fiogf49gjkf0d
غزوة الخرفان ...!!!
سبحان الله فعلا الدنيا جدا صُغيًرة والدليل إن الأحداث بتتكرر زى ما هى ولا كأن هناك تغيير ولا كأنه إتغير الزمان..وياريتك تقعد وتفتكر حادثة معينة تلاقيها حصلت هى هى بالرغم من تغيير الحال والظروف والمكان..عاوز تتأكد من كلامى روح وراقب الإنتخابات والمرشحين ولاحظ هوجة الإعلام ويفط المرشحين وطرائف الإعلان..وإرجع بالذاكرة لزمن الحزب البائد وفلوله اللى سيطروا على كل حاجة فى بلدنا واللى المفروض راحوا خلاص فى خبر كان..روح وطوف وشوف الدعاية الإنتخابية للأحزاب اللى راكبين الموجة اليومين دول ومنتشرين فى الشارع والإعلام وفى كل مكان..حتلاقى نفس التكنيك والتكتيك الفرق بسيط خالص فى الإسم والشكل والعنوان..نفس الحروف بس إتلخبطت وإتشكلت من جديد وإتغيًرت من وطنى إلى إئتلافات وسلفيين وإخوان..نفس النوايا بس بشكل جديد و مع ناس من نفس الفصيلة بس ده كان ببدلة ودلوقت متلفحين بجبه وقفطان..يا أخى حاجة غريبة أتارى فيه ناس مش بتتعلم من اللى فات ولا عاوزه تفهم اللى جرى واللى حصل واللى كان..زبانية الوطنى مصوا دم البلد وبرطعوا فى خيرها لأنهم كانوا واخدين كارت بلانش وعايشين طبعا فى أمان..وقامت ثورة والناس قالت كابوس وإنزاح وأتارى طلع زيد زى عبيد وشفنا ناس طالعة من الجحور بتنعق علينا زى الغربان..طلع علينا أبو رجل مسلوخة وأمنا الغولة واللى بيطلع من عينه شرار وعامل شجيع السيما وكان مدفون فى الجحر مع الأفاعى والجرذان..أتارى أبو جهل وأبو لهب لسه مماتوش ولا راحوا فى الوبا ولا راحوا فى خبر كان..أتارى الجينات بتحتفظ بمواصفاتها وتنتقل للورثة وبعد سابع جد بتتحفنا بسلالة بتموت موت فى السُلطة ونفسها فيها ياعينى بعد طول حرمان..بيقولوا مُنظمين ويقولوا جاهزين وقالوا كانوا فى السراديب مستعدين والكل بيحلم بالكرسى وطمعان..المهم إنه مفيش فرق بين عابد للسلطة أو عاشق للسطوة ولا فيه فرق بين إبريل أو يناير ولا فيه إختلاف فى الأسلوب بين وطنى وإخوان..نفس أساليب الدعاية وإكشاك المرشحين ولا فيه فرق بين شعار من أجل مصر ولا شعار معا نبنى مصر الإثنين عند عُشاق السلطة سواء وسيان..الوطنى كان بيوزع أراضى الشعب وتأشيرات العُمرة والحج وجماعتنا بتوزع على الناس لحمة وبتعمل قُرعة على شوية معيز وخرفان..وكله شرعى وحلال مدام الخروف بيسموه جهاد ولحم المعيز تقوى أوإيمان..نفس الضحك على الدقون مع تبديل الشعارات من سمك لبن تمر هندى لفتاوى الشرعية فى أصول الحكم والملوخية وكيفية حُكم الإنس بألاعيب الجان..ولو مش مصدقنى روح وراجع تصريحات المشايخ وقت الإستفتاء الأخير لما سموها غزوة الصناديق والمرة دى نصبوا الشوادر والخيام وأعلنوها غزوة الخرفان..عاوزين يلحسوا مخ الناس بحته لحمة لزوم الفتة مع دعوة وحجاب محبة وسبحة صلاه كمان..وشد وجذب وتهديد ووعيد مع باقى الأحزاب وفرض الأغلبية فى القوائم بالمحايلة وشُغل التلات ورقات وتغيير الذمم والعنوان..كان زمان المؤمنين بيحاربوا فى سبيل إعلاء الدين ونشر الحرية والعدالة لكن مش حسب مبادئ حزب العدالة والحرية ظل وخيال الإخوان..جماعتنا وزعوا القائمة حسب الشرع والقسمة الشرعية يعنى ياخدوا ضعف المقاعد لأنه فى البطاقة الإنتخابية حزب دكر وباقى الأحزاب التلت الباقى بإعتبارهم من الأخوات أو النسوان..مش الشرع بيقول للذكر مثل حظ الأنثيين وللا عاوزين تجادلوا فى شرع ربنا كمان..عرفت ليه هم مستعجلين على الإنتخابات وعاوزينها قبل الدستور لكن لو فيه حاجة ضد المصلحة يقولوا على إيه مستعجلين دى العجلة من الشيطان..عرفت ليه وصفوا المشاركة فى الإستفتاء الأخير غزوة الصناديق يبقى ليه تستغرب وصف الدعاية الإنتخابية بغزوة المعيز والخرفان..وكله من وجهه نظرهم جهاد فى جهاد ومن أجل عيون الكرسى كل شئ مباح والله المستعان..!! علشان كل ده لازم تفكر كويس قبل الدخول للصندوق وتعطى صوتك ولازم تعرف تختار..كل شئ واضح قدامك وبلاش تصدق كلام الشعارات وأصحاب التهديدات الأونطة وبلاش تحتار..أوعى تصدق كلام الأمريكان أو جمعيات حقوق الإنسان أو أصحاب جواز السلطة بالدين بطريقة المسيار..أوعى تبيع صوتك ببلاش وأقبض الثمن كرامة وصدق وحرية وإعطى صوتك للأحرار..الدين لله والوطن للجميع والرب خلق الكل سواسية ولا عمر حديث قال إختاروا أبو سبحة وجلابية ولا فيه ملاك شاور على حد فيهم وخلاك تختار..بلدك محتاجة رجالة بجد علشان يبنوها مش ناس متلفحة بالدين أو بالمصالح أو بالتكتيكات شطار..أوعى تبيع صوتك بحته لحمة أو يلبسوك الفروة ويخلوك تمأمأ وتبقى عيشتك مرار فى مرار..صوتك أمانة أوعى تفرط فيه أو تصدق مشايخ الغزوات وبياعين اللحمة وملوك لعبة القط والفار..الخرفان وزعوها قبل العيد أوعى يدبحوك إنت كمان ويستحلوا صوتك بعد العيد عينى عينك وشرعى وحلال فى عز النهار..عاوزين نائب نظيف وشريف مش ناس بتوع شعارات وإئتلافات أو للدين تُجار..سيبك من الفلول وأصحاب البغال والخرفان وشارك بضمير وخليك من غير تأثير وصاحب قرار..بلدنا بلد عظيم وبلد حضارة وتاريخ وصعب وبعيد عن شنبهم يمثلها خروف أو حتى فار..إنسى كل حاجة وافتكر ولادك وكمان فكر فى بكرة وفتح عينيك وخد القرار..ياترى حتختار مستقبل ولادك وللا حتلهط البلوظة وتفرح بلحمة الخروف وتتلخبط بين الجنة والنار..
خلاص خُلص الكلام والكورة دلوقتى فى ملعبك وضميرك قبل صوتك هو بس القرار..مصر ثم مصر ثم مصر يبقى ليه عاوز تحتار..!!
said_elmasryfahmy@hotmail.com