الثانوية السامة// بقلم المصري أفندي ap

الثانوية السامة..!!
يعني إيه ثانوية..؟؟ وليه سموها عامة ..!! وليه عاوزين يفسدوها ويخلوا آثارها سامة ..؟؟ وليه هيه مصيرية وفي حياة الناس هامة ..؟؟ ناس كده فرحانة وناس تعيش في غمة.. ولما بتطلع نتيجتها تلاقي ناس زعلانة وناس فرحانة وعاملة لمة..!! وليه الطوارئ علشانها بتكون في كل بيت .. وتلاقيها حديث الناس في الشارع أو الغيط.. والناس مراقبة الوقت لولادها والساعة علي كل حيط .. قبل الزمن مايعدي ونندم ونقول يا ريت ..!! وإذا آن أونها بتلاقي طقوس كتير غريبة .. عصبية ونرفزة وتصرفات كده عجيبة .. وفلوس ودروس خصوصية ومدرسين حركاتهم مريبة.. وناس بتبيع هدومها وتصرف فلوسها قبل ماتحصل مصيبة.. عاوزين الولد ينجح ويحصل على درجات عالية ورهيبة.. !!علشان تفرح أمه وأبوه ربنا يرحمه من الجامعات الخصوصية .. والواد إبنهم يتمتع في الجامعة الحكومية.. يدفع شوية فلوس بسيطة وياريت تكون مجانية..ماهو لازم يكون فيه أمل مغموس في شوية حنية.. وكفاية صعوبة الدنيا عليهم والمشاكل اليومية.. !!ولأن الناس عارفة إن هناك عدالة في مكتب التنسيق .. وصعب يكون فيه كوسة أو خلط بين زيت ودقيق.. وإن الكل قدامة سواسية بالعدل والتدقيق .. ولكن ليه يكون هناك كدة شوية خفافيش ..؟؟ تعشش في الظلام وتسرق حق الغلابة والحرافيش.. وتطعم ولادها علم حرام علشان المجتهد مايلاقيش.. ويسرقوا حلم العلم المجاني والطالب البسيط مايقدرش يعيش..

معقول ناس تاكلها والعة وناس يصعب عليها العيش.. ودي شله أكيد معروفه .. صاحبة سطوه وأخلاق مألوفة .. واللي ليها عزوة أو بالحصانة مغلفة وملفوفة .. فاكره دم ولادها أزرق وحقوق الغلابه ضايعه وممصومه.. وإمتحانات ولجان خاصة بمنتهي التزوير .. وناس على راسها ريشة وناس يلبسوها طراطير .. وكأن الحكاية سايبة وأن مافيش ضمير.. الناس دي بتدي صورة وحشة وتخلي الواقع مرير.. والمشكلة إنها بتاخد الأمور ببساطة رغم إن الموضوع خطير .. وتخلي الناس بتغلي وماتصدقش تصريح وزير.. لما تلاقي عيني عينك عمليات تداول الإمتحانات بالتسريب.. وتحس بالحسرة وإن العدل في العلم أصبح غريب.. ولجان خاصة وتسريب والله يا ناس ده عيب .. والأسئلة بتتوزع هنا وهناك وبتوصل لكل حبيب.. أما لو كنت مجتهد أو غلبان ومش من المحاسيب .. فحاول تعتمد علي نفسك بالجد والاجتهاد.. وترمي حمولك علي رب العباد .. هو بس يكافئ اللي أجتهد وأجاد.. وبعدين إيه حكاية الأسئلة الصعبة الهلامية .. وليه الطلبة مش فاهمة حاجة من المناهج ديه .. وناس بتحط امتحان بطريقة غريبة وحلزونية .. وبتفرح لما الطلبة تنهار أو تروح مصحة عصبية .. هي دي طريقة التعليم اللي بنزرعها في الأجيال اللي جاية .. العالم كله بيتطور والمناهج هيه هيه .. يادوب المعلومة علي قد الامتحان وبعدين تتنسى مليون في المية.. ونرجع تاني للبداية ونعيد القول .. ونفكر ونسأل إمتى نحل المشكلة على طول .. وإمتى حنبطل بقى تصريحات .. أو نتأثر بالصوت العالي والهتافات .. ومسئول يحط خطة ويجي غيره يبدلها واللي فات كأنه مات ..

عاوزين ننسى بقى كل اللي فات .. ونعالج أصل المشكله ونمنع التسريبات .. ونسهل على ولادنا شويه وبلاش التعقيدات.. ونشجع الطلبه على حضور المحاضرات .. ومن قبلهم المدرسين والمدرسات.. ونداء إلى مافيا الدروس الخصوصية .. خلي عندكم ذمه ورحمه شويه .. وبلاش نكوي الأهالي بأسعار الحصص النارية .. ونرحم شويه الناس من أعراض الثانوية .. وياريت المسئولين عن المناهج الدراسية .. تقدموا بقى مناهج بطريقة حضارية .. وكمان أسئلة معقولة مش مناهج معقدة وهلاميه.. ونرجع تاني ونتكلم في الموضوع على طول .. ونقول المفيد ونكرر من تاني القول .. يعني إيه ثانوية .. وليه خلوها عامة .. وإيه سرها وليه هيه هامة.. علشان هى الأمل .. وهى مفتاح المستقبل والعمل .. هى اللي بتخلى الواحد بيشوف طرح بذرته .. وتلاقي نجاح الولد وقد إيه فرحته.. لما حلمه يتحقق ويروح جامعته.. ويدرس شئ بيحبه بجد في كليته .. ويحس معاها بألفه وكأنه حبها وعشقتة .. الثانوية العامة وليه هي هامه .. علشان هي اللي بتعرفك حتكون إيه .. ولما يسألوا ولادك عنك حيعرفوا صفتك إيه.. وبيعرف الواحد اللقب اللي حيكون عليه .. وهل حيطلع صعلوك ولا ينادوه يابيه ..!! ممكن نلغي الأحلام.. أوحتى نبطل كلام .. أو نتمنى عيشه حلوة أو نتعشى حمام .. لكن لو ضاع حلمنا في الأبناء.. بسبب تصرفات بعض الأغبياء .. فعلى الدنيا الفناء .. لذلك أتمنى وبمنتهى الرجاء .. وعارف إن خلاص مفيش أنبياء .. أن تحاسبوا مافيا تسريب الإمتحانات بيد من حديد .. وتعالوا نعيد الثقه للناس ونبدأ من جديد .. وبلاش نتساهل مع أي محتاس .. ونرجع البسمة لكل الناس .. ونؤكد مقولة إن " لكل مجتهد نصيب" .. ويطمئن ولادنا إن مفيش تسريب .. ونقاوم أي نماذج بتحاول تبث سمها الزعاف .. وبتحاول تسلبنا الأمل ومن الضمير ما تخاف .. ونتمسك بكلمه ونحفظها على اللسان .. ونفكر فيها أكيد ونعلقها في الودان .. بصوت عادل جهوري يسمع في الوديان.. لازم يا ناس نعدل من تاني الميزان.. قبل ما نعيش ثقافة اللمبي أو أي كائن كان .. وهو واقف لمستقبل أولادنا وبيطلع اللسان.. ومافيش حد بيمنعه وبيغني في الميدان .." هش هش يا ديك .. الجامعة دي مش ليك !!!" والله ده كلام وثقافة اللمبي .. وإن مفهمتش قصدي يبقى ده ذنبك مش ذنبي !!

بقلم: د/ سعيد فهمي ( المصري أفندي)