fiogf49gjkf0d
عايز حقى..!!!
يعنى إيه حكومة ويعنى إيه وزير..يعنى إيه دبلوماسية وإيه معناه منصب سفير..وإيه فايدة أى موظف رسمى لو ما عرفش يحقق مطالب الناس والجماهير..وليه دايما ربنا بيرزقنا بمسئولين كل همهم رضاء المسئول عنهم وينسوا أصحاب الفضل عليهم ويهتموا برضاء اللى فوق واللى بيرفعوا ليهم عننا التقارير..هو ليه أى مسئول بينسى دايما إنه مسئول عننا قدام ربنا وإنه حارس علينا وغفير..يا أى مسئول وأيًا كان منصبك لازم تفهم حقيقتك ومع إحترامى لشخصك إنت خادم للشعب ومن أموال ضرائبنا بتاخد مرتبك يعنى من الآخر أنت عندنا أجير..الموضوع يا أسيادنا زاد عن حده والوضع بقى فعلا مهين جدا وخطير..اللى بيحصل للمغتربين من حكومتنا تعدى فعلا الخط الأحمر وغربة بلدنا لينا بقى طعمها علقم ومرير..وتجاهل أى وزير أو سفير فى أى مكان لمشاكل رعيته فى غربتهم شئ مقزز ومحتاج أكيد تفسير..القائمة مليانة هم وغم لكن مذبحة ولادنا فى التنسيق هى فعلا القشة اللى قصمت ظهر البعير..المغتربون فى الأرض جزء أصيل من نسيج المجتمع مش قطيع بقر بتحلبوه وتمصمصوا عضمه وفى الآخر ترموه وكأنه زى خروف ضحية فى العيد الكبير..مفيش دولة بتحارب ولادها بالشكل ده ولا فيه مسئول مهما كان من حقه حرمان ولادنا من حق الإختيار وتحديد المصير..أى مسئول مش قادر على وظيفته ولا عارف هو دوره إيه لازم يتوكل على الله ويفارقنا غير مأسوف عليه ومن غير تأخير..!!
بإختصار ومن غير مجاملات إحنا ما صدقنا ربنا ريحنا من حكومة البيه نظيف الذكية..لكن الظاهر ربنا بيطهرنا وبيخلص ذنوبنا على قرارنا بالغربة وأتحفنا بوزارة كل وظيفتها حل المشاكل الفئوية..إن كان عندك مشكلة فى مرتب أو وظيفة أو كادر الحل بسيط خالص روح وإسحب معاك خمسين ستين واحد من أصحاب المواهب الحنجرية..أو روح وإتفق مع شوية ناس من إياهم وإعملوا فيها ثورجية..أو روح خد من حزبك حبة كام دولار من معونة حبيبة حقوق الإنسان عمتنا الولايات الأمريكية..وإعمل لك كام يافطة مليانة شعارات سابقة التجهيز وروح بيها الميدان وإندس من ضمن أصحاب المليونية..حتلاقى مسئول مرعوش على طول يبعت مندوب يقابلك ويحقق لك الأمنية..ولو مش مصدق روح شوف عمال النقل اللى بعد إضرابهم على طول رفعوا ليهم المرتبات فى الميزانية..أو إخطف رجلك للجامعة وشوف الهرم القلوب لما الطالب يطالب بإقالة عميد كلية..والأمثلة أكتر من الهم على القلب لكن ربنا آمر بالستر وخلى البلاوى مستخبية ..تخيل كل ده بيحصل من الناس هناك فما بالك بحقوق المغتربين اللى حكومتنا فاكراهم ياولداه أقلية..رغم إننا وحصوة فى عين اللى ما يصلى على النبى أكتر من ثمانية مليون وده حسب الإحصاءات الحكومية..يعنى إحنا بإختصار أكبر وأكثر من جماعة الإخوان والجماعات السلفية..