طبعا أعتقد إن معظم الأخوة أعضاء الموقع عرفوا بموضوع القضية التي رفعت ضد الصحفي المحترم الأستاذ وائل الإبراشي... وللي مش عارف هالخص لكم الموضوع في سطرين.. طبعا الأستاذ وائل الإبراشي صحفي محترم ومعروف بمواقفه المحترمة ضد الظلم واللي حصل إنه قاد حملة للرد على البيه ابن الباشا وزير المالية يعترض على إقرار قانون الضريبة العقارية اللي احنا كلنا رافضين له ومش عاوزينه ويا ليتنا كلنا وائل الإبراشي يمكن كانوا اختشوا على دمهم... المهم يا حبايبنا الوزير ابن الوزير!! معجبهوش الكلام ورفع قضية على وائل الإبراش وللأسف القضية اتحولت لمحكمة الجنايات يعني تخلوا بالكم كلكم اوعى تقول رأيك هتتقرص من ودنك وتتحول لمحكمة الجنايات اوعى يا مصري تقوم لك راس اوعى يا مصري تعترض.. الكرباج موجود وعشماوي ربنا يطول في عمره والمعتقلات كتيييييييييير... المهم يا اخوانا لبسوا للراجل تهمة التحريض على الانقلاب ودي طبعا من أقصى وأصعب المواد التي يتضمنها قانون الجنايات وهي التحريض على قلب نظام الحكم.. وهو الراجل لم يقلب ولم يعدل يبقى ايه الحكاية بقى يا حكومة.. يعني الراجل لما حب يوصل صوت الملايين من الشعب المصري بصرخة احتجاج سلمية وأنة ضمير إنسانية للناس اللي مش مستحية هيروح السجن وده حال اللي عايش في مصر... ايه رأيكم في الحكاية دي أنا دمي محروق فعلاً يا اخوانا انتو مش مقدرين العواقب ولا متخيلين التوابع لهذا القانون الظااااااااااااااااالم وكله تحت عين الكبار كلهم يعني احنا مثلا أبسط مثال احنا الناس اللي سبنا لهم البلد يعملوا فيها ما بدالهم وجينا الغربة عشان نعمل لنا أي حاجة تأمن مستقبل ولادنا واتغربنا عن حبايبنا واهلنا واخوانا وتراب بلدنا وعشنا الغربة بحلوها وبمرها وصبرها وبقهرها كل ده ومش سايبنا في حالنا. يعني مثلا عندك شقة أو بيت شقيت وضيعت من عمرك احلى سنين عشان تحوش تمنه وبعدين يجي الوزير ابن... الوزير يجبرك تدفع عليها ضريبة يبقى ده عدل ده عدل ده عدل؟؟؟.... فين بقى أعضاء مجلسنا (الموكر) اللي احنا بننتخبهم عشان يساعدونا تخيلوا إنهم هما اللي أقروا القانون ده ووافقوا عليه... واحد يقولي ما هو الأغلبية وطني أقوله وهو الوطني مين اللي انتخبه ما هو شعب برضو... يا اخوانا لازم نفوق وصوتنا يوصل للناس اللي نايمه في الحرير ومش حاسة بالناس اللي زينا.... يا ربي ارحمنا من كل ظالم وعجل به قبل أن ينكل بنا... اللهم آمين هاقول حاجة اخيرة ... ارجو من اخوانا اللي يقرأوا مقالي البسيط ده إنهم يردوا عليا بتعليقات عشان الناس تحس بحالة الاستياء اللي موجودة ومش لازم الواحد يعلق ويشتم ويسب حد... لا.... نكون على مستوى الحوار وبالهدوء ممكن نقدر نعمل حاجة وطبعا احنا هنا مش هنقدر نعمل حاجة لأسباب كتيرة بس فيه ناس لسه شرفاء في البلد نتمنى إن ربنا يوفقهم عشان يعملوا حاجة. رجاء إذا نشر هذا الموضوع على الموقع أن تساهموا في التعليق عليه حتى لا أشعر بأنني أنفخ في قربة مقطوعة... وشكراً لكم وربنا على الظالم..