fiogf49gjkf0d
إبتدى الدرس ياغبى..!!
كانت النهاية كتير غريبة والأحداث أسرع من أى مسرحية هزلية..إهانة ومهانة ودم وقتل وقلة قيمة ونهاية كتير درامية..ومناظر مثيرة وروايات مختلفة وحكاوى ألف ليلة ليلة وإدعاءات بطولة وحركات هيستيرية..العالم ياعينى إنقسم إثنين ناس تقول فى داهية غار وناس تقول بطل رغم أفكاره الكوميدية..وناس تقول ديكتاتور وناس تقول هو ده سِلو بلدهم وليه فرعون مايتفرعنش مدام فيه ناس بتسَبح بمجده ليل ونهار لدرجة الألوهية..فيه ناس كتير ما تعرفش ربنا النهاردة مع الحاكم وبكرة مع الثوار وأهو كله مصلحة وتحت شعار إنتفاضات الربيع العربية..اللى حصل فى ليبيا سيناريو فاضح واضح المعالم والفاعل موجود جهارا نهارا وعينى عينك بمنتهى الجبروت والإنتهازية..النفط ثم النفط ثم النفط وأرجوك إنسى بقى موضوع الحريات وحق الشعوب فيها والكلام الساذج بالكلام عن الحرية والديمقراطية..الناس دى جبارة قوى يا أخى لكن بالأمانة عند كلمتهم قالوا شرق أوسط جديد وأديهم بينفذوه بحذافيره وبمنتهى الإصرار والجدية..عمرك شفت حاكم ومهما كان جنونه ورغم إنه حليف ييجى ويتحالف عليه الجميع ميليشيات وناتو وقيادات سابقة التجهيز مع تفويض صريح من الجامعة العربية..عمرك شفت ناس توافق على إستبدال شيطان محلى بشيطان دولى مع الحفاظ على فرق الأسعار فى مناقصات النفط والإعمار وعودة القواعد العسكرية..عمرك شفت مجلس جامعة يسلم مصير شعب بمنتهى السهولة من بين يد جزار مستبد لمليون جزار من الناتو مستعدين بالسكين والمدفع لهبر منابع النفط العربية..عمرك شفت رئيس مجلس ثورى يروح ويتحايل على اللى دبحوا شعبه ويقدم طلب باستمرار جزاري الناتو علشان يقعدوا شهرين كمان علشان يكملوا مهمتهم الأمنية..معقول فيه ناس تتحالف مع شياطين الإنس علشان يتخلصوا من شيطان صنعوه وخنعوا له بمنتهى الإستسلام والسلبية..الخلاصة ما ينفعش كل هوجة يتقال عليها ثورة ولا ينفع كمان يكون فيه ناس تصبغ الوطن بالدم علشان طموحات شخصية..ولا ينفع كمان ناس كانت بتقول طيب ونعم وحاضر من غير صوت وفجأه نلاقيهم زعماء وقيادات ثورية..يا ناس فيه حاجه إسمها وطن وغير مقبول تأجيره أو تقسيمه لأى جهة مهما كانت بحجة الخلاص من أى نظام والفوز بالحرية..مين قال إن الإستقواء بالخارج هو اللى بيحرر الأوطان ومين قال إن اللى يبيع وطنه حيلاقى مُشترى يدفع لوجه الله الكريم وبمنتهى الكرم وحسن النية..أتارى دراكولا مش تخصص مص دم بس لأن هناك سلالة جديدة من أحفاده بتعشق مص نفط الشعوب وتدوب دوب فى ثرواته النفطية..تخيل ممكن يحصل إيه لما تكون رائحة الجاز أجمل من أغلى العطور جيفنجى أو كريستيان ديور أو أى ماركة من الماركات العالمية..فعلا صدق اللى قال مولد بس صاحبه مش غايب لأنه موجود وعارف إمتى يتدخل ويدخل البيت بعد تلاميذه اللى جوه حصان طروادة يفتحوا له الباب من الداخل وهم بيصرخوا إلحقونا إلحقونا فيه تحت البير فار أو ياعينى حاكم ظالم عنده ميول ديكتاتورية..الناس دى جبارة قوى يا أخى وتأثيرها كتير قوى وأكتر كتير من قوى التنويم المغناطيسية..شفت نظرية الصدمة لما تلاقى وحش يفزعك ويلجم حواسك وتقعد مشلول مش قادر تعمل حاجة وتسيبه يغتصبك من غير مقاومة لو حتى ظاهرية أو شكلية..على فكرة اللى بيحصل ده هو ميراثنا اللى حنسيبه لأحفادنا بدلا من توريثهم وطن حر وبلد كريم بصناعة محلية..بإختصار لازم نتعلم من اللى بيحصل حوالينا ونفهم بقى مين اللى بيشترى ومين اللى بيبيع ومين اللى بيعشق وطن ومين اللى بيبيع القضية..والغريبة تلاقى حركات وإئتلافات سُكتُم بُكتُم قاعدين فى بلدنا عاوزين يولعوها عن عمد والثمن الله أعلم مدفوع أو مؤجل حسب الأحداث اليومية..اللى بيحصل في ليبيا سيناريو سابق التجهيز لكن بأسلوب فج ودموى لكن مش مهم مدام الراجل قتلوه ودبحوه قدام الإعلام وعلى عينك ياتاجر وعلى حسب الشريعة الإسلامية..لما المفتى الليبى يقول القذافى كافر بعد ما كان بيسبح بحمده أيام حكمه يبقى لازم نقرأ اللى بين السطور ونتخيل حياتنا اللى جاية..شفت الإنتخابات ممكن تفرز لك كام مفتى يكفروك إنت وأبوك واللى خلفوك لو كان رأيك معووج شوية أو ضد خططهم السياسية..اللى حصل في ليبيا مش بعيد على أى حد والفيصل هو درجة الخضوع والخنوع للسطوة الأمريكية..الكلام ده مش ضد أى ثورة لكن كان نفسنا نستقوى بسواعدنا وغضبنا نترجمه لتعبير حقيقى عن الرغبة الشعبية..لكن ورغم كل شئ مبروك للشعب الليبى حريته والتخلص من الجبروت وربنا يقدرهم على جمع السلاح وتوحيد النعرات القبلية..الدرس أكيد إبتدى واللى حصل هناك لازم ندرسه ونستوعبه ونتخيل مع بعض نتيجة الإستقواء بالخارج ومخطط الإئتلافات وأكشاك حقوق الإنسان واللى بينفذوا تعاليم كل أجنده خارجية..الدرس إبتدى ولازم ندرس كمان تصريحات المفتى الليبى وموقف المتلفحين بالعباية الإسلامية..خلاص جرس الفسحة ضرب ضرب والدرس إبتدى وأول إمتحان على الأبواب هو ورقة الدستور والإنتخابات البرلمانية..يا ناس لازم نفوق ونصحى ونختار مصر بس مش أى قطيع سياسى متلفح بالدين أو ناس طالعين من القبور بأجنده مشبوهة خارجية..خلاص الدرس إبتدى وإنت حر ساعتها لأن ساعة الإمتحان يُكرم المرء أو يُهان ودى قاعدة معروفة بديهية..الأيام اللى جاية صعبة على الجميع ويارب تعديها على خير وتحفظ لينا بهية يارب إحفظ بهية..!!
 
Said_elmasryfahmy@hotmail.com