الشيخ كُفتة ..!!!

قالوا في الأمثال "إدي العيش لخبازه ولو حياكل نُصه..ودي أكيد حكمة بديهية..علشان كده بتلاقي الطبيب بيشتغل في الطب والصحفي بيكتب مقال والسباك بيصلح الحنفية..لكن اللي بنشوفه اليومين دول شئ عجيب وشكل استثنائي من الجهل وعدم المفهومية..السباك بقى بيتكلم في الطب والسياسي بقى يفتي في الدين وأصحاب العمامة بقوا يفتوا في السياسة بطريقة زار أهل الذكر وحلقات الفتة والملوخية..مش قالوا ثورة!! خلاص يبقى كل من هب ودب يخرج علينا بفتوى ظاهرها الصالح العام وباطنها النفاق ومجاملة الحاكم وتصويره كأنه نصف إله والمعصوم من الخطأ والحكيم والعادل وده نفاق شفناه مع كل حاكم للمحروسة بهية..!!الناس في بلادي بقت فريقين واحد بيهادن إخواننا إياهم بإقتناع أو بنفاق وكمان يتقي شرهم ويبقى له نصيب في التورتة السياسية..وناس مش بالعة جماعة الخير وعارفة بخبايا الأمور وفاهمة كيف تكون ديكتاتورا وتهبر السلطة بالقانون أو البلطجة أو بأي طريقة بهلوانية..الناس محتارة وعايشة صراع لقمة العيش وعدم الإستقرار والدنيا بقت ضلمة من الكهرباء وسودة من التصريحات والصراعات السياسية..الناس شايفة ضباب وعدم استقرار وهيبة حكم إختلط فيها الحابل بالنابل وتطاول غيرمسبوق على الحاكم بحجة حرية الرائ والديمقراطية..إحترام الحاكم واجب بشرط أن يكون عادلا ومهما كانت فصيلته وأن يكون حاكما للجميع ومترفعا عن الإنحياز لأي فصيل سياسي أو ديني أو أي جماعة همايونية..هناك خيط رفيع لازم الحاكم الجديد يقطعه وتوضيح أنه رئيس لكل المصريين مش لفصيل بعينيه نجح في نفور الناس من الحُكم ومزج قرار قصر العروبة بأراء وتحليلات السادة الإخوانجية..الإختلاف السياسي مقبول لكن المرفوض فتاوي كل من هب ودب ومنافقة الحاكم وتحفيزه على معارضيه ووصفه بالألقاب المثالية..كلنا عشنا وشفنا شعارات ناصر يا زعيم الأمة وقاهر الإستعمار وقائد الأمة العربية..وسمعنا كمان يا سادات يا بطل الحرب والسلام ومحرر سيناء وقول يا سادات اللي كلامك حكم في كل الأغاني الحماسية..وسمعنا شعارات مبارك بطل حرب أكتوبر وصاحب شعار الكفن مالوش جيوب وصاحب الضربة الجوية..الدور على الحاكم الجديد والمحاط بكتيبة من الإعلاميين ورجال دين ملكيين أكثر من الملك وعزلوا الحاكم بجدار من الشك عن الرعية.."عاش الرئيس مبارك" ثم "عاش الرئيس مرسي" عنوان لكاتب مدمن تطبيل لكل حاكم وكأنه ناسي أن هناك أرشيف بيفضح النفاق الفج الممزوج بقلة الأصل والوصولية..واللي يقول مرسي آيه من آيات الله وذهابه إلى مكة إسراء وعودته منها معراج فيا ترى ده نفاق وللا تخاريف صيام وللا حلقة من مسلسل النفاق الممزوج بالإزدواجية..لما نائب بالشورى يساوى بين فتح مكة وإلغاء الإعلان الدستورى بالذمة إيه جاب فتح مكة للإعلانات الدستورية..لما عضو بلجنة الفتوى بالأزهر الشريف يهدر دم الناس وينادي بقتل المتظاهرين المعارضين لأسلوب الحكم وسيطرة فصيل بعينه على الحكم ووصفهم بالخوارج فهل هذا كلام عالم دين أم كلام بلطجي أو قاطع طريق بينافق حاكم بهدر دم الرعية..لما نائب المرشد يوصف المخالفين لجماعته بأن قلوبهم فيها ضغينة وعداء للإسلام يصل للكفر وكأن الإسلام نزل على جماعة الخير بصورة حصرية..لما رئيس حزب متأسلم يطالب بإلغاء المحكمة الدستورية وإعادة مجلس الشعب بتركيبته المضحكة والقبض على الداعين للتظاهر وأنهم محرضين ضد الشريعة ووصفهم بالكلاب فهل هذا يليق برجل دين أو سياسة وللا كلام واحد من البلطجية..لما شيخ هربان رغم الإفراج الرئاسي عنه وجُرم تهمته ينادي بمعاقبه كل معارض للحاكم ويؤيد فتوى قتل المتظاهرين وإهدار دمهم بمنتهى الهمجية..أما مولانا الشهير صاحب اللسان الطويل بالأسكندرية وقد أفتى بأن معارضة الحاكم هي معارضة لحكم الله وطاعته فرض على الناس كطاعة الله ورسوله وأن حكم الإخوان هو حكم الله وأنهم لايمثلون الإخوان بل يمثلون الذات الإلهية..بالذمة ده يبقى كلام ناس أصحاب دين وللا كلام مصاصو دماء عاشقين لحكم السيف والهمجية..مش قلت لك سمك لبن تمر هندي وفوضى وسوق رخيص للنفاق وأيام بندعي ربنا يعديها على خير ويرحمنا من فتاوي شيوخ الكفتة والطرب واللي بيحللوا حتى الدم لإرضاء جماعة بعينها خرجت علينا في ساعة نحس ولهطت السُلطة في لحظة درامية..الشيخ كفتة هو عنوان المرحلة الجايًة واللي أراد ربنا يخلص بيها ذنوبنا لأننا استسلمنا وتركنا مصيرنا لكل حاكم سابق أو حاضر يتحكم في مصيرنا ويحكمنا بشمولية..إحنا مش مش مشكلتنا رئيس منتخب ولا مشكلتنا جماعة متأسلمين لكن مشكلتنا وقضيتنا كل شيخ كفتة بينافق الحاكم ويهدر دم المحكوم والنهاية المواطن هو الضحية..الدنيا بتتغير وإحنا محلك سر ولو حتى مهما كانت ثورة أو فوضى قول زي ما أنت عاوز المهم يا تعيش بكرامة يا إما تحط لسانك في بقك وتسبح بحمد الجماعة إذا كان عاجبك أو تخبط دماغك في الحيطة وتقول وياريت يكون في سرك "عيش حرية عدالة إجتماعية"وأهو كلام في كلام وسلم لي عالثورة وربنا يرحم الرعية..اللهم إرحم الرعية..!!                                                            said_elmasryfahmy@hotmail.com