طيب!!!
بلاغ لوزير الداخلية
اليوم سأترك المساحة لصعيدي مصري جدع اسمه محمود عبدالحفيظ يعمل في الكويت جاءني منه رسالة الكترونية (ايميل) انشرها كما هي مع بعض الاختصار الطفيف واعتبرها بلاغا لوزير الداخلية لعل وعسى..
«في آخر أيام اجازتي بالقاهرة أردت تعديل موعد سفري عبر خطوط مصر للطيران فذهبت الى فرع الشركة في شارع طلعت حرب والذي يبعد امتاراً قليلة عن ميدان التحرير....
عند وصولي للشركة وجدت شخصاً يقف على باب الشركة...
قاللي: أيوه يا استاذ انت عاوز تحجز أو تغير حجز؟
قلت: ايوه
قاللي: من المكتب التاني مش من هنا...
قلت: فين المكتب التاني ده؟
شاورلي عليه وقاللي المدخل اللي على اليمين ده...
رحت مكان ما قاللي ولقيت مدخل عليه يافطة (مصر للطيران)... كان المكان عبارة عن شقة في الدور الارضي، دخلت لقيت ناس كتير قاعدين بيشتغلوا وكان فيه ناس كتير برضو بيحجزوا....
رحت لواحدة من اللي بيشتغلوا قلتلها: لو سمحتي عاوز اغير واسافر بكرة...
اخدت التذكرة وقعدت تشتغل على الكمبيوتر وقالتلي فيه بكرة الساعة 2 الظهر قلتلها ماشي...
قالتلي رسوم التغيير 300 جنيه ادفع عند الاستاذ..
رحت دفعتله الفلوس قاللي خلاص.. قلتله مفيش وصل قاللي لا روح استلم التذكرة على طول...
طبعتلي البنت التذكرة وكتبتلي عليها التعليمات واني لازم اكون في المطار قبل الميعاد بفترة والى آخره...
قلتلها طيب تذكرتي القديمة قالتلي لا دي هنحتفظ بيها...
اخدت منها التذكرة اللي طبعتها لي - ومحطوطة في ظرف مصر للطيران- ولما خرجت شكيت في الموضوع فرحت مكتب مصر للطيران اللي الراجل كان واقف قدامه وهو المكتب الرئيسي بتاعهم ولقيت الراجل واقف هناك على الباب برضو بس مش لوحده كان فيه 2 تيران تاني وكلهم بيشاوروا لاي حد يحاول يدخل انه لازم يروح على المكتب التاني.. المهم دخلت المكتب وسألت واحد هو انتوا ليكم فرع تاني هناك؟؟ قاللي لا.
قلتله طيب الراجل اللي على الباب وقفني ووداني المكتب اللي هناك.
رد عليا وقاللي وانت بتسمع كلامه ليه؟؟
قلتله طيب انا عاوز اتأكد من الحجز ده.. قعدت قدام موظفة وشافت التذكرة قالتلي لا انت ميعادك زي ما هو متغيرش لبكرة ولا حاجة وقالتلي اصلا معندناش حجز بكرة مفيش غير انهارده... المهم غيرت الحجز واتكلف 180 جنيه بس..
قلتلهم في مصر للطيران انتوا ازاي سايبين الناس دول كده بياخدوا كل اللي يجيلكم حتى السياح الاجانب قالولي والله احنا بلغنا الجيش والشرطة ومفيش فايدة....
المهم خرجت ورجعت للمكتب بتاع النصابين تاني ومسكت الموبايل على ودني كأني بتكلم ودخلت على الولد اللي بيستلم الفلوس هناك قلتله انا معايا لواء شرطة على التليفون انا عاوز فلوسي يا حرامية....
وقتها كان فيه ناس كتير في المكتب بيحجزوا حوالي 20 واحد تقريبا وكان منهم 3 اجانب اوربيين كانت البنت بتكلمهم انجليزي..
المهم هم على طول حاولوا يهدوا الموقف معايا علشان محدش ياخد باله بس انا كنت بحاول أعلي صوتي علشان الناس اللي بيحجزوا ياخدوا بالهم..
قالولي طيب هنديك حضرتك فلوسك بس اتفضل ادخل جوة وكانوا بيفتحولي اوضة ادخلها انا مرضيتش ادخل لاني معرفش فيه ايه جوه قلتلهم انا هاخد فلوسي هنا...
المهم على طول علشان الناس مياخدوش بالهم قالولي دفعت كام قلتلهم 300 جنيه..
راحوا دفعوهملي واتلم عليا حوالي 5 او 6 بلطجية خرجوني برة وخطفوا مني التذكرة اللي كانوا طابعينها لى وقالولي خلاص اخدت فلوسك امشي....
المهم رحت على الأمن المركزي اللي عند الميدان وشفت هناك ظابط قلتله الحكاية، قاللي احنا هنا لتأمين الميدان بس!!
مشيت لقيت اتنين ضباط شرطة في شارع تاني قلتلهم قالولي روح شرطة السياحة بلغ عنهم وبعدين احمد ربنا انك اخدت فلوسك!!
سؤالي الوحيد دلوقتي هل تأمين ميدان التحرير بآلاف عساكر الأمن المركزي اهم من تأمين عملاء مصر للطيران اللي اغلبهم سياح اجانب ويسيبوهم يتنصب عليهم عيني عينك كده دون اي تدخل من الشرطة؟؟،،
ومني الى معالي وزير الداخلية ومعالي رئيس مصر للطيران وكل من تهمه سمعة مصر الثورة.
وحفظ الله مصر وشعبها من كل سوء.
حسام فتحي
hossam@alwatan.com.kw
twitter@hossamfathy66
ضرب الضريبه عشان جيبه
يتعبى هو ومحاسيبه
وكل فاسد ونصيبه
ف حكومه من خلف القضبان
&<645;&<645;&<645;
ضرب الضريبه وراح هربان
وسابها ف دماغ الغلبان
يا مسلكين أمر المحابيس
آخر الوجايع جاي طوفان
مختار عيسى (يوميات يناير)