الشعب والشورى..والثورة الأمورة !!

خلاص كل شئ انكشف وبان ووضحت خطة الخطوة خطوة الجهنمية..الولد في الكوتشينة بيقش اللى على الأرض لكن الشايب أبو دقن هو اللى طلع إبن لذينة وقش الأخضر واليابس في الإنتخابات التشريعية..إمبارح كان الشعب والنهاردة الشورى وكله شرعي وقانوني وعلى عينك يا تاجر وزي ما إنت عارف أكل العيش في المجلس يحب الخِفيًة..وليه ما يحصلش كده مدام فيه ناس كانت نايمة في الذرة ولعبوها صح ولهطوا وش الثورة بعد معركة هَم يا جمل وأحداثها الكوميدية..ومدام السادة شباب الثورة يا عينى بعد التنحي كان وراهم ميعاد مع الفضائيات والميكروفونات ونسيوا القضية..ومدام بقينا كلنا فلاسفة ومتثورجين وبقى عندنا ثوار ما شاء الله زي الرز وعلى كل لون في برامج التوك شو الفضائية..ومدام لقينا اللي يبرر ثورجة المولوتوف وحرق التاريخ بمنتهى البساطة وسوء القصد والنية..ومدام بنلاقى حارس مرمى بيتنطط في الفضائيات وبيقبض بالآلافات ونفسه يا عيني يصد أي سبوبة ثورية..ويهاجم مسئول في الشرطة وزعلان ياعيني من الجنود الغلابة لتصديها للي عاملين ثوار ورايحين يحرقوا الداخلية..واللي كان العدو اللدود للإخوان والسلفيين ودلوقت بيسبح بحمدهم علشان الأستاذ من المرشحين ومحتاج إمداد وتمويل للمعركة الرئاسية..والمرشح التاني إياه اللي نفسه ياعينى ينول الرضا وياخد بركة مولانا ويبقى المرشح المحتمل للأغلبية النيابية..مش عارف الناس دي بتنسى وللا الزهايمر بقى وباء في بلدنا وأعراضه بقت موجودة في جينات بعض السادة المرشحين بحكم السن وللا علشان هُم فاكرين نفسهم لسه شباب وبيمثلوا الأغلبية الشعبية..لما تشوف كل ده قدامنا يبقى لازم ننام ونحط في بطوننا بطيخة صيفي بس لازم تكون حمرا وتكون مدبوحهة بطريقة شرعية..الحكاية مش محتاجة فلسفة ولا فذلكة لكن لازم نراجع نفسنا ونشوف مين اللي استفاد واللي بيستفيد واللي لسه حيستفيد واعرف إحنا بقينا كده إزاي وليه وإيه هو أصل القضية..بص في الصورة كويس ودقق حتلاقى إن صاحب الصوت العالي واللي بيتلوِن حسب الظروف واللي بيشيد بالإسلام السياسي وحكمته هم نفس الوجوه بنفس الأفكار واللي كانوا بيتبرؤا من إخواننا علشان الشُبهة السياسية..فاكر كان كتير من الوجوه الموجودة في الترشيح والإعلام والصحافة بيوصموهم جهارا نهارا بالتطرف والإرهاب وقلة الخبرة ودلوقت بيشيدوا بحكمتهم وتاريخهم السياسي وتجاربهم قال إيه الوطنية..الخلاصة لما يكون فيه مجتمع كده ونماذج بالوصف ده يبقى مش غريبة على أصحاب التيار الدينى يلهطوا برلمان الشعب ويحلٌوا بالشورى في مهرجان اللوغاريتمات الإنتخابية..قالوها كلمة وكانت حكمة واستهترنا بيها وقلنا مغرورين وأتاريها مش كلمة لكن كانت أُمنية مزروعة جواهم ورغبة حقيقية..مبروك للحاج فهمي الشورى ومولانا الكتاتني الشعب ولهم حق يتصوروا في الجرائد بيضحكوا على خيبة أمل كل أصحاب الشعارات السياسية..