fiogf49gjkf0d

ياعزيزى كلنا إخوان ..!!

خلاص دق الجرس وإبتدت تظهر علينا بشاير وفتاوى السادة المرشحين..الإسلام السياسى ركب الناقة وشرخ ولا عزاء لبواقى المنافسين..وشفنا بالصوت والصورة الصراع الغير متكافئ بين جماعات محترفة وفى الكفة التانية كتل سياسية من المراهقين..الصورة لا تكذب وده كان واضح من الإستعدادات والمؤتمرات وألاعيب غسيل المخ وتخويف الناس من المنافس بشعارات معينة ومقصودة من الشريعة والدين..خلاص بقى الخيار واحد من إتنين يا تختار بتوع الثقافة والرغى فى السياسة وتغضب ربنا يا تختار إخواننا المتأسلمين..مش مهم مين تختار وأهو كلهم بركة سيان إخوان أو سلفيين..مش مهم الوجوه مدام المجلس حيتوزع حسب الشرع هم ليهم الأغلبية والفتافيت لأصحاب النظريات الورقية اللى جعجعوا فى الميدان وسابوا الشارع يبرطع فيه تنظيم المحترفين..والناس ياعينى غلبانة حيرانة مابين نظام إنتخابى هيروغليفى وبين تغيير هوية نظام ألغى هوية وأدمية المواطنين..حبايبنا شغلوا الناس بالميدان وراحوا على الشارع وتوغلوا بين الناس وكسبوا عطف الناس ا الغلبانين..طبعا وليه لأ مش هم دول اللى ياعينى كانوا على مر العصور مضطهدين..مش دول اللى إختلفوا مع كل حاكم ونزلوا تحت الأرض فى إنتظار فرصة ذهبية يفرضوا فيها مخططهم على الناس أجمعين..نتيجة الإنتخابات الأولية زرعت فى قلوب الناس بلبلة والكل بقى مش عارف البلد حيحصل فيها إيه ولا إحنا على فين رايحين..ناس تقول خلينا نجرب وأهو الميدان موجود لو مالت البوصلة حنغيًر اللى مال ونعدل المعوجين..وناس تقول أهى دقنى أهه لو ركبوا مش حينزلوا ولا حينفع معاهم الطبل البلدى ولا تظاهرات الميادين..الناس البسيطة بتسأل وهى قلقانة يعنى إيه إسلام سياسي ولو غلط واحد من حبايبنا نحاسب المذهب السياسي وللا نحاسب ثوابت الدين..الناس بتسأل مين اللى بيصبغوا أنفسهم بخصوصية الدين وبيلعبوا سياسة بألاعيبها رغم أن أغلبيتنا مسلمين..على حد علمى مفيش توكيل أرسله ربنا لأحد ولا أمر حد يبقى وصى على المسلمين..والسؤال يا هل ترى اللى بيتكلم باسمنا ده من أحفاد قريش وللا من أحفاد رسولنا الأمين..بصراحة التصريحات الإعلامية لحبايبنا مليانة عجرفة وإستفزاز وثقة وكأنهم بقوا هم الصفوة وباقى المجتمع سبايا ومحكومين..أرجوك بص للصورة من بعيد شوية وشوف المخطط اللى ماشى على قدم وساق لتفتيت بلدنا وإحسب معايا كم العيون اللى عليها متربصين..فيه ناس مستعدة تتنازل عن أى شئ من أجل الوصول وتنفيذ أى أجندة علشان تحكم ومهما كان المستفيد مين..روح وشوف وإقرأ كل الأخبار وشوف السيناريو الواضح والغزل العفيف بين الأمريكان اللى حشوا دماغنا بفزاعة الإسلام السياسى ودلوقت بيغازلوا المتأسلمين..روح وراقب بالونات الإختبار من التصريحات اللى شوية يفزعوا بيها الناس وشوية ينفوا كلامهم والناس بقت مش عارفة تروح شمال وللا يمين..الله يجازى النظام الفاسد اللى كان واللى خلى أى بديل عند الناس أرحم من حكم الوطنى البائد ومسئوليه الفاسدين..روح ولاحظ قصائد الغزل فى الإعلام والسباق الجديد للمتحولين من سياسين وإعلاميين..لاحظ اللى بيوصفهم بالحكمة وبتاريخم الوطنى وكفاحهم على مدار السنين..على عينى وراسى جهاد أى فصيل لكن ما عرفناش نضال وكفاح ضد مين..يا ترى النضال كان علشان يبنوا وطن وللا علشان يكونوا فى الحكم مشاركين..السيناريو لم ينتهى بعد ومصر مش سهل تتسلم تسليم مفتاح كده ببساطة لأى جهه مهما كانت مين..القصة لسه فيها كتير ومهما كانت قوة التنظيم العالمى لحبايبنا ولهفتهم على حكم مصر لكن لسه الدنيا بخير ولسه البلد فيها ناس فاهمة الحدوتة وعارفة تتدخل إمتى وفين..مفيش حد بيحلل حرام أو بيكره حلال لكن الكل مؤمن إن الدين لله وإن إحنا شعب مؤمن مش محتاج أوصياء ولا جماعة تحكم باسم الدين..الناس عاوزة حرية وعدالة إجتماعية بجد مش شعارات إنتخابية يخدروا بيها المواطنين..الناس محتاجة حياه كريمة حرة مش نخلص من أمن الدولة وبصاصينه تطلع لنا لجان الحلال والحرام زى تصريحات الأخ الشحات مرشح السلفيين..الناس عاوزه علاج ورغيف عيش نظيف ووظيفة مناسبة وبيت محندق يجمع إتنين محبين..الناس محتاجة تفرج وتعيش فى أمان مش نخرج من فساد ندخل فى قمقم ونرجع من تانى للعصر الحجرى وأفكار التخلف والمتعصبين..الناس محتاجة ثقافة وفن وأدب مش محتاجة فتاوى من تحت بير السلم ولا فذلكة رئيس جماعة أوعامل عليها أمين..الحلال واضح والحرام معروف وإحنا شعب مؤمن بدينه وحريته لكن مؤمن أكتر إن اللى المسئول الوحيد عننا هو الله رب العالمين..كلنا إخوان فى الوطن والحرية والكرامة مش إخوان أسلمة حياتنا ومزج السياسية بالدين..كلنا إخوان فى الوطن مسلم مسيحى إخوانى سلفى علمانى أو ليبرالى الكل فيه أصحاب حق وفي كل مراحل بناءه مشاركين..ياعزيزى كلنا إخوان كلمه صدق لكن اللى عاوزين يطبقوه علينا ده محتاج عنوان عمنا إحسان فى روايته المشهورة اللى كتبها من سنين..مصر لسه بخير وإفتكروا إن مش ده هو المشهد النهائى ولسه بدرى على إسدال الستارة على السادة المشاهدين..ياترى حيفهموا إن كلنا فى الوطن إخوان وللا كلاكيت عاشر مرة وترجع ريما لجحورها القديمة وتفضل عيونها صاحية ومفنجلة والناس نايمين..ياترى حنبقى كلنا إخوان وللا حيحكمونا أصحاب اللى تغلب به إلعب به والغاية تبرر الوسيلة والسادة المتأسلمين..

يارب تحفظ مصر وشعب مصر اللهم آمين يارب آمييين..!!

 said_elmasryfahmy@hotmail.com