شعب طارئ...!!!
صباح الخير ياعم حسنين..شايفك بتلملم في هدومك ياتري رايح علي فين..؟؟ ياريتك تخليك معانا نطلع ونقعد زي زمان نشرب الشاي في الفيشاوي ونتمشي حبتين..وبعدين نزور المقام الطاهر ونصلي لله ركعتين..قلت إيه ياراجل ياطيب ياريتك تسمع كلامي وتيجي معايا ياتقوللي رايح فين..!! عم حسنين ضحك وسلم عالحاج أيوب..وقال أنا واخد بعضي ورايح أبلبط في بحر اسكندرية يومين بس يادوب..إيه رأيك ماتيجي معانا صحبة ننسي ونحلم ونعيش في غير زماننا ده اللي ماشي بالشقلوب..!! المهم الحاج حسنين ودع صاحبه وراح يجري علي محطة مصر..أتاريه كان حاجز في ديزل الساعة أربعة بتاع العصر..وقعد يدور علي مكانه وفي الأخر لقاه فرح وصرخ وكأنه حقق نصر..حسنين قعد وفرد رجليه وبرطع في المكان وافتكر الديزل وكأنه ساكن قصر..!! أتاري السكة الحديد حاولت تجمل نفسها وبدأت التجديد..قال اللهم اجعله خير يارب يجعل يومنا سعيد..المهم زي ماطلعنا في الميعاد نوصل بنفس الدقة ويحافظوا عالمواعيد..ما هو كل غربال جديد وله شده ودى بشاير الوزير الجديد..عقبال يارب بعد ما فرًح العمال بالحوافز ياخد باله كمان من خط الصعيد..الصعيد محتاج نظرة وأول حروف التنمية فيها تطوير السكة الحديد..!! الديزل مر علي بنها بخير وسلام..ودخل علي طنطا بشويش وحسنين فتح الشباك سمع دوشة وظيطة وناس بتهلفط بالكلام..وشاف تجمعات ويفط مليانة شعارات واحتجاجات وسفسطة عن كرامة مهنة المحامين أو الموت الزوئام..حسنين كتير انفزع وجري وقفل الشباك خايف علي الأجازة مرعوب من الكلام..بص يمين وشمال يدور علي ونيس يقلل روعته ويبدد الآلام..!! حسنين سأل جاره ببراءة ليه الدنيا هايصة وإيه أصل الحكاية..أتاري هناك اضراب من السادة المحامين وصدام مع القضاه وكله حسب النوايا..ياتري أهل الميزان والعدل حيحلوا قضيتهم وللا مشاكلنا وقضايانا..لو هيبة القضاء اتهزت يبقي عليه العوض فينا ولا عاد لينا ضهر وسند ولا حماية..لو القضاء بقي طرف في أي صراع حتضيع حقوق الولايا..!! الديزل إبتدى يتحرك ويكمل المشوار..حسنين دعي ربه يوصل قبل مايضيع النهار..كان مشتاق لبحر إسكندرية وهو سرحان في أفكاره حس بالديزيل بيرتاح في الطريق سأل إيه السبب قالوا مشكلة بسيطة في كفر الدوار..!! كفر الدوار بلد جميلة فيها كتير من المصانع وكثافة عمالية..حسنين شاف وحس باليفط والشعارات اللي مليانة حزن وألم وعبودية..وسأل إزاي الحكومة تسمح لمستثمر ياكل حق الغلابة بالقصد والنية..مشكلة كفر الدوار عنوان كبير للتفريط في حقوق العمال والمكاسب العمالية..الناس لازم ترتاح وكمان حسنين اللي كان نفسه يوصل البحر ويبدأ أجازته الصيفية..راح وقفل الشباك ياعيني مشتاق للبحر والكورنيش والسهرات الحلوة الهنية..واخيرا وصل ووقف الديزيل في عروس البحر الجميلة الأسكندرية..يادوبك نزل في المحطة وجري ونط في أول تاكسي والنبى ياأسطي عند أول بحر عاوز أنزل هناك وأبلبط شوية..يااااه وحشتيني قوووووى قوووووي ياأسكندرية..!! لكن لما وصل وجري عالبحر شافه مليان بالسواد..وشاف ناس متجمعة مكتومة بالحزن اللي كان واضح عالعباد..وناس بتحتج وتصرخ بمنتهي العناد..وشاف مخبرين في حوار مع الناس معدوم من الوداد..ياتري إيه اللي يخلي الناس تخاف من العسكري وليه الشعب والشرطة بقي كل واحد في واد..؟؟ أتاري الموضوع حاجة حصلت قبل كدة من غير تغيير..مخبر ضرب مواطن باعتباره متمرد خطير..وبيتعاطي بانجو وهربان من العسكرية والنتيجة مات بسبب سلوكه الطائش من غير تعذيب ولا كسر جمجمة أو تشويه وده مثبوت في التقرير..ورغم الصور اللي عالنت وفارق الشكل قبل وبعد الحادث إلا أن التقرير بيقول القتيل سليم وحرام التلفيق أو التزوير..حسنين خاف وبكي وافتكر ولاده أحمد وعبير..لو لا قدر الله احتكوا بأي مخبر ياتري حيكون إيه المصير..ياتري احنا رايحيين علي فين وليه بقينا كده ومين اللي حيرحم المواطن من الغفير..!! رغم إن حسنين كان متفائل من اللي بيسمعه في القنوات الفضائية..وكان كتير مبسوط من الأداء والإنتصار السياسي واجبار تفتيش منشآت اليهود النووية..وكان متفائل كتير باهتمام الكبير بملف النيل بصفة شخصية..وحس إنه في أمان وإن بكرة ولاده حيلاقوا شوية المية..وانبسط كتير بفتح معبر رفح بقرار مصري سيادي للغزاوية..كنا ماشيين صح وآخر جمال ليه بقي التجاوزات دي ومين اللي مُصر يشوه العلاقة بين السلطه والمصراويه..أكيد ناس محتاجه علاج نفسي وشدة ودن وفاكسين لعلاج التكبر والغطرسة الهمجية..الدولة حاكم ومحكوم ودي علاقة مصيرية..شعور المواطن بالعدل والأمان هو قمة الحكم والديمقراطية..الخلاصة حسنين جاله اكتئاب وحجز في رحلة العودة اللي جاية..وقال ياريتني سمعت كلام أيوب ورحنا وسهرنا في الحسين وقعدنا نتسلي بالكلام واتمتعنا بالقاهرة الفاطمية..لكن بسرعه جسمة اتهز وخاف يعتبروه هو وأيوب من المماليك المشاغبين وياخدوهم في نزهة أمنية..أو يروقوه في لجنة تفتيش مروري أو حتي أمنية..واليومين دول المحاكم عطلانة والمحامين محبوسين ولا فية قضايا ولا مرافعات جنائية..يعني محجوز محجوز ياحسنين ومن غير ماتعمل حاجة ولبساك القضية..مش كان أحسن تسمع كلام أيوب وتقعد تلعب طاولة أو تزور دار الأثار أوالقرية الذكية..واضحك وانبسط وابعد عن المخبرين والطوارئ وحواديت بهية..واعتبر نفسي مواطن من شعب طارئ قابل للتفتيش في أي ثانية..والنصيحة الأخيرة قبل ماتخرج الشارع لأي سبب لازم تودع أهلك أو تكتب وصية..لكن خد بالك ده مش علشان مصلحتك ده علشان مصلحة الوطن وهي دي القضية..!! said_elmasryfahmy@hotmail.com