fiogf49gjkf0d
على حزب الريح ما يودى ..!!!
أخيرا إبتدأت الإنتخابات وعلى خير إنتهت المرحلة الأولى زى ما وصفوها بمنتهى الشفافية..وزى الجميع ما شافوا بالصوت والصورة شبه إكتساح غير مسبوق للأحزاب إياها والجماعات الدينية..النتيجة كانت معادلة بين قوسين ولغز هيروغليفى خاص فقط وحصريا على الجينات المصرية..والدليل لما تلاقى كتائب من الإعلاميين واللى عاملين مثقفين واللى دوشونا طول النهار والليل بثوريتهم الزائفة الموسمية..وأصحاب القنوات المفروشة والمذيعين اللى بياكلوها والعة بالملايين وبيتنططوا من قناه لقناه بسبب فرق السعر وبشعار أبجنى تجدنى تلاقيه يتحول زى ما إنت عاوز لقذائف كلامية..وطبعا لا ننسى أصحاب دكاكين الإئتلافات والحركات ورواد التظاهر والإعتصامات من أكبر رأس فيهم لغاية اللى بيبيع فى الميدان فول وبطاطا سخنة وطعمية..وكمان ما تنساش السادة المحفلطين المزفلطين بتوع أعتقد وأظن وإذ ربما ضيوف أصدقائهم وحبايبهم فى البرامج الحوارية.. عمرك شفت كاتب أو إتنين بالعدد وعلشان بيعارضوا العسكر تلاقيهم موجودين وحصريا على شاشات القنوات الجديدة بنفس الكلام من غير مصداقية.. شوف وطل بعينك ولا حظ الكاتب الفلانى والصحفى العلانى وأسماء كتير شبه مغمورة وناس غاوية التلميع وناس بتعشق التشنيع ومش مهم الوطن المهم السبوبة والنقدية..روح وطوف وشوف حزب الإعلاميين اللى إبتدى المشوار وبدأت من أول مرحلة وصلة الغزل العفيف للتيارات الدينية..راقب تغيير اللهجة وأسلوب النفاق والمجاملة وطريقة سرد تاريخ النضال المزعوم لحركات وجماعات التحرر الدينية..أرجوك لاحظ الرجفة والقشعريرة الملحوظة فى حديث بعض السياسيين بعد نتيجة المرحلة الأولى من الإنتخابات البرلمانية..ناس كتير من جماعة على حزب الريح ما يودى فى لحظة غيرت مواقفها وراهنت على الرايجة فاكرين إن دى نهاية الصورة وأتاريهم يا عيني عليهم لسه مش فاهمين القضية..نفس التحول وتغيير الذمم والمبادئ بعد سقوط منظومة الحكم الفاسد الماضية..ولاحظ كمان التقليد الخايب لمذيعى التليفزيون الرسمى لما يقلدوا مذيعى الجزيرة فى بتر الكلام لما يكون عكس الإتجاه وعلى غير هوى أو مزاج السادة أدعياء الثورية..شوف ولاحظ تسابق السادة الكتاب ورؤساء التحرير اللى كانوا فى الصف التالت منتظرين نظرة رضا ودلوقت بيصبغوا كتابتهم بالثورجة قال يعنى كدة بقوا بيعبروا عن الثورجية..تقدر تقول متحولين أو تقدر تقول راكبين الموجة حسب ما تميل البوصلة بمنتهى الإنتهازية..المشكلة إن فيه ناس مش عاوزة تسيب حاجة من فتافيت الدنيا لأى حد تانى ومش داريانة إن الدنيا مشاركة وأمانة ومسئولية..غياب ثقافة التعامل مع الآخر خلت كل واحد يفتكر نفسه الثورجى الوحيد وهو بيمشى على حزب الريح أو تبع الرايجة وكلها سبوبة وملعون أبو القضية..الملعب بقى مليان غربان كتير وتعالب وضباع وقرود بتتنطط على كل غُصن من غير مايسترو يضبط لسانهم ويحدد ليهم الخطوة اللى جاية..