ألا أونا..ألا دو..ألا ترى..قَرًب قَرًب قَرًب ياجدع وبص وشارك معانا في مهرجان الإنتخابات الرئاسية..وعلشان إحنا بلد عجيبة غريبة وسابقين دايما سِننا وحالة بين الناس إستثنائية..فقد قررنا وبإعتبارنا ثوار ومتثورجين حتى الفلول فينا حنسمح ليهم بالمشاركة في التصويت وده علشان نؤكد للجميع إننا ثورة فعلا ديمقراطية..أرجوك إلحق وشارك أو سجل لايك على الفيس بوك اللي كان كلمة السر والسلاح العجيب لثورات الربيع العربية..مش عارف ليه نسبوها للربيع رغم إن أغلبها حصل في الشتاء وعواصفها كانت مطبوخة على نار هادية ومتسبكة برياح أنجلو أمريكية.بس ياريت تِفتًح كمان مُخك معانا وتلاحظ المطر اللي كان بينقط علينا ساعتها حتلاقيه مخلوط بريحة أوهام حقوق إنسان علي شوية دورات لتعليم شباب العالم العاشر بحجة علشان ما تنضربش على قفاك وبالمرة تتعلم شوية ديمقراطية..وإزاي تزرع جوه خيال كل واحد إنه ممكن يبقى رئيس جمهورية نفسه وكمان ممكن يروح بالشبشب والبيجاما ويرشح نفسه رئيس للجمهورية..وعلشان كده ثورات الدنيا ربيع والجو( بديع )كان ليها السبق في التجديد والتحديث في النظام الإنتخابي الجديد وأهو كله بثوابه وطبعا كلنا عارفين إن الثواب على قد النيًه..وعلشان إحنا شعب طيب وكريم ورغم إنه مش فاهم اللي بيحصل فيه لكن ورغم ذلك يستاهل الإكرامية..والإكرامية هو عرض آخر حاجة وكتير واوووو وغير مسبوق وحنكون بسببه أعضاء في موسوعة جينتس صاحبة الأرقام القياسية..لذلك قد قررنا ولينا شرف السبق توفير الراحة ودوشة الدماغ عن جماهير الشعب الوفية..من النهارده مفيش حكومة لأن حكومتنا مشغولة بالإستجوابات وبيعلموها الأدب في البرلمان بحجة إن النائب مُنتخب ومن حقه يبهدل الوزير لكن الوزير إبن البطة السودة ده مُجرد وزير ومالوش في تشريع المجلس ديًة.. لذلك إحنا خلاص بقينا الحكومة وقررنا كمان إلغاء التصويت في الإنتخابات الرئاسية..من النهاردة كل واحد من حقه يبقى رئيس وكله دستوري وقانوني وعلى عينك يا تاجر وطبعا كله حسب الشرع وقوانين الثورية البرلمانية..خلاص قررنا يكون هناك رئيس لكل مواطن وده دستوري وقانوني وقسمة عدل حسب الحسبة الشرعية..مش إحنا جربنا نظام رئيس لوطن بحاله وفشل يبقى ليه ما نجربش يكون عندنا رئيس لكل مواطن مدام إحنا في ثورة وفرصة نؤسس نظام رئاسي جديد بنظام سلق بيض أو بلوظة بالمهلبية..ومدام حنبقى كلنا رؤساء يبقى كل واحد فينا حيبقى مواطن سابق بعد ترشحه للإنتخابات الرئاسية..يبقى على إيه إنتخابات ولجان وصناديق وتصويت وزعيق وبهدلة وإجراءات دستورية..كل واحد يجيب صندوق في بيته بس ياريت ولاده ينتخبوه لوحده وياريت ينسى يخلي مراته سيدة أولى حسب التقاليد الرئاسية..خلاص مفيش من النهاردة رئيس سابق لأن كلنا حنبقى كلنا رؤساء للمحروسة وده حدث غير  مسبوق وقمة الديمقراطية..