أنفاق..إتفاق..نفاق..!!

تعمل إيه لو إبنك واقف هناك عالحدود علشان يحرس بيتك ودارك..قاعد فاتح عينيه وواهب نفسه وروحه والوطن أمانة في إيديه وكمان نفسك ومالك..وتعمل إيه لما تنسى القلق من حدود عدوك ويجيلك الغدر والموت من نفق تحت بيت جارك..ولما دم ولادك يبقى ببلاش وعلشان زيتنا بقى في دقيقنا وسولارنا بقى من حق غيرنا بعد ما رئيس حكومة مُقالة في مكتب الإرشاد زارك..لما دمك يبقى حلال وكمان ببلاش وتموت وتعيش الأنفاق ويحيا مسلسل النفاق وأرضك تبقى سداح مداح لا هي من حقك ولا هي حتى حلالك..وفجأة في ساعة طاعة والناس صيام تلاقي ناس من غير ضمير بتفطر على دم ولادك..شئ طبيعي دم ولادنا يكون ببلاش مدام المذهب السياسي أهم من الإنتماء للوطن ومدام مش قادر تُملك قرارك..!! لما يكون قرارك مطاطي..لما تكون شخصيتك من غير لون أوطعم ورائحة وأداءك كتير إحباطي..لما تنفذ أجندة وقرارك يبقى مش من راسك وتضحك عليك البطانة إياها ويقنعوك بأن سلوكك ديموقراطي..يبقى عليه العوض في شرفنا ودمنا ودم ولادنا لازم يضيع مدام أكبر شنب عندك بيطاطي..!! اللي حصل عالحدود شئ دموي ومثير وغريب..دم ولادنا اللي سال وقبله هيبتنا وزيادة خيبتنا والتفريط في سيادتنا وكرامتنا شئ فعلا عجيب..مين السبب ومين اللي فرط في أمن بلدنا ومين اللي سمح يفترس ولادنا قاتل غدار بدقن ومدفع وأنياب ديب..فكر يشويش وخد نفس عميق حتلاقي السيناريو محبوك ومريب..مش لازم الخيانة تييجي بس من عدو واضح وظاهر لكن ممكن كمان تيجي من جار حبيب وقريب..!! اللي حصل في سيناء جريمة بكل المقاييس وضربة غدر في الصميم أصابت قلب كل مواطن وخلت دمه إتحرق..مش معقول نسيب دم ولادنا لغنم الصحراء يستبيحوه والضحية شباب بيفدوا وطنهم بالدم والعرق..إتفاقية إيه وأمن إيه وإيه معاهدة السلام دي اللي عبارة عن حبر على ورق..يا ترى مين المسئول ومين اللي خلى إحساسنا بالأمن والأمان ضاع واتسرق..معقول مصر المحروسة القاهرة الظافرة وخير جند الله إزاي شعبها ينتظر دايما رد الفعل وإزاي نفضل نعيش في حيرة وقلق..مش مهم حزننا أو يأسنا المهم نرد كرامتنا واعتبارنا واللي يزعل من كده يغور في داهية ويتفلق..!! صبرنا على كل حاجة كهرباء مقطوعة وحياة صعبة وعيشة كلها مشاكل وقرف..صبرنا على إنتخابات مشبوهة وبلطجة ميدان وقلنا المركب تمشي ورضينا بأشباه رجال يحكمونا بحجة الورع والشرف..صبرنا على ناس رافعة شعار قال الله وقال الرسول وطاطينا كلنا بكل أسف..صبرنا على الهم والهم فرط فينا وأفرج عن الإرهابيين والقتلة بحجة عفا الله عما سلف وإدعاء الرحمة والشرف..حنستنى إيه تاني وللاح نلبس طرحة وجلابية ونغمض عنينا عن شرف ضاع وجرح غميق إنفتح ونزف..!! الناس كلها مكلومة ومقهورة وبتنادي بالثار..في حلوق الناس مرارة وصدورها مشعللة نار..الناس عاوزة تعرف مين اللي فرط في دم ولادها واستباح أرضها ولقينا كل من هب ودب يبرطع في الدار..أمن الوطن والمواطن خط أحمر ما يستحملش هزار..البلد دي مش أي بلد وهوجة الظلام دي لازم تنتهي ولازم يطلع علينا نهار..دم ولادنا مش غلطة وتتصلح ولا يمكن نقبل أي تقصير أو إعتذار..مش ممكن كل يوم نلاقي إنفلات جديد وصعب تبقى بلدنا للإرهاب مزار..فيه حاجة غلط واتفاقيات تحت الترابيزة وتصريحات الموساد وحماس خلت الكل محتار..يا ترى حنسيب بلدنا سداح مداح وفين اللي أقسموا على حمايتها من الإرهابيين المتستسترين بالدين الفُجار..يا ترى هي دي النهاية وللا بداية مسلسل إرهابي بنتفرج عليه من غير حول ولا قوة وقاعدين للمصيبة اللي جايّة في شوق وانتظار..يا ناس يا هووووه هو خلاص مفيش دكر في البلد دي ومين يقول إن مصر بقى مفيش واحد يقدر ياخد قرار..!! مش مهم الشعب يعاني من المعيشة ولا مهم حتى الناس تجوع..مش مهم نزعل ونتقهر ونبكي على شهداءنا بالدم والدموع..مش مهم الدنيا تبقى ضلمة والناس تعيش عالشموع..مش مهم تأسيسية مُسيسة ولا حرية وديمقراطية ولا مصير رئيس مخلوع..المهم حق دم ولادنا يرجع لينا مهما كان الثمن ومهما كان حجم التضحيات مدفوع..عليه العوض ومنه العوض في كل اللي كان السبب مدام عصر الشهامة والرجولة بقى من الخدمة مرفوع..!! آه يا زمن الحرية والعدالة..آه يا زمن الخسة والندالة..آه يا زمن فيه القوالب نامت والإنصاص بقت عيني عينك بتعشق وبتمارس العمالة..!! يا ترى دم ولادنا حيروح هدر وحنقبل إعتذار سخيف..يا ترى هو ده حيكون عنوان حياتنا في ظل نظام واهن ضعيف..يا ترى حيشغلونا زي زمان ويلهونا عن حقوقنا بلقمة العيش والرغيف..يا ترى بعد نزف دم ولادنا حييجي واحد ويدّعي إنه بيصون الرعية وأنه بيراعي ربنا فينا وعفيف..يا ترى اللي فتح المعابر على البحري وسمح بالأنفاق وعفا عن القتلة والإرهابيين ممكن يبقى محل ثقة ومسئول عننا وشريف..لو ده حصل يبقى فعلا اللي إختشوا ماتوا وصدق اللي قال إن اللي ما يشوفش من الغربال يبقى أعمى أو كفيف..!! خلصونا من باب جهنم الأنفاق وخلوا عندكم رجولة وإتحكموا في حدوتة رفح..لو مش قادرين تحموا حدودنا وجنودنا روحوا وإلبسوا طُرح..خلاص الناس مش قادرة تستحمل أكتر من كدة حرااااااام عليكم الكيل خلاص طفح..!! said_elmasryfahmy@hotmail.com