fiogf49gjkf0d
المزاد ..!!! أ
لا أونا ..ألا دو ..ألا ترى ..فُتح المزاد ..!!
قَرب قَرب وتعالى وشوف وطن بيبعوه ولاده برخص التراب..تعالوا وشوفوا ناس بتحرق بلدها وبمنتهى الإمعان فى الكراهية وبينعقوا فينا زي الغراب..وحوش فى هيئة بشر اللى بيحرق واللى بيقتل واللى بيسحل واللى عاوز يهدد هيبة الدولة ويفرض علينا أسلوب الغاب..أتارى البلد دى مرصودة وأتاريها مُحاطة بعدو من الخارج لكن الأخطر من اللى جواها واللى قاعدين ينهشوا فيها بحجة اللوم والعتاب..أتارى مش كفاية علينا وقف الحال ونزف المال ووقف حال الإقتصاد لكن كمان إحراق ومولوتوف وأطفال شوارع وضحايا من رصيد الوطن من الجنود والشباب..مين اللى قال إن الصورة اللى بنشوفها هى ثورة أو مظاهرة هو من إمتى كان عنوان أى ثورة يبقى هو الخراب..يا خسارة عليكى يا بلد لما ولادك يعملوا فيها وطنيين ويقعدوا يزايدوا عليكى وهم شايفين نار الفتنة على بُعد خطوة من الباب..ياخسارة عليكى يا بلد لما يبقى إعلامك ومثقفينك واللى عاملين ناشطين يروحوا يخلوا الصورة هَم وكرب وحياتنا هباب فى هباب..وده وارد وممكن مدام فيه ناس ممكن تحرق وتقتل علشان 50 جنيه أو حتة لحمة أو حتى أكلة كباب..تعالى وشوف نتيجة الدلع والطبطبة والنمل لما يطلع له أسنان مسوسة وأنياب..كان لازم يحصل كدة مع غياب حزم الإدارة وسوء الحزم والإطمئنان لكلمة شرف من ناس إتعودوا على المراوغة وعشق الأنا والذات وهمجية من غير عتاب..صعب لما تغيب الحكمة فى إدارة الأزمات وأصعب نسيب مشاعرنا لإعلام مغلوط وناس بيقولوا عن نفسهم نشطاء ومثقفين بيدوروا عن دور وعاوزين يسوقونا زى الغنم والدواب..المزاد إنفتح ياللا يا مشتاق تعالى وإخرب لك حاجة وخُد لك صورة مع مبنى محروق أو تاريخ بيدمروه أو إطلع فى برنامج علشان يلمعوك يمكن فى يوم تبقى واحد من النواب..يا خسارة كانت زمان بلدنا كل ماتزيد فى العمر نشعر وكأنها شابة مش عارف ليه حاسس دلوقت إن الوطن شعرُه شاب..!!
 
قرب قرب وتعالى وشوف لما البلد ولادها بيفضحوها عالفضائيات وفى الشارع بيشعللوها وبيزيدوا فيها النار واللهيب..وكأن دود الأرض طلع من جحوره علشان ينهش فينا ويزرع الفتنة والخراب ويخلى الوطن حزين مقهور كئيب..تعالى شوف بانوراما الميدان وناس على كل شكل ولون اللى لابس خوزة واللى لابس كوفية واللى لابسين أقنعة على وجوههم واللى لابسين جلاليب..الميدان مليان بكل شكل ولون اللى بيقولوا عليه من الناشطين واللى صدق إنه إعلامي واللى مرشح فى الإنتخابات واللى عامل فيها مثقف وأديب..ماحدش بقى عارف حاجة ولا فاهم إيه اللى بيحصل لكن الأكيد إن حوالينا ناس ليها مخطط مسبوق ومدروس وخطط ممنهجة وخرائط جاهزة موجودة من زمان فى الدواليب..خد بالك وإتعلم درس من اللى بيحصل واللى حيحصل وإعرف إن ده جزاء قلة الخبرة واللى بيصنع ثورة هُواه من غير تشطيب..أكيد حيبقى سؤال غبى للى بيسأل من مصلحة مين اللى بيحصل ومين اللى عاوزها فوضى وإن الشرعية عنها تضيع وتغيب..خليها ثورة أوخليها فوضى أو خليها زى ما إنت عاوز وخلينا نتفرج ونشوف العدو من الحبيب..لكن مش علشان واثقين إنها محروسة يبقى نسيبها تتوه عن عنينا أحسن تضيع من إيدينا وزى مابيقولوا مرة تصيب ومرة تخيب..!!
 
 اللى بيحصل فى بلادى شئ غير مسبوق وخلى كل واحد مش مصدق اللى بيشوفه وقاعد بيفكر فى الأحداث حزين مذهول..السيناريوهات وحفلات المزاد اللى على مستقبل المحروسة زادت عن حدها وأصبحت فوق المعقول..المزايدة على إستقرار الوطن ونهشه على الفضائيات ومستوى التخريب وإثارة الفتن شئ همجى وغير مقبول..صعب لما نشوف مصالحنا من خرم إبرة وننسى مستقبل وطننا لكن لازم كان يحصل كده مدام الرؤية غايبة والفكر مقفول..للأسف حوار الطرشان لسه مٌسَيطر على كل الأطراف والود خلاص غاب والغربان زادوا حوالينا والخطر عالباب وبقينا فى إنتظار إنذار بعلم الوصول..صعب نفرط بغباوتنا فى مصير وطن بناه أجدادنا بالعرق والدم وزرعوا فيه المجد والعزة وتيجى الأحفاد تبيعه بتراب الفلوس وتفرط ببلاش فى المحصول..للأسف اللى بيحصل فينا ده الكل ودون إستثناء عنه أكيد مسئول..كان لازم يحصل كده مدام لسة بنفكر بس فى مصالحنا وغرائزنا ولغينا من قاموس حياتنا التفكير بالعقول..ياترى هو السبب مين رخاوة العسكر وللا طيور الظلام وللا أنصاف المثقفين والإعلام الرخيص وللا أكل الفول..ربنا يسترها وتمر الأيام عليها وعلينا بخير ويكفيها ويكفينا شر الناشطين السيس وأدعياء الثورجة واللى فيها لأخفيها واللى بيفكر بعقول العجول..صعب قوى وعيب على أى واحد عامل فيها ثورجى ويوهموه وكأنه صاحب قضية وهو للأسف مضحوك عليه دلدول..
 آآآآآه ياوطن ياريتك تقفل مزادك علينا كلنا وتبيعنا فى سوق التلات لأنه للأسف أتاريك طلعت كتير قوى علينا والظاهر طلعنا كلنا وبدون إستثناء فلول..!! said_elmasryfahmy@hotmail.com