fiogf49gjkf0d
إحنا أسفين يا مصر ..!!
من البداية للنهاية وقبل أى كلمة أقر وأعترف إن إنتى أكبر مننا كلنا..ولازم تعرفى يا مصر إن التفريط فى أمنك والتهاون فيه ده مش مسئولية الحاكم فينا لكن كمان مسئولية كل واحد مننا ..لكن أرجوكى أوعى تسامحينا من تانى على إنفعالنا وعشمنا الدائم فيكى وجهلنا..الأيام اللى إحنا فيها أثبتت إنك كبيرة علينا قوى وأكبر كتير خالص من حجمنا..طول عمرنا ياغالية عايشين فى خيرك وبفضلك وكل واحد ملهى فى مصلحته رغم إنك كنتى دايما حاملة همنا..ورغم إننا قدام حقيقة ثابتة وهى إنك خالدة خلود الزمان ودى حكمة عارفينها وهبة من ربنا..لكن ساعات الزمن بيبقى شيش بيش ويغدر بزهرك ويديكى ناس مش عارفة قيمتك وغبية كده زينا..ناس بتفكر فى حياتها وأهدافها بس ولا حتى حاسين إننا بننهش فيكى وأتارينا وبمنتهى الغباء كنا بننهش لحمنا..أيوه لله فى خلقه شئون لكن وبعد اللى حصل يوم ماسبيرو نفسى أعرف إيه الحكمة نكون إحنا شعبك وليه القدر زرعنا بالذات هنا..مين قال إن جنة الأرض يسكنها ناس مش عارفين قيمتها ناس مافيهاش برئ والكل فيها مسئول من أكبر رأس لأصغر مولود فى البلد دى مننا..نسينا بلدنا ومصلحتها وقعدنا نتصارع ونتسابق لمصالحنا ونسينا إننا مجرد فروع هايفة فيكى وإنك إنتى الجذر والجذع يعنى بإختصار أساسنا وأصلنا..يا بلد الغرائب والعجائب بالله عليكى إيه سر طول بالك علينا وإزاى كل العصور دى ورغم كل خطايانا استحملتينا كده كلنا..بصراحة يا مصر ومن غير مجاملة أنتى طلعتى كتير علينا خالص وإحنا لاعرفنا نصونك ولا نحمى وحدتنا أوحتى نحافظ على أمنك وأمننا..تصدقى ورغم إننا عارفين إنك أم الدنيا رحنا وفرطنا فيكى وإتلهينا فى اللى لينا ونسينا حقك علينا ونسينا قبل ده إنك إنتى أبونا وأمنا..الله يجازى غبائنا على هيافتنا على طمعنا فيكى ولو جرالك حاجة حيبقى ذنبك فى رقبتنا كلنا..ضحكنا عليكى وألفنا أغانى ليكى بداعى ومن غير داعى وفى لحظة الجد فرطنا وبرخص التراب وبسهولة كده ساح دمنا..معقولة مفيش فى البلد واحد دكر يقوم وينتفض ويكون راضع من صدرك تاريخ وحضارة اللى خسارة فينا كلنا..معقول رحم بلد بحالها مش عارف ينجب ولد أو جماعه تصونك وتحافظ على مكانتنا وهيبتنا وشكلنا..إنتى يا مصر ليه نايمة وساكتة وسايبة الغيلان تنهش فيكى وكل واحد بيتكلم بإسمك قال يعنى الحزب أو الإئتلاف ده بيمثلنا كلنا..قومى وهزى نخلك وإرمى من تانى ثمارك وأبذرى طرح جديد يملاكى عدل وخير ويطهر أرضك ونيلك بدل اللى باعوكى وحرقوا دمنا..!! اللى حصل يوم الأحد الدامى علامة إنذار ودمار وإحنا ومن غير نفاق كلنا عنه مسئولين..الكل كان بيشارك بقصد أو من غير قصد فى تقطيع بلدنا حته حته ولاكنا حاسين ولا حتى فاهمين..إزاى نفضل قاعدين فى حيرة وهم وغم وإيه يجبرنا نفضل نعيش حياتنا قلقانين.. بنفرط فى أمن بلدنا كده ومن غير ما نعمل ونبنى نروح وعلشان سبب تافه نروح ونقف فى الشوارع والميادين..هى ثورة وللا فوضى والله الناس بقت لا فاهمة حاجة ولا حتى بالتغيير حاسين..إقتصاد هابط وأمن غايب وشعب بيئن من وجع الأسعار وبهوات العصر الجديد كل شوية يجمعوا الناس فى الشوارع معتصمين..روح وشوف ناس بتنهش في البلد يوم بعد يوم وعلشان السوكسيه وخطف الأنظار يخربوا الدنيا ويقولوا على نفسهم إعلاميين..وشباب لسه ولاد إمبارح موجودين فى كل القنوات وكل واحد فيهم بقى شاهد على العصر وسقراط وحكيم زمانه وواحد من المؤرخين..وناس خرجت من المقابر والسجون يلحقوا حتة من التورتة ولعبوا فيها سياسة بعد ما كفرونا فى الدين ..
وناس تتحدى الحكومة والعسكر وكمان يهددوهم بعد ما بلبعوا فياجرا الشجاعة وكأن تهديد العسكر بقى موضة وجواز عبور للسادة المرشحين..حتى اللى بيقولوا عليهم فلول عاوزين يحرقوا الدنيا ويسمموا نيلنا ودة موجود فى مؤتمر علنى قدام كل المواطنين..شفت بقى تطبيق مبدأ فيها لأخفيها حتى النيل عاوزين يلوثوه وهو الشريان اللى بيروى الزرع والأرض والبنى آدمين..وقرارات سمك لبن تمر هندى ولا عدنا عارفين إحنا بقينا فين واللى بيحكمنا مين..تخيل بلد فى عظمة بلدنا تبقى بين مطرقة شوية هواه على سندان شوية ناس للسلطة مشتاقين..فيها لأخفيها بقى هو الشعار الجديد لكل الإعلاميين والمثقفين الجدد وهواه السياسة واللى ورا الدين مستورين..عمرك شفت قتلة رئيس وبالصوت والصورة وأيا كانت شخصيته وفى ذكرى أيام نصر أكتوبر يروحوا ويبصموا على حزب ليهم بكلمة موافقين..بإختصار اللى بيحصل فيكى يامحروسة غريب ولا أستثنى أحدا من المسئولية ومن كل فئات المجتمع وبكل طوائفه وأديانه مسلمين ومسيحيين..الحقيقة اللى كلنا غافلينها وخلاصة الكلام إنك يا محروسة مش مسموح لك تعيدى مجد محمد على تانى اللى كان عارف قيمتك وقدرك واللى فرطنا فيه كلنا يا مصريين..الله يعوض عليكى يامحروسة بناس غير الناس وشعب غير الشعب يا قادر يا كريم يا أرحم الراحمين..لو فضلنا بالروح دى يبقى علينا العوض وساعتها لا عزاء للغباء والوباء وكل عام وإنت طيب وكل سنة وأنتم ثوريين..!!
said_elmasryfahmy@hotmail.com