آآآآآه يازمن والله عشنا وشفنا عرش مصر يقف بالطوابير عليه قهوجى وفران وميكانيكي علشان يحكموه وده مش تقليل من شأن حد لكن لكل مقام مقال وهي دي النظرية..أينعم من حق كل إنسان يبقى مُرشح لكن مش من حق أي حد يجيب مرشح علشان يضحك عليه لطريقة كلامة أو بساطة ثقافته السياسية..يا ناس يا عالم يا هوووه عرش مصر مش بانوراما أو لعبة بنتسلي بيها ولا هي تجربة دانماركية..بالذمة علشان تعرف إننا بلد العجايب عمرك شفت قانون يخلي بياعة الخضار ترشح نفسها وتحرم واحد زي زويل علشان مراته منزوعة من دسم الجنسية  المصرية..بالذمة هي إنتخابات وللا مخللات وللا شوربة أرانب بالملوخية..مهزلة تزايد عدد مرشحي الرئاسة عنوان هابط لوطن كبير ومسرحية سخيفة هزلية..روح وطوف وشاهد بنفسك طوابير الأنابيب والمرشحين في شارع العروبة وتسابق الإعلام عليهم علشان يفرجوا العالم عليهم عبر القنوات الفضائية..روح وشوف ونقِي على كيفك المشهد أو المرشح اللي عاوز تلاقيه بطل لأحلامك الكوميدية..تقولوا حرية تقولوا ديمقراطية تقولوا مهما تقولوا عليه العوض ومنه العوض وربنا يحمي بهية يارب تحمي بهية..!!                                                       كثافة المرشحين ورغم ظرافتهم تحس وكأنهم عاملين زي القطار لما يسبقه دخان وبخار..علشان القطار يتحرك لازم نولع له فحم ومازوت علشان تزيد النار..علشان كده إياك تتبرجل و تتلخبط أو يجيلك زُغطة أو شُحار..الرئيس القادم لم يأتي بعد  لكن موجود في الكواليس ومستني الإشارة وقاعد في إنتظار..علشان كده استني شوية وخد نفس عميق قبل ما تتورط أو تختار..أوعي تختار أحسن الوحشين ولا تقول اللي تعرفه أحسن من اللي ماتعرفوش ولا تقول مفيش فرق بين الكوسة والخيار..أوعى يُغرك ضحكة خبيثة أو كلام مِتزوق أوذبيبة على الرأس قال يعني إلتزام وشعار..أوعى يضحك عليك اللي عامل فيها ثوري أو شجيع السيما اللي عمل بعد الحفلة ما خُلصت بطل مغوار..واحترس من النشالين اللي بيسرقوا صوتك من غير ما تحس ويبيعوك في لحظة لأول واحد صاحب أجنده أو سمسار..إختار بعقلك و ضميرك مش علشانك لكن علشان إبنك يلاقي وطن يفخر بيه وزعيم حكيم رزين مننا عايش معانا وزينا وحاكم للبلد باقتدار..الخلاصة إن كرسى الحكم مش حيكون بالبساطة دي ولسة يا ما في الجراب يا حاوي أو يا ما في الجراب أسرار..!!                                            سيبك من كل الكلام ده خلاص أنا عملت اللي عليً وقُلت كل اللي في نِفسي..والكُل حيشوف كلماتي ويقراها وحيسمع صوتي العالي بعد ما كان يادوب بيسمع  همسى..أنا خلاص قاعد ومستني الفارس اللي حييجي علي حصان ويبدد همي ويأسي..ولغاية ماييجي ويشرف مفيش حد وَصِي عليً علشان من النهاردة أنا حأبقى زي كل اللي عاملين ثورجية يعني من الآخر رئيس جمهورية نفسي..!!                                         عنوان المقال ( رئيس لكل مواطن )

said_elmasryfahmy@hotmail.com