وإحنا أكبر من أعضاء الحزب الوطنى المنحل بجلالة قدره اللى كان مكتسح فى عصر التوريث والفساد والمحسوبية..وأكثر من أعضاء كل الأحزاب الموجودة على الساحة الآن من الوفد للناصرى للتجمع للوسط وعلى طول الخط وإنت ماشى لغاية ما توصل لحزب العدالة والحرية..لكن شوف هم عاملين إيه وإزاى صوتهم عالى وأى حاجة بيطلبوها يلقوها قدام عنيهم يا إما يروحوا ويعملوا مليونية..لكن المغتربين الغلابة مش مهم يروحوا في ستين داهية أو حتى ولادهم يتلطموا فى التعليم ويتمِنعوا بقرار جائر من التمتع كمصريين بجامعات بلدهم المصرية..يمنعونا من التصويت وقلنا مش مشكلة البركة فى صوت أهالينا فى بحرى والصعيد من أسوان لإسكندرية..يزيدوا الضرائب والرسوم نقول معلش نستحمل علشان إقتصاد بلدنا ينهض وأتاري كانت فلوسنا بتتسرسب على بره أو للمصاريف السرية..حرمونا من الأراضى وخدوها الهوامير وما صدقنا إشترينا بعد الكفاف شقة نلم فيها ولادنا لقيناهم حدفونا بضريبة عقارية..كل ده وغيره إستحملناه وبلعناه لكن ذبح ولادنا فى التنسيق عمل إجرامى وإجحاف وقصة حياه أو موت للعائلات المغتربة المصرية.
.رغم إننا 10% من السكان يعنى لازم تكون لينا من الأماكن على الأقل نفس النسبة المئوية..الناس فى الغربة يا أسيادنا بتبلع المر وتستحمل الغربة علشان ولادهم فى الآخر يتعلموا زى أقاربهم فى مصر ويعيشوا عيشة طبيعية..بالذمة لما تروح وتدفع بالإجبار عشرات الآلوف لواحد من ولادك فى دكاكين الجامعات الخاصة الأهلية..معناها إن شقى العمر ضاع وضاع حلم ولادنا وضاع إحساسنا بالإنتماء لوطن باعنا بالقصد والنية..إحنا مش بنتكلم عن نسبة مجموع 80 %أو 90 %إحنا بنتكلم ياخلق هووه على طلبة حاصلين عن 97 فى المية..لما طالب يجيب 97% إزاى تستنفذ رغباته وإزاى ما يقدرش يدخل أى كلية من فروع الطب أو حتى هندسية..ياعالم بالذمة مش حرام الموضوع ده يمر من غيرمساءلة أو إهتمام من وزير تعليم أو وزير هجرة أو أى سفير بيمثل عننا أو علينا فى الإدارة الحكومية..لكن كل مسئول بيبقى ولاءه للحكومة وتغور فى مليون داهية مصالح أى جالية..يا ترى حنعمل إيه حناخد على قفانا ونسيب حقنا زى ما فرطنا فى كل حقوقنا بكل تراخى وسلبية..وللا نروح للبيه رئيس وزراء الميدان أو نبعت شكاوى للمجلس العسكرى يعتبرنا فى التعداد السكانى الجديد إن نكون فى بلدنا من الجالية المصرية..ملعون أبو القهر على الظلم على كل قرار ظالم من أى مسئول عينوه علينا من أهل الثقة والمحسوبية..الله يرحمك ياعم سعد زغلول ياللى جبت من الآخر لما جت لك ساعة القضا وشفت حقيقة الأمور فى بلدنا وقلت جملتك الشهيرة "مفيش فايدة" غطينى وصوتى علىً وخدى بالك من الغلابة المغتربين ياصفية..قالوا آخر خدمة الغُز علقة وهى دى آخرة وجزاء مساهمتنا فى خدمة حكومتنا البهية وهى دى القضية..!!
said_elmasry fahmy@hotmail.com