الإخوان والشاطر سليمان ..!!
يعني إيه إخوان...؟؟
ويعني إيه بالروح بالدم نفديك يا سليمان..؟؟
ويعني إيه نحبس إرادة شعب بحاله تحت شعار شعر وللا دقن أو يا إما فلول يا إما إخوان..؟؟
ومين اللي بيصنف رأي الناس تحت بند يا أبيض يا أسود رغم اختلاف الناس في ثقافتهم وميولهم ومذاهبهم بكافة الأشكال والألوان..؟؟
وازاي عاوز الناس يصدقوا زهدك وبراءة تطوعك في الفوز بالسُلطة وإنت بمجرد إعلان الترشيح اتلخبطت وإتوعدت الجميع وجالك زهايمر وهذيان..!!
ويعني إيه إنك ترشح مرسي للكرسي بمبدأ فيها لأخفيها أو لضمان لهطة من الحُكم أو حجز مكان..؟؟
ويعني إيه حاله الرعب والإسهال اللي أصابت كل المرشحين بعد إعلان ترشيح نائب مبارك وكأنهم شافوا عفريت أو جن من الجان..؟؟
ويعني إيه 6 إبريل تدعو للكفاح المُسلح لو فاز والتهديد بالرجوع من تاني لكن بالسلاح للميدان..؟؟
وليه زرع الشكوك في قلوب الناس ولو فاز المنافس يبقى فيه تزوير ولو فازوا هُم يبقى نزاهة وحرية وعدالة وأمان..!!
ومين اللي بيأصل استبداد الرأي ويوصف ترشح سليمان بالإهانة للشعب وثورته وليه عاوز تهين اختيار أفراد شعب سبق وفرحت بتصويتهم لما اختاروك في الشورى والبرلمان.!!
وإزاي عاوزين كلاكيت لعاشر مرة السيطرة علي كرسي الرئاسة بعد السطو علي النقابات والمجلسين ولجنة الدستور كمان..؟؟
ويعني إيه يزايدوا في الكلام ويغالوا في الخصام ويلعنوا النظام القديم في المجالس والمواقع بعد ما كانوا بيطبلوا ويزمروا له بنفاق مكتوب ومرسوم بكل الأشكال والألوان..!!
ويعني إيه نتعامل بمعيارين مختلفين في وصفنا بتعامل الوريث السابق مع المؤسسات الأجنبية ونحلل اجتماع ممثلين لجماعة الخير هنا مع الوفود من كل صوب وهناك في بلاد العم سام مع الأمريكان..؟؟
بصراحة مش عارف ليه ناس كتير خايفة من نزول سليمان ماتسيبوا الناس تختار بمزاجها وشوفوا ساعتها الإختيار الحقيقي للناس مش زي سلق الإعلان الدستوري ووهم الأغلبية البرلمانية أو محاولة الإستيلاء علي اللجنة الدستورية من فصيل حزب وطني بشكل جديد عاشق للسلطة ومشتاق ليها وجعان..
من الآخر المشكلة مش موضوع إن ده من الفلول أو من العجول المشكلة إنهم كانوا خلاص كانوا على وشك لهط الكرسى ونزلوا مختالين بالشاطر لكن يا عيني طلع الشاطر في الآخر سليمان..!!
نفسي أعرف ليه التيارات دي بتفرض علينا الوصاية وكل واحد عامل فيها خبير قانوني وبيتكلم عن حقوق الشعب قال يعني خلاص بقى عنه مسئول..مين قال نخلص من منظومة فاسدة وغيلان سعرانة نقع في أيد جماعة بتزوّق الكلام وهدفها التكويش على كل شئ زي الغول..السم في العسل خلاصة كلامهم وأفعالهم وحُب الوطن قناع ولهط السُلطة شئ من الإيمان ونداء إلهي وكأن الدين بقى قطاع خاص وكأن الشعب مش فاهم ومسطول..حاول تقرب من مصالحهم مرة حتلاقي جيوش جرارة من تحت الأرض وتهديد ووعيد ومعركة بشعار يا قاتل يا مقتول..اللي يجري عالبرلمان عاوز يعمل قانون واللي بيهدد بالنزول للشارع واللي بيدور علي أي ثغرة والتهمة جاهزة ومعروفة مش قالوا ما لاقوش في سليمان عيب قالوا من الفلول..!!
