حق " روقة " ولا مش حقها ، مش هى اللي نزلت البحر بدالك .. يبقى حقها ولا مش حقها ؟ حقها طبعا!
روقة دي اللي كانت نورا في فيلم " العار " ، ومادام الشىء بالشىء يُذكر ، وبما ان فيلم " العار " لسه شغّال الله ينوّر .. يبقى من حق احمد عز انه يترشح في الانتخابات اللي جاية ، الراجل اسم زي الطبل من زمان ، ملك الحديد فيكي يامصر وفي الشرق الاوسط ، اتحاكم في كام قضية فشنك وطلع منها ، اخر قضية خرج بكفالة 100 مليون جنيه " خدوا بالكم من المبلغ ، 100 مليون جنيه .. انا لو عليا قضية وخرجوني بكفالة الف جنيه حاقولهم خلّوني محبوس احسن .. معيش الف جنيه" .. انما عز معاه ، واللي معاه باشا ، ومع ذلك قدم تظلم من حكاية الـ 100 مليون ، فصعب ياحبة عين امه على المحكمة فقررت تخفيض المبلغ الى 10 مليون بس ، قام عز راميهم " على جزمته " وخرج.
عليه احكام تاني ؟ لأ .. عامل مشاكل من ساعة ما خرج ؟ لأ .. حد مقدم بلاغ ضده في اى حاجة ؟ لأ.. طيب لمّا كل الإجابة لأ .. زعلانين ليه يا " رمم " انه مرشح نفسه لمجلس الشعب .. حقه ولا مش حقه .. ؟ حقه طبعا .. مش هو ده فيلم " العار " بتاع روقة .. خلاص يبقى ده فيلم " العار " بتاع احمد عز بتاع الحديد مش بتاع قضية زينة اللي ملهاش في النجاسة!!
طيب .. لحد اللحظة اللي بتنيل على عيني واكتب فيها المقال ، تقريبا 106 من اعضاء الحزب الوطني مقدمين أوراقهم للترشيح ، منهم طبعا عز بيه ومنهم محمد ابو العينين ، ومنهم هاني سرور صاحب فضيحة الدم الملوث ايام المغفور له السبب الرئيسي في كل الهم اللي احنا فيه حسني افندي ابن مبارك .. يعني الحلوين حيجمعوا تاني تحت قبة المجلس ، وحيمثلوا غصب عن الكل الأغلبية وممكن هما اللي يشكلوا الحكومة وممكن جدا ومش بعيد ابدا نلاقي احمد عز رئيس الوزراء والمهندس محلب ياخد الصابونة!
وبيقولك ان جماعة الحزب الوطني بعد حلفان اليمين والاستقرار تحت القبة حيشغلوا بدل تسلم الايادي وبشرة خير ، بيقولك حيشغلوا اغنية صباح الله يرحمها " والله واتجمعنا تاني ياقمر " .. وبيقولك كمان حيستأذنوا رئيس المجلس انهم يجيبوا دينا الرقاصة في اليوم ده عشان تكمل الفرحة وعشان كمان بيقولوا عنها انها احسن واحدة ترقص على انغام الاغنية دي .. حقهم ولا مش حقهم ؟ حد فيهم عليه حاجة ؟ لأ .. حد فيهم مدفعش الرسوم ؟ لأ .. حد فيهم مترسيش عليه شروط الترشح ؟ لأ !! .. طيب لمّا هو لأ يا "رمم " ، معترضين ليه وواجعين دماغ اللي خلفونا ليه؟!
ده الراجل اللي هو احمد عز حسب بيان ترشحه وحسب كلام المحامي بتاعه اللي اسمه محمد حمودة اللي لاهف منه يجي 20 مليون لوحده اتعاب محاماة .. بيقولك ان الحاج عز استخار ربنا فجاله في المنام ملك همس في ودنه وقاله : اترشح ياعز وربنا معاك .. انت اتظلمت يا عز .. ولاد الحرام محدش فيهم سابك في حالك .. وانت كنت انزه عضو في كل دورات " مياه " مجلس الشعب اللي فاتت ، افتروا عليك ياغلبان وقالوا عليك يامسكين انك كنت الحاكم بأمره في المجلس .. بصباعك اليمين تنجّح فلان وبصباعك الشمال يسقط علان ، وتحط الصباعين الاتنين في وش التخين اللي يقولك بتعمل ايه ، والمحامي بتاعك اوعى تستغنى عنه ابدا .. ده راجل بيعمل بأصله ، واخد منك ملايين تسد عين الشمس ، فلازم يدافع عنك ويقول لـ عمرو اديب : ربنا أظهر الحق وظهرت براءة موكلي من فوق سبع سموات ، احمد عز هو رجل الصناعة الوطني الأول في مصر ، هو اللي خايف على اقتصاد مصر من الانهيار ، فقال أرشح نفسي واساهم مع النخبة الحاكمة في النهوض باقتصاد بلدي مصر اللي فيها وُلدت وعلى أرضها اتربيت وفي أحضان ترابها سأدفن .. احمد عز اتظلم يارجالة " ده حمودة هو اللي بيقول .. وانا لو منه وقابض الملايين دي كلها لازم اقول " .. وعلى فكرة محمد حمودة ده هو اللي كان محامي ممدوح اسماعيل بتاع عبّارة السلام اللي غرق فيها اكتر من الف مصري ، لو احنا لسه فاكرين .. يعني على رأى عادل امام " متعودة .. دايما " .. يبقى حقه ولا مش حقه .. انا بتكلم عن حمودة .. حقه طبعا .. ولا حيعمل زي القطط ياكل وينكر .. من حقه زي ماكان من حق روقة .. فـ " العار " فيلم عرض مستمر من ايام روقة لحد النهارده؟!
أه يابلد .. اللي قمتي بالثورة عليهم كلهم براءة وقاعدين في بيوتهم دلوقتي .. وكتير منهم راجع تاني بعين قوية و " بجحة " .. وكتير من شبابك اللي قاموا بالثورة ، هما اللي في السجن!!
مش بقولكم .. " العار " عرض مستمر كل ماينتهي يتعاد تاني .. بس اوعوا تنسوا " روقة " حقها ولا مش حقها؟ .. طبعا حقها وحقها وحقها!!