fiogf49gjkf0d
ثورجية كي جي تو ..!!!
كان يا ما كان من أيام زمان مواطن من بر مصر عايش مخنوق ذليل تعبان..عايش في بلده مش حاسس بخيرها وباعوه حكامه فى سوق النخاسة للبوم والشوم والتركمان..خنقوه وحبسوه وخلوه ذليل لقمة العيش وبقى كل همه يلاقى وظيفة أو مأوى لأولاده في العشوائيات أو في أي مكان..المواطن البسيط يا عيني حكموه وحاكموه كل يوم على ذنب ما عملوش إلا إنه عايش في البلد دى وسرقوه حراسه حتى في قوت يومه وسابوه ملطشة للتعابين والغربان..الأرض باعوها والمصانع خصخصوها والأرض الزراعية بوروها وبيوت الشباب فى الصحراء لهفوها بإختصار كان المواطن حتى من الستر محروم وعريان..الناس كانت مليانه هموم والمواطن جواه مهزوم والقلب حزين دايما يا عينى ومكلوم يعنى من الآخر نسى إنه كان في يوم إنسان..لكن دوام الحال من المحال وما بين يوم وليله انقلب الظلم على الظالم وإتغير الحال والأحوال والمواطن المكتوم طلع له أسنان ولسان..كانت النتيجة ثورة ومواجهة عنيفة وصريحة لإعادة الحياة ل 87 مليون إنسان..
كان الإسم ثورة والعمر أكثر من 7 آلاف سنة والعنوان كان هو الميدان..!! فعلا كانت الحادثة ثورة غير مسبوقة والفاعل كان غضب شعب ولكن حسب الشهود ناس ركبوها وقالوا عليهم ثوار..وأيًا كان القصد والمغزى إلا أن الجميع كان على مبدأ واحد ضد الفساد بالذات وعلشان كده الشعب تعاطف وتضامن مع أهل الميدان وانحاز للتغيير وأخذ القرار..الشعب يريد تغيير النظام كان هو النداء وكان هو كمان الهدف والاختيار..نظام الحكم في لحظة انقلب وعصر دولة الفساد برحمة ربنا علينا إنزاح وانهار..المهم قامت الثورة ومرت بسلام وسقط النظام واتنسم الوطن هوا جديد وغريب وطلع علينا النهار..لكن اللى حصل إن اللي قاوموا وواجهوا جحافل النظام من البداية حتى التنحي سلموا الميدان تسليم مفتاح للمشتاق والمتسلق ونهاز الفرص والسمسار..أتاري مش كل من ركب الحصان خيال ولا كل اللي كانوا في الميدان ثوار..أتاري ممكن بلد في لحظة تتخطف وثورة في هوجة تتسلب وأتاري ممكن كدابين الزفة يبقوا بين يوم وليلة أحرار..الثورة كانت عنوان كبير ويافطة بالنيون زغللت عيون ناس كتير لكن يا خسارة اللي لهطها بالهنا والشفا حبايبنا الشطار..الثوار الحقيقيين سابوا الميدان بعد التنحي وبحسن نية وأتاري كان راقد ليهم ديابة منتظرين الفرصة على أحر من الجمر والنار..وعلى رأى المثل تبقى ثورتك وتقسم لغيرك وأتارى يا عينى الزمن غدار..المهم الناس عاشت أول سنة بعد الثورة ما بين شد وجذب وضحايا على كل لون وشارع فوضى بدون استقرار..وعسكر وثورجية ووزير داخلية محدود الصلاحية ومجلس بيتشرط عليه بفترة ملاحظة واختبار..سنة كي جي وان مرت علينا كلنا وإحنا محللك سر بعد ما افتكرنا إننا حنقب لفوق أتارينا رايحين للخلف دُر واتارى البلد أتحاوطت بالأسمنت واصبح ما بين الشعب والسلطة ألف جدار وجدار..الثورة فى عامها الثاني كان شكلها غريب من غير طعم ولون لكن يا أخي تشم ليها رائحة غريبة محوجة صناعة خارجية وداخلية يعنى من كل بلد عطار..الثورة فى كي جي تو بقى ليها ألف صاحب وصاحب واللى شايف اللى بيحصل وفاهم حاجة أكيد يبقى حمار..الثورة في كي جي تو بقى مالهاش كبير وكل واحد بيضرب كرسى فى الكلوب علشان يحقق مصالحه ومش مهم أمن البلد ولا إقتصاده حتى لو وطن بحاله إنهار..الثورة فى كي جي تو رايحة في عكس الإتجاه وكل شئ بقى مُباح والفوضى بقت ملعلعة وسوقها في إزدهار..يا ترى دى ثورة وللا فوضى وعايشين فيها وللا ناس كانوا زهقانين شوية وافتكروها هزار..يا ترى طباخين الثورة نزعوا منها الدسم وللا اللى ركبوها حطوا لينا السم فى العسل وزنقونا في خانة اليَك من غير إختيار..عمرك شفت ثورة نسيوها ثوارها وسابوها للى يسوى واللى مايسواش من غير سلامو عليكوا ولا حتى كلمة إعتذار..خايف على بلدى قوى من طلبة كى جى تو اللى على إيديهم شفنا وقف الحال وشلل الإقتصاد والخراب والدمار..خايف على بلدى قوى من طلبة كي جي تو اللى سرقوا ثورة ثوارنا الحقيقيين بمخطط مُنظم مدروس غدار..خايف علي بلدي لا نفضل نصدق أساطير حضارتنا وتاريخنا وننسى قد إيه ضعفنا وقد إيه عدونا جبار..خايف أحسن التهاون والطبطبة تكون آخر المطاف لدولة عظيمة وأصيلة وخايف يكون هوان بلدنا علينا وإهمالنا في حسم أمرها يبقى زى النعش اللى مستنى آخر مسمار..خايف على بلدى من طلبة كى جى تو واللى وراهم ولو سبناهم من غير حساب حيقولوا هنا كان يوجد بلد عظيم بس يا خسارة أهله فرطوا فيه وحنبقى حاجة كده من التاريخ زي الأهرامات وأبو الهول يعني حنبقى مزار..يا ترى مين ضحك عليك وعلينا وقال إن إحنا إبن بارم ديله وللا إن إحنا شعب الله المختار..!!
سيبك إنت من الثورة وتوابعها وطلبة الكي جي تو..والعرض حيفضل مُستمر مدام عندنا فضائيات ومتفذلكين وجمعيات كُل واشكر لحقوق الإنسان بقيادة المستر جو..وتعالى واتفرج يا سلام على وطن بيحرقوه وبص وشوف من غير إعتراض أو حتى تقول نو..إيه رأيك حتيجى تتفرج معانا وللاحتشارك الست غادة فى تأجيل زفافها علشان ضحايا بور سعيد ولا حتألف أغنية للمناسبة زى شعبولا وللا تيجى نلحق دينا قبل مايجبروها على الإعتزال على نغمة توك تاك تو..يارب ترحمنا وترحم بلد الأزهر والنيل والهرم من اللى خانوه وباعوه..يا ترى فيه أمل وللا لأ لكن إن شاء الله فيه أمل بس بشرط وعلى رأي الأسكندرانية وطننا يلحقوه..يا نلحقه كلنا ودلوقت مش بكرة يا إما نلبس كلنا طرحة وجلابية ونصوت على حالنا ونقول أحيييييه وكمان أيوووووووه ..ملعون أبو الغباء على غياب الإنتماء على كل خروف مطنش وبيقول ماااااء وملعون أبو اللى خلفوه..!!
said_elmasryfahmy@hotmail.com