fiogf49gjkf0d

عسكر فى المعسكر ..!!

زمان قالوا أسمع كلامك أصدقك أشوف أمورك أستعجب وسبحانه هو العليم بالقلوب والنفوس..الميدان ما شاء الله مليان وجوه كتير اللى وطنى واللى غاوى شُهرة واللى نسى ثوريته فى الميدان واللى عاوز يبقى زعيم واللى عاوز يلطشها وهو فى الأصل عليها جاسوس..واللى كان مهضوم حقه واللى عارف بس مش فاهم واللى لا عارف ولا فاهم اللى بيحصل إيه حاجة كدة زى التيوس..وناس ماسكة يُفط وناس رافعة شعارات وهى مش فاهماها وتقول لا للإعلان فوق الدستورى وهو مش فاهم الفرق بين سيد قشطة والجاموس..فينك ياعم نجيب الله يرحم أيامك لو كنت عايش اليومين دول كنت حتشوف بانوراما ودراما فى الميدان فشر بين القصرين وقصر الشوق لأن السيناريو هناك محبوك ومدروس..سيناريو الميدان دراما عالمية فيها البطل وفيها شجيع السيما والسنيورة أم صوت عالى وعم عبد السلام الغلبان وشلاطة صاحب المولوتوف اللى عالميدان مدسوس..ياخسارة عليك يا زمن لما المصرى يموت بسلاح أخوه ده بمولوتوف وده بخرطوش وده بقنابل غاز وكأنها حرب الرومان والمجوس..

 

يا عينى عليكى يا بلد لما ولادك يتناحروا على مغانمك والعدو على كل لون ونوع حوالين السور متربص ومرصوص..اللى بيحصل فى الميدان وصراع السُلطة الوهمى سيناريو سابق التجهيز ومعلوم ومدروس..الضرب تحت الحزام بقى عالمكشوف واللى تكسب به إلعب به وتحت شعار مبادئ إخوانجية أو سلفية أو علمانية وليبرالية أو فلول والكل جاهز بالنفوذ والألاعيب وزكايب الفلوس..مش عارف ليه حالة الهياج والفوقان المفاجئ وكرسى فى الكلوب وخليها ضلمة رغم إن النفق أخره فيه شمعة بس جوه فانوس..لكن إن شاء الله كل السيناريوهات بإذن الله مردودة ومقدور عليها بوعى الناس ولأن الوطن ده ببساطة مُصان من الرحمن ومحروس..!! الدنيا ظاطت وباظت وكل من هب ودب قاعد يعطى أوامر وتوصيات للعسكر بترك المسئولية وكأن سيادته عن البلد مسئول..مين قال إن الثورة فى الميدان بس والناس محروقة من البطالة وإلتهاب الأسعار وإقتصاد متهاوى ووصف أى رأى معارض بالفلول..يا ترى مين اللى ولع الميدان وبيروح فى الليل يعمل إتفاق تانى ويزايد على وطنية الناس وكأنه من أحفاد عبد الله بن سلول..مين اللى قاعد يقود الأوركسترا وبيوزع اللحن ده يطبل وده يزمر وده قاعد يدندن على الأرغول..ده مصير بلد يا خلق هووه مش سفسطة وهلفطة وشعارات وسيناريوهات وكل من هب ودب قاعد يفتى ويقول..بالذمة اللى جاى وبيطالب بالتغيير فى وسط الطريق وعاوز يشيل ده ويجيب ده يبقى عاقل وللا مخبول..مين اللى عاوز يخلينا محلك سر ومين اللى طلع طبل وزمر ونادى بحياه العسكر وفجأه لقينا لسانه فالت وقلبه من العسكر مغلول..روح شوف الميدان ولاحظ اللى بتلهب حماس الشباب وتحفزهم على مهاجمة الشرطة والعسكر بمنتهى الحرفية بكلام بذئ غير مسئول..روح وشوف القبضاى اللى بيوزع الولاد الصغيرين يشتم هنا ويضرب هناك وتلاقيه بياخد إتاوه من بياعين الشاى والكشرى عينى عينك وعاوز الأزمة تطول..عيب قوى تعمل فيها ثورجى وزعيم وإنت من غير طعم ولون ومصنف بين الناس دلدول..عيب قوى نسيب ناس فرحانة بطلبات أمريكية وغربية بتسليم السلطة فى التو واللحظة بمنتهى الصفاقة وعمالة تبلبط فى الفضائيات بسمومها وقاعدة تصول وتجول..المشكلة مش فى حكم العسكر المشكلة إنهم خلاص إنكشفوا وقاعدين مستنيين توزيع المحصول..خليهم يلعبوا ويمرحوا لكن يا ناس اللعب مش فى مصير بلد ولا تخوين لحماه وطن رغم بطئ الأداء وخدوا بالكم من أفعالكم لأن كل شئ مُسجل فى الكشكول..فيه ناس محتاجة تفهم وفيه ناس فاكرة إن الشجاعة مجرد حديث فى فضائية أو إشتراك فى مظاهرة أو إن شرف الوطنية مجرد جرعة جفاف ممكن يبلعوها فى محلول..!! الحالم بحجز العسكر فى المعسكر واهم وغلبان ومسكين..نازل الميدان زى البغبغان وبيردد كلام محفوظ متلقن بأجندة من ناس محترفين..تقدر تقول لى إيه اللى لم تنتن على تنتون واللى بيعارض وثيقة السلمى أو إدارة العسكر يبقوا مين..تقدر تقول وبكل أمانة وضمير البديل الموازى ومين اللى يقدر يحفظ أمن المصريين..ا

 

لعسكر مش ملايكة لكن إن كان الكل وحش فهو أحسن الوحشين..قبل ماتشوف نص الكوب الفاضى شوف النص المليان وشو ف مين اللى محافظ على شعرة معاوية وعلى بواقى الأمن فى نفوس المواطنين..إرضاء كل الناس غاية لا تدرك وصعب تحقق أمانى الناس والملايين..ناس تقول إنتخابات وناس مش عاوزاها وعيون قاعدة مستنية فوضى منظمة وفى خراب البلد عشمانين..الناس من كتر اللى شافوه من ناس منهم غيروا وبدلوا مواقفهم بقوا من وعود العسكر قلقانين..العيب فيكم مش فى العسكر لأن الناس دى حافظت عليك وعلى بلدك سنين وسنين..الإعتراض على سياسة العسكر شئ طبيعى وومسموح لكن الغير مسموح إهانة الرموز العسكرية الوطنية من أى جهه مهما كانت مين..الكلام ده مش دفاع عن العسكر لكن دى كلمة حق لأن إحنا شعب أصيل بيحفظ الجميل ولازم نكون للى حمى ثورتنا بعد الله شاكرين..مصر كلها هى معسكر العسكر وهم حماه الوطن وهم العين السهرانة واللى للوطن حافظين..أدى الإنتخابات ماشية بفضل الله ثم الجيش زى الفل والساحة بقت جاهزة للفعل مش للسفسطة والهواه والمراهقين..أدى البلد فى طريقها لإستلام أول برلمان حر بعد طول إنتظار ياريت نشوف بقى همة السادة اللى عاملين فيها وطنيين..كل مظاهرة وأنتم بخير وكل إنتخابات حرة وأنتم طيبين..السادة دعاه الوطنية أدى برلمان حر وقريبا رئيس منتخب والكرة دلوقتى فى ملعبكم وأدينا قاعدين فماذا أنتم فاعلين..!!!

 

said_elmasryfahmy@hotmail.com