fiogf49gjkf0d
إدخلوها آمنين ..!!!
نعم سندخلها إن شاء الله آمنين..مهما كانت قوة البلطجية وأدعياء الثورة والمخربين..ومهما كانت رخوة الآمن أو أى صاحب قرار من السادة اللى علينا مسئولين..سندخلها رغم عن أنف أى متآمر عليها وعلى أهلها الناس البسيطة الطيبين..سندخلها وحيكون معانا كل الناس اللى بتؤمن بيها وبكلام القرآن معجزة رب العالمين..نعم ستعود المحروسة دار أمن وآمان وقبلة كل الأحباب فيها واللى ليها محبين..مين قال إن اللى فى الصورة دول يبقوا هم المصريين..مين قال إن اللى بيخرب وبيروع أمن الناس يبقوا من اللى فى الميدان وعاملين معتصمين..مين قال إن فتوات الألتراس وشباب السيس يبقوا هم دول شباب مصر المتميزين.. دى مش حرية ولا شباب ثائر لكن حركات على كل لون لناس من ورا الستارة متربصين..يا ناس ياهوووه هو أحنا من كوكب تانى وللا إحنا نبقى مين..الناس البسيطة فى الشوارع وفى البيوت وعلى القهاوى أنا شفتهم بعينى مستائين..الناس شافت الهجوم التتارى على الداخلية رمز الأمن الواهن اللى كانوا جوه البوابات محجوزين..يا ترى مين اللى بيورط بلدنا فى مشاكل دبلوماسية بحركات ورعونة المراهقين..مين اللى معاه أجندة وبينفذها وأولى الأمر سايبينه وكأنهم قاصدين..مين قال نروح على سفارة عربية ونهجم عليها بحجة بهدلة المعتمرين..إيه لم الشامى على المغربى وخلط الأوراق والأجندات وده يبقى من مصلحة مين..لكن المؤامرة واضحة والشغل باين وعلى مية بيضة فعلا لعب محترفين..ناس تضرب وناس تلاقى ونار تهاجم وناس تبرر ويقولوا معلش شباب ومقهور سنين وسنين..وإن قلت يا ناس مايصحش كده يقولك فين حرية الرأى والتظاهر وحق المواطنين..مين قال البلطجة وترويع الناس حق لأى حد ومين من حقه يقفل الشوارع والميادين..مين اللى طفش السياحة من بلدنا ووقف حال الناس وخرب بيوتهم وحجتهم ياعينى شباب ومن الحرية محرومين..تقول إيه وللا إيه ملعون أبو الفوضى عالبلطجة على كل واحد بيفرط فى أمن بلدنا الأمين..نحن نؤمن بالله نعم واللى وعدها بالأمن هو سبحانه لكن ممكن تقوللى أنتوا ياللى بتخربوها اللى وعدكم مين..تقوللى ألتراس تقوللى ثورجى تقول عربجى مهما كنت محدش حيقدر يغًير كلام رب العالمين..!! لكن السؤال الآن مين السبب عن الفوضى اللى حصلت ومين صاحب المسئولية..مين اللى أنذر الناس ومين اللى عمل نفسه ملتزم وبعدين عملها دراما وتمثيلية..ومين المسئول عن الإعلام القمئ اللى بينافق البلطجة ويسميها ثورة وفضفضة وحرية..إيه كم النفاق اللى نازل علينا ده من السادة المذيعين والصحفيين على القنوات الفضائية..تصدق صحيفة قومية تقول على الفوضى " طلعت يامحلى نورها شمس الحرية"..تقدر تقوللى الفرق إيه بين ناس كانت بتنافق نظام بائد ونفس الناس بتنافق وتشيد بإنفلات البلطجية..شفت حارس المرمى اللى بقى فجأه ثورجى وشالوه زي الزعيم مع الألتراس وهاجموا الداخلية..شفت ياعينى رقه قلبه لما شافهم بيجروا فى الإستاد بعد ما سبوا وشتموا وإعتدوا على الأمن بمنتهى الهمجية..شفت السادة النقاد اللى بيقبضوا ملايين وبينافقوا الألتراس وبيهاجموا عنف الداخلية..شفت حرق السيارات الخاصة وتدمير المنشآت العامة والأملاك الحكومية..من فضلك قبل ماتعمل فيها ثورجى تخيل نفسك عسكرى أو ضابط وبيهينك واحد من عُمر ولادك بمنتهى الهمجية..من فضلك غمض عينيك وتخيل كبرياءك وكرامتك بتتلغى فى لحظة والثمن ضبط نفس لزوم المرحلة البهلوانية..ملعون أبو القهر على حُكم النفس على النفس مهما كانت طبيعة الأوامر الوظيفية..طب ضبط النفس وعرفناه لكن ضبط الأنفاس وقعدات الإئتلافات مين اللى عارف خباياها وإيه سر القضية..مين الجبار ده اللى إتحدى أوامر العسكر بعدم التعرض للعسكر والشرطة والمنشآت الحيوية..مين ده اللى فرط فى كرامة جهاز سيادى خطير وهم بينزعوا شعاره فى عز النهار وعينى عينك بحجة ضبط النفس وهم فى الجحور بمنتهى السلبية..الحادثة مش بسيطة ومحتاجة شجاعة وإستقالة من وزير كان في يوم من الأيام وزير للداخلية..!! الخلاصة كفاية بقى كده وكفاية طبطبة وخلينا نشوف مشاكلنا وندوًر على كل الحلول..ولازم نكشف عن الصفقات وياترى إيه الثمن ومين اللى قاعد ينهش فى إستقرارنا زى الغول..مفيش فايدة تقول بلطجة تقول فوضى يقولوا حرام ده مش إحنا ده سببه ياسيدى المخلوع وبقايا النظام والفلول..الحق مش على أصحاب الصوت العالى لكن الحق على عبد الحق واللى علينا مسئول..كان لازم يحصل كده وكان لازم يهينوا الأمن كمان مدام القرار مشلول..إيه كل الحقد والكراهية دى ومين اللى قلبه علينا بالشكل ده مغلول..ربنا يستر علينا وياريت تدعى معانا ربنا يكفينا أدعياء الثورة والإئتلافات والألتراس واللى بيقولوا عليهم فلول..ياترى دى آخر عملية ضبط نفس وللا حنفضل نطبطب ونهشك وننام وصدقونى لو نمنا حنفضل نايمين فى الوحل كده على طول..!! السكوت على المهزلة دي من غير حل جذرى مهانة لأى نظام حاكم ومصيبة..والتنازل عن حق شعب إنه يعيش فى أمان دليل عن الهوان والذل والخيبة..لسة فيه ناس تخاف ماتختشيش موجودين فى الساحة كتير ومن غير العين الحمراء حتضيع البلد وقبل منها الهيبة..كل تصحيح مسار وأنتم طيبين وربنا يكفينا الشر ويحفظ مصرنا الغالية الحبيبة..بصراحة رد الفعل مش على قدر الحدث وقلبى حاسس كدة بحاجات مريبة..صحيح إحنا بلد العجائب لكن بصراحة دى أكتر حاجة شفتها في بلدى عجيبة..!!
said_elmasryfahmy@hotmail.com