بلدنا على كف عفريت والأيام القادمة فعلا مصيرية..الكُل بيطعن في الكُل ومسلسل الفضايح والإسفاف مستمر على كل المنافذ بصورة يومية..فضح أنساب وصندوق أسود مع كل واحد بيهدد بيه التاني والوطن في الآخر هو الضحية..عاوزين رئيس محترم أيا كان يليق ببلدنا مش رئيس كل من هب ودب يتطاول عليه بمنتهى الإسفاف والهمجية..المنافسة الشريفة نهايتها حتكون خير للجميع حاكم ومنافسين ورعية..الفائز نقول له مبروك والخاسر هارد لك ونتوحد من جديد علي قضايا بلدنا ومشاكلها من الحقبة المباركية..كل مرشح واجب عليه يقدم برنامجة للفائز ونقعد ونفكر كلنا ونختار أفضلها لنهضة بلدنا وإنتشالها من الفقر والجهل والعشوائية..يحكمنا موسى يحكمنا عيسى مش مهم يحكمنا مين لكن المهم عاوزين حاكم حازم (بس مش أبو اسماعيل) وعادل وإنسان ويحس بينا ويتعامل معانا بآدمية..الشعب يريد الإستقرار وده مش حييجي إلا بالإحترام بين المرشحين وبطانتهم والتركيز على البرامج مش ده سفاح أو ده أفاق أو ده مزور أو ده فاقد الأهلية..دي مصر يا بني آدمين مش جمهورية موز ولا جزيرة مش عالخريطة ولا من بلاد الواء الواء الإستوائية..مصر الحضارة والهرم والنيل مصر الفن والثقافة والمنارة مصر الأزهر مصر الدم الخفيف والكرم والناس الطيبين مصر الشعراوى وزويل وثومة ومختار وكمان محفوظ ومجدي يعقوب درر الحضارة الإنسانية..لكن مهما كانت الأراء والأهواء لازم نكون مُصرين ونحارب علشان خاطر ولادنا وعلشان بكرة يبقى لينا كلنا ولازم تكون بلدنا مدنية..الشعب خلاص بلغ سن الرشد ومش محتاج أوصياء عليه من فلول الوطني أو واحد ويضحك علينا بدقن وكلام عن الشريعة أوشعارات دينية..عاوز تعرف إيه اللي بيحصل روح وتابع حوارات أشطرهم وشوف التبرير الساذج والسطحي لتقلبات قرارات إخواننا ومحاولتهم المستميتة لتشكيل الحكومة والمشاركة في صراع الإنتخابات الرئاسية..المشكلة مش في الصبغة الدينية المشكلة إن كل مصري بيشعر بالعار لما يلاقي ناس بيتكلموا بإسم دينه وكل همهم الكرسي والسلطة والمناصب الدنيوية..الكل يا عيني بيضحي بنفسه وبييجي عليها علشان يلبي نداء الوطن رغم كل الهموم والمهام الجسيمة المستقبلية..بالذمة مش بيفكروك بمحترفي الإنتخابات اللي عاملين متطوعين في إنتخابات الإتحادات الرياضية..الله يكون في عونك وعوني وقبل كل واحد الله يكون في عون بهية..!!
بصراحة قلمي تعب من الكتابة وعقلي أفكاره وجعاني..لكن عندي أمل في بكرة وعندي أحلام كتير وأماني..ولأني مؤمن بالمثل اللي بيقول اللي بنى مصر في الأصل حلواني..يبقي إزاي بذمتك ييجي على آخر الزمن ييجي ويحكم بلدنا إخواني..!!
Said_elmasryfahmy@hotmail.com