fiogf49gjkf0d

أولاد الجارية (الجالية)..!!

نيابة عن كل مغترب من أرض المهروسة ( المحروسة ) أتقدم بخالص الحزن والأسي عن كل شعار إتعلمناه وعشقناه عمياني بغباء..والحق مش على اللي علمنا لكن الحق علينا إنه صدقنا إن فيه وطن بيخاف علينا وغصب عن عين أبونا لازم ندين له بالتبجيل والإنتماء..ونظرا لأننا على نيتنا وبنصدق كلام المسئولين عننا واللي بيعاملونا إحنا والبقرة الحلوب سواءا بسواء..السادة المسئولين عننا كمغتربين نسوا أن المواطن المغترب المسكين بقى هو وأولاده زي البطة السوده مش مستاهلة إهتمام ولا مجهود وعناء..حكومات متعاقبة ودايرة علينا داير مايدور وسواء كانت حكومة حزب وطني قديم أو حزب وطني متأسلم فالإثنين بيعاملونا زي الخرفان يدبحونا من غير حتى مانقول مااااء..وقلناها من زمان مش مهم إحنا ولا مهم غربتنا المهم مستقبل ولادنا مايضيعش كده في الهوا هباء..اللي حصل وبيحصل كل عام في مجزرة تنسيق الشهادات المعادلة دليل على البلطجة الحكومية واللامبالاه بأهم قطاع من المواطنين وصفاقة وبجاحة وإفتراء..الإصرار عل التضييق ومحاولة حرمان ولادنا من دخول الجامعات الحكومية وإجبارهم لدخول الجامعات الخاصة قرار ظالم وغير دستوري ودليل على العنصرية والغباء..التضييق على ولاد البطة السودة المعروفين بالمغتربين في دخولهم الجامعات الحكومية بيلغي من القلوب والعقول أي معنى للإنتماء..شعارات بنقراها عن الإهتمام بالمغتربين ولجان وهمية لبحث مشاكلهم ولجان وزارية وحوارات بيزنطية وقيادات بمختلف الأسماء..مسئولين عاملين زي البغبغان وقاعدين يعلمونا في الندوات والمدارس والكُتاب يعني إيه حُب الوطن وإزاي تساعد بلدك بكلمات كتير وطنية وكمان متغمسة بحروف من الألف للياء..حكومتنا منها لله عاوزانا مجرد جدار وإنت هناك شغال في الغربة بتنحت في الصخر زي الحمار وتدفع ضرايبك وكمان جمارك خصوصياتك وتوفر مكان في وظيفة أو كرسي في مدرسة وتجيب عملة صعبة وترسلها وإنت على نياتك بكل الحب والصفاء..ناسيين ناس في الغربة بتموت مش لاقية ثمن الصندوق وسفارة بتستعبط وتمص دمنا بفلوس تصديقات وفلوسنا بتضيع هباء..وناس بتمرض وتعاني من غير رفيق ولا حد حاسس بيها عايشين محرومين من كل المشاعر إلا الظلم والحرمان والجفاء..فيه ناس بتعيش من غير عمل وعمالة موسمية يوم فيه وعشرة مفيش والغربة مُرة أكيد وتعب وشقاء..وناس بتغيب عن أهلها سنة بعد سنة مجبورة يا عيني من قلة مفيش أو تعنت كفيل أو معاملة غير أدمية والناس مضطرة للإستمرار وشايفة الغربة أرحم من وطنها وعلاج ودواء..بعد كل العذاب ده ولو أمك داعية عليك وعندك إبن في الثانوية فعليه العوض ومنه العوض لأنه من غير أمل وعشم إبليس في الجنة يدخل جامعة جكومية حتى لو في أدغال سيناء..لأننا كمغتربين بيعاملونا كمواطنين درجة رابعة زي المهجرين الفلاشا في دولة إسرائيل الشقيقة حسب إتفاقية العار والغباء..يبقى بعد كدة ييجي واحد ويقولك ما شربتش من نيلها أو ما دخلتش جامعاتها يبقى البعيد غبي زي كل مسئول دبح أولادنا وحرمهم من مصريتهم وكأنهم والعياذ بالله أذى ووباء..وتقوللي وطن يا أخي ملعون العنصرية على الحقد والغل على كل كلمة في القاموس بتدل على الإنتماء..!!                          
 
والسؤال دلوقتي للسادة السفراء اللي من المفروض بيمثلونا إنتم ليه لسة قاعدين..مدام ولادنا ولاد الجارية (الجالية) بتحرموهم وتحرمونا من كل حقوقهم وحقوقنا يبقى أنتم بتمثلوا مين..هو يعني حفلات الإستقبال والإستهبال عمال على بطال هي اللي حتحل مشاكل المغتربين..هو مين اللي مسئول عننا وعن ولادنا واللي من المفروض ينقل شكوانا للراجل الكبير نيابة عن الغلابة المغتربين..هي ليه حكومتنا بتفتح سفارات في كل البلاد وهي عارفة إنها لا بتحل ولا بتربط في أي مشكلة لرعاياها المظلومين..مين المسئول عن ضياع أحلام أولادنا ومستقبلهم اللي إتنهب يرجع إمتى وفين..قالوا ثورة وقالوا عدل وطلع زيد زي عبيد وأحوالنا بتسوء من غير أي رد فعل من المسئولين..لما إبنك يجيب 98% ومايلاقيش كلية يبقى العيب فيهم وللا فينا علشان علمناهم وربيناهم وللا العيب في مين..لما التنسيق يتأخر أسبوع ويبقى كله غلطات ومفيش محاسبة وكأننا رعايا بوركينا فاسو أو جزر القمر وكأن ولادنا للوطن مجرد منتسبين..لو إبني سألني يعني إيه وطن ويعني إيه إنتماء ويعني إيه حق ويعني إيه مواطنين..يا ترى الإجابة حتكون إيه ومين حيبقى مسئول سلطة فاسدة زالت وللا واحد مسئول من المتأسلمين..مش بيقولوا المصريين يد واحدة مسلمين وميسيحيين فياريت يضموا ليهم كمان الغلابة المغتربين..يا تري نروح على سفاراتنا المصرية ونقدم طلب جنسية مصرية زي إخواننا الفلسطنيين..مع إن حسب شهادات الميلاد ولادنا من أب وجد مصري وكمان من مصريات متجوزين..يا عم رووووح وإخبط دماغك في الحيط مدام كل المسئولين بدون إستثناء ودن من طين وودن من عجين..بالذمة مسئولين بالشكل ده ربنا ولاهم بالصدفة علينا وخانوا الأمانة وظلمونا يبقوا فعلا بني آدمين..!! الخلاصة  المغتربون في الأرض جزء أصيل من نسيج المجتمع مش قطيع بقر بتحلبوه وتمصمصوا عضمه وفي الآخر ترموه وكأنه زي خروف الضحية في العيد الكبير... مفيش دولة بتحارب ولادها بالشكل ده ولا فيه مسؤول مهما كان من حقه حرمان ولادنا من حق الاختيار وتحديد المصير... أي مسؤول مش قادر على وظيفته ولا عارف  دوره ايه لازم يتوكل على الله ويفارقنا غير مأسوف عليه من غير تأخير..دم ولادنا في رقبتكم كلكم من غير إستثناء وحقنا حيرجع حيرجع وده حكم العدل والسماء واللي فوق الكل الله الجبار القدير..!!                                                                 
اللهم آميييين..اللهم آمييييين..!!                                                                
 said_elmasryfahmy@hotmail.com