fiogf49gjkf0d
ماما نويل..!!
مرت الأيام سريعة والأحداث كمان والناس لسة قاعدة حيرانة يا عينى منتظرين..اللى مستنى الفرج واللى مستنى الفرح واللى بيفكروا فى بكرة وعلى بلدهم وأولادهم خايفين..يا ترى إيه اللى حصل لأهل المحروسة وإيه اللى بدل الحال فيها وفين سماحة أهل البلد الجدعان الطيبين..الأيام بتمر وتجرى والسنة خلاص فاضل فيها ساعات بعد ما شافت أحداث علشان نستوعبها محتاجين سنين وسنين..2011 رغم إنها مش سنة كبيسة لكن اللى حصل فيها كبس على صدور كل المصريين..مين كان يصدق بعد ما قامت ثورة خلعت جذور الفساد وفضحت رموزه تتفرق صفوف الشباب ويبقوا مختلفين..الناس سابت الميدان بعد تنحى رأس النظام وحطت فى بطنها بطيخة صيفى ومشيوا من الميدان مطمنين..كأن الهدف كان إزالة النظام وكأن البلد حتبقى المدينة الفاضلة فى لحظة وكأن مفيش عليها بصاصين..أتارى البلد عليها ألف عين وعين من جواها ومن براها الكل بيراهن عليها لكن أتارى يا عينى الكل من خيبتهم خسرانين..عشم إبليس فى الجنة لو قدروا يفككوا المحروسة رغم قسوة التجربة لكن بإذن الله حنخرج منها منصورين..اللى حصل فى المحروسة غير مسبوق وبانوراما لأحداث ثورة بتتسرق عينى عينك وعنوان بيتدارى فيه كل صاحب مطمع وشايل يافطة عنوانها تحيا مصر وإحنا وبس الثوريين..عام بحاله مر علينا وإحنا بقينا من غير لا لون ولا ريحة ولا طعم وطعم الدنيا بقى مر وماسخ والناس خلاص على الصبر مش قادرين..سنة كاملة ومفيش رأى إتفق مع رأى والكل شايف نفسه هو بس الثورى الوحيد والباقى بيعوموا مع الموجة وعليها راكبين..صراع فى صراع وخراب مستعجل وتفتيت لمؤسسات تاريخية وهدم لثوابت جوانا وشعارات باسم المصلحة والدين..الميدان بقى مليان شعارات وكلام تخين ومفردات غريبة وصفحات على الفيسبوك وتويتر وشتيمة وسب دين..أتارى الثورة قلابة وغليانها قلب معدتنا وطفح علينا طفيليات وميت ألف ناشط ومدونين..الثورة كانت زى الزلزال اللى خلى عاليها واطيها وطلعت علينا كل المشاعر المكبوتة وبقينا نثور على روحنا حتى وإحنا نايمين ..الخلاصة ربنا يعدى الأيام دى على خير وترجع المحروسة من جديد أم الدنيا ونعيش فيها كلنا رغم إختلاف رأينا متوحدين..العام الجديد بيدق على الأبواب وبلدنا خدنا منها كتير وخيرها علينا كلنا فيا ترى إحنا حنقدم ليها إيه وعلى إيه يا ترى ناويين..يا ترى حنرجع نبنيها من تانى ونحب بعضنا كلنا وللاحنشمت فينا الأعادى ونحقق أمانى ولاد الأبالسة الشياطين..سنة جديدة عليكى يا مصرنا يا غالية وسنة جديدة بالخير علينا كلنا مسلمين ومسيحيين.
.سنة جديدة عليكى يا أمنا ويارب يهدى أصحاب الإئتلافات والإخوان والسلفيين..سنة جديدة عليكى يا أرضنا وحضننا ومأوانا كلنا وربنا يهدى ولادك ويشفيكى من حمى المد الليبرالى أو العلمانى أو اللى عاملين فيها ناشطين..سنة جديدة عليكى بالخير وإعلامك مؤدب ونظيف وخالى الدسم من كل بذاءة وفتنة من دود الأرض واللى فجأة إفتكروا نفسهم أصحاب قضية وثوريين..فى أمريكا والدول المتقدمة إخترعوا بابا نويل ييجى ويوزع هدايا لكن إحنا فى بلدنا إخترناكى تبقى ماما نويل لكن إحنا اللى حنهاديكى ولو طلبتى حتى أرواحنا أحنا مستعدين..صعب ولاد أرض الكنانة يخزلوها وإن شاء الله يقدموا ليها أغلى هدية واللى بتتمناها وهي إن كل ولادها وطوائفها يكونوا متحدين..ماما نويل مش عاوزة حاجة لنفسها هى عاوزانا نحافظ على هيبتها وكرامتها ونكون للى بيحصل حوالينا فاهمين..عاوزانا يد واحدة وقلب واحد وبتطالبنا نكون دايما للدفاع عنها مستعدين..
ماما نويل عاوزة هديتها حاكم عادل وحازم يكون خادم للشعب ويكون بالناس رحيم وأمين..عاوزة مجلس شعب فيه ناس بتعبر عن أمانى الناس وأمالها مش لمصالحهم وأفكارهم متعصبين..عاوزة منظومة أمن وأمان ورجل أمن بيتعامل مع ولادها بحزم ورحمة وعدل من غير إهانة ومهانة وبالإحترام المتبادل والحفاظ على هيبة رجال الأمن اللى بيساعدونا ويخلونا فى آمان وسلام عايشين..عاوزانا نحفظ الجميل ونذكر بكل إحترام كل جندى فى قواتنا المسلحة مهما كانت إختلافات وجهات النظر لأنهم جادوا بأرواحهم وحفظوا الثورة من أيادى الشياطين..عاوزانا نفتكر بالجميل كل جندى حارس عالحدود بيحميها ويحمينا من كل اللى بيها متربصين..عاوزة قضاء عادل وحراس للعدل وقضاه يحكموا بين الناس بالعدل باعتبارهم سواسية ومتساويين..ماما نويل عاوزة إعلام نضيف خالى من ملوك السبوبة وأصحاب البلبلة اللى بيهيجوا الناس بالسفسطة والإشاعات واللى عن الفوضى فى بلدنا مسئولين..عاوزة ومحتاجة كلمة حق من كل صاحب قلم أو كاتب رأى من غير منظرة أو شو إعلامى أو وفود أجنبية نعزمهم على فضايحنا علشان يكونوا شاهدين..ماما نويل عاوزة هدايا كتير من ولادها بس ياريت نبدأ بدول وقبل أى هدية لازم ندعي بكل إخلاص إن ربنا يحميها حتى مننا ويجعلها في أمان ليوم الدين..كل سنة وماما نويل بكل خير وسلام ويارب تحفظها لينا ولأحفاد أحفادنا اللهم آميييين يارب آميييين...!!
said_elmasryfahmy@hotmail.com