انا ونفسى؟!
دائما كنت اسأل نفسي لماذا عندما نقوم بوصف الغربة نصفها بالمرارة و نقول عنها "الغربة مره" وعندما نصف اكل العيش ونقصد به العمل نقول أكل العيش " مر" والمرار الطافح الى اخر تشبيهاتنا نحن المصرين يعنى ايه الغربة مرة ويعنى ايه اكل العيش مر ويعنى ايه اللي عايش جوه مصر افضل حالا من اللي عايش خارج مصر ما اكيد احنا عايشين هنا فى الغربة افضل أه طبعا اكيد أفضل انضف اكل واحسن شرب وموبايلات متنسوش الموبيلات بس هوة فى فرق وانت فى مصر عايش فى بلدك وبين ناسك واهلك لو حصلك اى حاجة تقدر تميل على ابو فلان او أخوك أو أبوك الناس كلهم اهلك ممكن تكون فى الغربة راكب عربية ما كنتش تحلم بيها وفى مصر بيطلع عين ابوك محشور فى الأتوبيس والف واحد يدوس على رجلك وتشم ريحة عرق وواحد فطر فول على الصبح راح مغبر الجو تنزل من الأتوبيس تجرى على مترو الأنفاق القميص المكوى فجأة كأنه طالع من بق .... انتم عارفين بقي ....وقبل ما توصل الشغل ترقع طب الفول بالزيت الحار من عم "على دولار" بتاع الفول تطلع الشغل الواد خميس يجيبلك كوباية الشاى تقعد تزعق على محمد زميلك انت فين يا بنى تعالي عايزك وعايش حياتك مش خايف من حاجة تمر ساعات العمل وتطلع تجرى على اخر نفس تركب الميكروباص تقعد مقرفص عشان تلحق موعد العمل الإضافي تخش الشغل وانت عينيك زائغة هو المدير جه؟
.. يقولك زميلك لا ربنا ستر خش بسرعة ويسألك اتغديت؟ تقوله لا يقولك خلاص انا عملت حسابك وجبتلك علبة كشرى من ابو طارق تقولة زودت الشطة؟ . يقولك ياعم ما تقلقش يمر الوقت وتعود لرحلة العودة الى البيت نفس الشعبطة وتنزل الميدان تروح جايب اتنين كيلو برتقال" برتقان يعنى" للعيال البياع يقولك والله يا بيه دة نمرة واحد بس طبعا انت عارف انه بيضحك عليك وحاطط كام واحدة مفعصة تقول مش مشكلة هبقي اكل انا المفعصة وقبل ماتدخل على العيال تسمع من على الباب بابا جه بابا جه "اصل العيال حافظين دقه رجليك على السلم " يفتحوا الباب يتلقفوك أنت وكيس البرتقال" البرتقان يعنى" والوليه ام العيال تقولك واحشتنا يا ابو عبده تقلع هدموك تخش تستحمى توفر الشامبو للعيال وتغسل راسك بصابونة الوش " الصابونة ام ريحة " مش مهم القشرة تجي تروح .. تطلع تتركع العشاء وتأكل تخش على السرير تسأل العيال تمام؟ تلاقيهم فوق راسك فجأة وكل واحد يحى حكاية امهم تشخط فيهم كل واحد على سريرة وتاخد بوسة من الصغير والكبير وام العيال تقولك ربنا يقويك عارفة الحمل تقيل تقولها ولا يهمك ومعلش الشهر الجاية هجيبلك الفستان تضحك وتقولك فستان ايه ولا يهمك المهم نجيبلك قميص وغمزة ولمزة وهى العيال نامت تقولك ياراجل دة انت جاى هلكان تضحك وتقولها ولا يهمك دة احنا تمام والكل ينام سعيد
يا ترى احنا هنا اية ؟! بس من غير ما حد يشتم !!!!
وائل سرور