القانون لا يحمي المتثورجين..!!

خلاص قَرب المشهد السياسي من النهاية وفاضل شوية رتوش بسيطة علشان الصورة تظهر وتبان..خلاص السيناريو ماشي تمام التمام وكل واحد ماسك حتة في إيديه وبيعضعض فيها وفرحان..زعابيب الهوجة خلصت خلاص وفاضل شوية بواقي بتهلفط وتسفطط على قدها في السر والكتمان..خلاص خلصنا من بتوع إحنا الشعب والثورة للجميع والكلام إياه من بتوع الميدان..وإيه يعني لما يوم ننزل فيه ونساند هواه الميدان ونقاوم الجمل ونركب الحمار ونطلًع للناس اللسان..خلي اللي يقول يقول ويخبط دماغه في الصخر أو في الأربع حيطان..هو حد لسة فاكر إن كل من زرع حصد أو علشان سبناك تجعجع وتطالب بحقك تبقى خلاص وطني وثورجي وإنسان..الثورة وحزمناها والسلطة وقسمناها وما بين شعب وشورى كسبناها غصب عنك وعن عين ثورتك لهطناهم كمان..حط في عينك حصوة ملح وقول ما شاء الله أو خمسة وخميسه على سلاطين هذا الزمان..تقدر تقوللي مين قدنا أو حتى مين زينا في الوصول للهدف من أقصر طريق والدليل مفاوضاتنا السرية مع الغرب والأمريكان..واديك شفت كمان قمة الحرية والعدالة في تقسيم لجنة الدستور فيفتي فيفتي يعني بمنتهى العدل وكله بالسحتوت وحسب الشرع وبالميزان..مش عارفين ليه الناس زعلانة من الحق طب نعمل إيه فيكم يا ثورجية يا بتوع يحيا الوطن والتضحية والثورة وشعارات الميدان..لو كان لكم تأثير على الناس زينا كنا شفناكم ويانا في النقابات أو يبقى ليكم تواجد في الشارع السياسي أو حتى في البرلمان..لكن هي الدنيا كده ناس تتثورج ولا تُحكمش وناس بتحكم من غير ثورة ولا وجع دماغ وبتتقاسم كل أنواع السُلطة كمان..لو مش مصدق روح شوف كل القرارات السيادية وإزاي لازم تحل عليها بركاتنا ورضانا ولا عمر حاجة حتمشى من غير صكوك غفران..روح وشوف السادة المرشحين وبدون استثناء إزاي حيموتوا وينولوا  رضانا وبيخطبوا ودنا في العلن أو في السر والكتمان..عزيزى الثائر هو إنت لسه مش واخد بالك من الخازوق اللى طلع من نافوخك ولا حتى حاسس بالتغيير في الشارع السياسي وللا خلاص جالك زهايمر أو عمى ألوان..من الآخر تعمل ثورة أو تعمل إعتصام كان غيرك أشطر لأنه خلاص ثبتنا قواعدنا الشارع والسلطة كمان..لو مش مصدق تعالى وشوف حكومتك المرعوبة من استجوابتنا وإزاي نقدر نمنع أي وزير يتكلم بمزاجه كمان..خلاص ناسبنا الحكومة وفرضنا كل شروطنا بحجة صندوق الإنتخاب وشويه الشعارات إياها زي الحرية والعدالة والمساواه وحقوق الإنسان..مش قالوا كله عند العرب صابون وبصفتنا قلب العروبة يبقى كله عندنا سمك لبن تمر هندى يعني كل الألوان..عرفت إزاي بقى إزاي تركب الموجة وتشارك في ثورة أو هوجة وبأقل مجهود تحصد إنت المحصول وتعيش كمان سُلطان..هي الدنيا كده يوم لك ويوم عليك وياما دارت علينا الدنيا وغدر بينا الزمان..وأهي ثورة وربنا رزقنا بيها وللا الكعكة في يد اليتيم عَجبه فياريت تفرحوا لينا مش السلف قالوا كلنا ولاد آدم وحواء يعني من الآخر كلنا أخوات وإخوان..!!       تسلسل الأحداث من 11 فبراير بيثبت ويؤكد إن يبقى الحال كما هو عليه ولا عزاء لثوار الميادين..كانت ثورة وحولوها لهوجة عرابي أو فضفضة بُق ونشلوها والثوار في العسل نايمين..لكن فيه ناس نطت السور وخرجت بعد مفاوضات مدفوعة الأجر من الجحور والزنازين..روح ولاحظ الإصرار علي شهادة براءة الذمة وسقوط الأحكام القضائية وخروج كل المطلوبين..روح ولاحظ إزاي فيه ناس بتتسحب وبتأكل بالشوكة والسكينة قهر وظلم وذل وعذاب كل السنين..روح ولاحظ مين اللي كان عارف من الكنترول إيه هي النتيجة لما الهواة يقوموا بثورة ويسيبوها ويجروا عالفضائيات والندوات وينسوا الميادين..لما تشوف محصولك بيتقسم على غيرك وإنت لا صوت ولا صورة اعرف ساعتها إنك اشتريت الترماي رغم إنه لغوه من الميدان والقانون لا يحمي المتثورجين..معلش يا أسيادنا فرصة تانية إن شاء الله والأيام أهي لسه جاية والثورات كتير مالكم علي إيه وليه مستعجلين..مش قالوا مرًة تصيب ومرًة تخيب والمرًة دي خابت يبقى إن شاء الله المرة الجاية تبقوا كسبانين..المرة دي إتنشل منكم النقابات والبرلمان وسماح في الوزارة المرة دي أما الرياسة حتيجي حتيجي إحنا مش مستعجلين..المشكلة إن الثورات لا تصلح للهواة أصحاب النفس القصير والزعامات الوهمية والناشطات والناشطين..الثورة يا شطار زمانكم مش ممكن يكون عنوانها عربية آخر موديل أو ترشيح لنوبل أو بهدلة الناس على الفيس بوك وكمان سب الدين..الثورة مش عنوانها الإضرابات وشغل التلات ورقات والخطف والعصابات وترك الساحة للمنتفعين..يا ناس فوقوا البلد بتضيع وبتتسرق بالشرع والقانون وبتتسلم تسليم مفتاح وإحنا مش داريانين..والغريبة بنشوف ناس بتوزع بلدنا عليهم وعاملين علينا أوصياء باسم القانون والدين..يا بلد العجايب والحق المهضوم الغايب والثعلب المكار اللي عامل في حبها دايب وشلة لله يا محسنين..عفوا أخي في الميدان لقد نفذ رصيدكم أرجوك حاول مرة أخرى وكل ثورة وانتم طيبين..عفوا أخي في الميدان لو حقك ضاع روح ودوًر عليه يمكن تلاقيه بس أرجوك بلاش ترفع قضية لأن القانون لا يحمي المتثورجين..الله يجازي اللي كان السبب ويجازي اللي سرق حلم شعب طيب وناس غلابة بيقولوا عليهم مصريين..ربنا يستر ويحفظ بهية من اللهو الخفي وبتوع ال 50% وشلل المنتفعين اللهم آميييين اللهم آمييييين..!!                                                        said_elmasryfahmy@hotmail.com