت اللي كل همها جمع الفلوس مننا... ايه يعني ورقة اوثقها من القنصلية ادفع عليها 8 دنانير وايه يعني اجدد جواز سفري بأكثر من 30 دينار... هي قنصلية ولا مؤسسة استثمارية... للأسف الثورة لم تصل لهؤلاء وحسبنا الله ونعم الوكيل مرة تانية وربنا معاكم ومعانا هو القوي الكبير قادر على كل شيء ما بقي لنا سواه ندعوه أن يزيل الغمة ويكشف البلاء اللهم آمين.

في سنة الفراغ حدث ولاحرج وحسبي الله ونعم الوكيل في اللي حصل لي ولغيري منك لله ياأستاذ قلبت عليا المواجع