الجدران السيادية..والفتاوي السياسية..!! تعمل إيه لو كنت عندك بيت..وكان له باب خشب وغفير غلبان سايبك براحتك ولايسألك إن رحت وللا جيت..ومعروف إنك كريم وعامل فيها كبير حسب السمعة والصيت..ومفيش مصيبة وقعت علي دماغ حد إللا وعليها جريت..وتحاول علي قد لحافك تساعده وإيدك له مدٍيت..ولا عمرك أنكرت الجميل ولا قطعت حبل المودة بينك وبينهم ولا استغنيت..وقاعد تيجي علي نفسك وتقول سماح ولا علي إهانتك رديت..وبتدافع دايما عن الأخ والجار وتيجي علي نفسك ولمصالحهم قضيت..ورغم كتير بينهشوا فيك وعيني عينك تقول معلهش وطنشت وإرتضيت..ولما فقت فجأة وحسيت بالخطر وعلمت ودريت..قامت في مخك فكرة وعلي طول عزمت عليها ونويت..وبقرار سيادي وعلشان تصون الدار والأرض والبيت..قررت تحمي دارك وللجدار الفولاذي بنيت..!! وتعمل إيه لو عرفت إن للبيت ده عنوان اسمه مصر..ومصر دي لو ماتعرفهاش روح واقرا عنها في كل زمان وعصر..واسأل كمان في التاريخ مين سبب كل عزة للعروبة ونصر..ومين اللي أي حبة رمل فيها أغلي من أي قصر..حتلاقي التاريخ ينطق من الألف للياء هي أم الدنيا مصر..!! الموضوع اللي بيناقشوه في الإعلام إياه اليومين دول هو موضوع الجدار..رغم إنه مفيش حد من حقه يتفلسف علينا لأنه ده حقنا وخدنا فيه قرار..ومبدأ سيادي أصيل من حق أهل الدار..ورأي واضح وصريح لا محتاج فيه تفكر ولا تحتار..ولا تهلفط في الكلام وتجادل في حق بلادك وتعمل حفلة بصاجات وطبلة وتار..لازم تبص قدامك وتحط نفسك مكان صاحب القرار..وتعرف دايما إن اللي إيده في الماء مش زي اللي إيده في النار..بناء الجدار قرار سيادي مالهوش إختيار..مفيش حد يرضي بلده تكون سداح مداح للتهريب والهاربين والأشرار..وناس تدخل وتخرج عن طريق الأنفاق جهارا وفي عزالنهار..عاملينها سبوبة وتجارة تحت مسمي الإغاثة والمكاسب في جيوبهم بالقنطار..أكيد فيه ناس بتعاني ومظلومة لكن فيه برضه في القضية سماسرة وتجار..وناس بتقبض من كل جهة وتتاجر بالشعارات فاكرينها لعبة شطار..واللي يفتي في القضية من غير علم وهو جاهل بمخ حمار..القرار السيادي يا إخواننا خط أحمر ممنوع اللمس فيه أو الإختيار..ولو غاوي منظرة ونفسك في حاجة روح وفضفض في حفلة زار.. أو إفتح التليفزيون بالريموت ودوس براحتك علي الأزرار..روح يا راجل وتابع الفضائيات واصحاب الفتاوى وتابع الأخبار..حتلاقي بانوراما فتاوي سياسية علي نيران صديقة حاجة تخليك محتار..!! الجدار المصري حق سيادي مية في المية..وقرار يؤكد حق بلدنا في حفظ حقوقها الشرعية..ورسالة واضحة لثعابين الأنفاق لإحترام السيادة المصرية.. ودليل في قدرتنا علي ضبط إيقاع منظومتنا الأمنية..لكن اللي يلفت النظر هو ظهور بعض الفقهاء والرموز الدينية..ليفتونا أفادهم الله بأن الجدار حرام ومعدوم الشرعية..وإن مصر ياعيني فرطت في التزاماتها وواجباتها العربية..وخططت وشاركت في تنفيذ الخطة الصهيونية الجهنمية..لتجويع أهل غزة الغلابة المحاصرين من كل مكان في الكرة الأرضية !!..وكمان تلاقي مجموعة بتصنًف نفسها بأصحاب الصفوة الفكرية..وراحوا ورفعوا قضايا وهللوا في الصحف والمحاكم ضد القرارات السيادية..وكأنهم ناسيين ولا عارفين إن آخر وظيفة للأنفاق هي توصيل الأغذية والمساعدات الإنسانية..ولو مش مصدقين روحوا وابحثوا عن المخدرات والسلاح والتفجيرات في مناطق سينا السياحية..ولاحظوا الإستهانة بالدخول والخروج عبر الأنفاق الظاهرة بصورة واضحة وكوميدية..وياريت تحسبوا معانا فوائدها ومدى أهميتها للقيادة الحماسية..إبحث عن المستفيد من الأنفاق الغلابة في غزة وللا لقيادة حماس وياريت تفهم القضية..!! لكن ورغم الحصار وغلق المعابر ومهما حدث وكان..فلا يوجد تبرير لحركات التهور والعبط والجنان..وفرض البلطجة ومقابلة جهودنا في القضية بالنكران..وحرام نقايض دم ولادنا علشان شعارات خايبة بالنسيان..ولايمكن حننسي دم شهيدنا الصعيدي المصري أحمد شعبان..والسادة في حماس أكيد عارفين طبع الصعايدة ولاد البلد الجدعان ..مش حنسيب تارنا يضيع تحت أي شعار وحناخده من أي جبان..خلاص زهقنا وقرفنا وأكتر من كدة صبر يبقي مهانة وذل وهوان..السن بالسن والبادي أظلم وصعب تكون مع ناكر الجميل والديابة إنسان..!! الخلاصة لازم نعيد ترتيب الحروف مع الجار أيًا كان ونعيد ترتيب الكلام..وتكون قضيتنا إزاي نحقق أمننا مع أي حد مهما جارت علينا معاهدة سلام.. ونفرض هيبتنا علي كل واهم علي حدودنا بيقابل الجميل بأسلوب اللئام.. لازم نطمئن علي حدودنا وبيوتنا لازم نعرف ننام..!! بإختصار شديد وخلاصة الكلام..لازم نتعامل بلهجة جديدة مع اللي يتطاول علينا ويقتل ولادنا بأسلوب اللئام..كفاية هروب من الحقيقة ودفن الرؤوس في الطين زى النعام..ومن الآخر لازم نراجع أوراقنا ونناقش من جديد كل اتفاقيتنا وبالذات المأسوف علي شبابها معاهدة السلام..!! Said_elmasryfahmy@hotmail.com د.سعيد فهمي ( المصري أفندي )