اللعبة لسه ما خلصتش والعين بقت تجهيز حكومة في التو واللحظة تحت شعار وأطيعوا أولى الأمر وأصحاب الأغلبية البرلمانية..مفيش واحد عنده حجة مش دول هم اللي بيمثلوا الشعب يبقى من حقهم كمان يلهطوا كراسي الحكومة الإنتقالية..ما هو لازم يحصل كده علشان أسيادنا يقعدوا ويتفرغوا للهبرة الكبيرة اللي عليها العين والنية..ويقولوا إحنا زاهدين في الحُكم والسُلطة وهم حاسبينها من زمان ومجهزين الريس الجديد وكمان النائب بتاعه تمام زي توزيعة اللجان التشريعية..الريس القادم لازم يكون كامل المواصفات ويدين بالسمع والطاعة لإخواننا إياهم وتحت بند يا عزيزي كلنا لازم نكون إخوان في المسئولية..أما نائبه لازم يكون في قلبه نور وفي وجهه نور حسب ترتيب الأصوات أو توزيع الغنائم في المعارك الإنتخابية..شفت بقى الناس دي ماشية إزاي وإزاي مفيش عندها هزار والشباب بتوع الميدان نايمين في العسل مع عادل إمام مع المُزة بطلة الفيلم اللي كانت زي المهلبية..يا أخي غريبة أتاري فيه ناس شرقانة سُلطة وساعة الجد يروحوا ويلحسوا أي وعد يبعدهم عن أمنيتهم في الحكم مهما أقسموا ومهما كان الجدل حول خطتهم السرية..المشكلة الفعلية إنك قدام تيارمُنظم وماشى معاك بقانونك اللي وضعه بهوات مرحلة الحُكم  الماضي صاحب شعار التوريث والمنظومة العائلية..معلش تبقى ثورة وتقسم لغيرك وكفاية عليك تروح تسب العسكرحُماه الوطن أو تروح تحرق الداخلية..مش قالوا في الأمثال فيه ناس بتتثورج ولا تكسبش وناس بتكسب من غير ثورة وأتاري مش كفاية تموت في الميدان أو تنفقع عينك بخرطوش أو رصاصة مطاطية..يا ترى عرفت كلمة السر وإزاي تكسب من غير مجهود وللا لسة حتتلهي على عينك وتشتم عالفيس بوك أو تنشر ذم في العسكر وتتهمهم بالتفريط وعدم الحصول على شهادة الإيزو في إدارة الفترة الإنتقالبة..أرجوك خُد بالك من كلامي قبل مايقصفوا قلمي ويكسروا راسي بعد إكتمال الرباعي المأمول الشعب والشورى والحكومة والرئاسية..يا عم روووووح وتقوللي ثورة طب بأمارة إيه وفين شباب الثورة حتى الثورة الأمورة نفسها فين هيً..عليه العوض ومنه العوض وأهي دقني أهه لو تنازلواعن الحكم حتى لو بحجة القسمة التوافقية..السلام عليكم وأشوفك بإذن الله بعد خمس سنين لكن صدقوني حتلاقيهم في كل مكان بحجة التغيير والتجربة لكن الأكيد حتكون الأمور زي ما هيً..يا ترى مين السبب خيابة أهل الميدان وللا شطارة إخواننا إياهم لكن مش مهم السبب المهم مين حيكون الضحية..الله يعوًض علينا ويحرس من إهمالنا وتفريطنا في حقوقنا أم الدنيا بهية..اللهم أحرس المحروسة وإحميها من اللي بيضحكوا علينا بقال الله وقال الرسول تحت بند صندوق الإنتخاب والأغلبية والشرعية..اللهم إحفظ بهية يااااااارب تحفظ بهية..!!                                                                              

Said_elmasryfahmy@hotmail.com