ياريت السادة الملعلعين فى الفضائيات تحت مسمى رؤساء أحزاب يقدروا يتعلموا ويعلموا كوادرهم يعنى إيه ديمقراطية..ياريت السادة جنرالات الأحزاب يروحوا يبنوا قواعد وكوادر للأحزاب قبل مايتحفونا بنظرياتهم وخبراتهم الوهمية..أينعم تكوين الأحزاب وشروطها كان سمك لبن تمر هندى وسلق بيض لكن فيه أحزاب علشان تلحق الموجة وافقت على الشروط بس علشان تظهر فى الصورة وتلبس ثوب الزعامة الكارتونية..والنتيجة صراخ وعويل وبقوا عاملين زى الطالب الفاشل اللى عنده دور تانى وبيلملم المدرسين للدروس الخصوصية..أحزاب ورقية وزعامتها جنرالات من غير جنود أو كوادر رصينة فاهمة يعنى إيه ممارسة الحياة الحزبية..مصيبتنا جميعا فى السادة أصحاب أنصاف العقول والخبرة والدراية بدهاليز سياسة بناء الأوطان وتكوين ثقافة مواطن وتربية جيل جديد بأبجديات خالية من كوليسترول التخلف ودهون التعصب والقبلية..الوطن مُحاط بالضبابية وعيون اللئام وكل ده مقدور عليه لكن المشكلة في اللي من جوه البيت وعامل فيها وطني وثورجي وهو أبو الإنتهازية..مشكلة الوطن فى الإيثار وغياب القدوة اللى بتقدم نفسها قربان فداء للوطن وتغليب مصلحته عن كل الأهواء والمغانم الشخصية..أعضاء على حزب الريح ما يودى لازم يكونوا معروفين ولازم نلفظهم من حياتنا لو كنا بجد عاوزين نحفظ بلدنا من المخطط المرسوم ليها من اللى عاوزين يقهروها وينتزعوا مكانتها التاريخية..المخطط واضح ومعروف مرة مسلمين وأقباط ومرة متظاهرين وشرطة وبعدين محاولة كسر هيبة مؤسسة العسكر الوطنية..ولسه السيناريو طويل مابين إخوان وعسكر ومجلس نيابى واستشارى أو أراء سلفيين وصراعهم مع المثقفين والفنانين وصراع الفن وأراء المعارضين من المتأسلمين على حياتنا اليومية..السيناريو صعب وشديد القتامة والحياة ممكن تتحول بين يوم وليلة من سواد شفناه مع حكم فاسد لحياه لونها كحلى غطيس مع خسارة غير مسبوقة إقتصادية..سياحة مشلولة ومصانع أسيرة ووقف الحال ومطالب عمال على بطال مابين سياسية وفئوية..لازم نفوق يا ناس ونشوف قدامنا إيه كم الألغام حوالينا فى صورة غلاء أسعار وزيادة بطالة وبورصة بتروح وتيجى وخسائر بالملايين بصورة شبه يومية..آن الآوان يا إما نفوق يا إما ندعى جميعا الله الواحد القهار ياخدنا جميعا ويخلق ناس جديدة تعرف قيمة وطن خلده ربه فى كتابه بس إستوطنه ناس ماعرفوش قيمته وبيضيعوه بجدالهم وسفسطتهم البيزنطية..مصر ثم مصر ثم مصر هى الأبقى من العسكر والإخوان والسلفيين والعلمانيين والليبراليين والمسلمين والمسيحيين وكل الطوائف السياسية..مصر أهم من صراع الديوك والمجلس النيابى والكراسى الزائلة والدستور وللا الرئاسة والبيضة وللا الفرخة وألاعيب أى فصيل فاكرها تورتة وعاوز يلهطها تحت بند الشرعية..مصر محتاجة الجميع إلا جماعة على حزب الريح ما يودى وأصحاب التجمد وأفكار العصور الحجرية..تفتكر حنقدر ؟؟ يارب نقدر وهى دى الخلاصة وهى دى القضية..!! said_elmasryfahmy@hotmail.com