فرعون ..ولكن..!!
الحمد لله..وأخيرا رجعت مصرنا للمصريين..الحمد لله..زالت الغُمة وزال الهم عنا ورجعت الفرحة من تاني على وشوش الكل والناس فرحانين..خلاص بقى فيه أمل وفيه بكره وفيه حاجة كده دخلت جوانا بتخلينا نفرح وإحنا مش حاسين..خلاص ربنا رحمنا من جماعة انتهازية عميلة قال إيه وبتضحك علينا باسم الدين..مين قال جماعة بفروعها ما بين جماعات جهادية أو إرهابية أو مهما كانت مسمياتها تسطو وبكل بجاحة على ملكية صك الإسلام والمسلمين..وكأن كل منهم مندوب سامي من السماء وصاحب رسالة ربانية حامل لواء المؤمنين..جماعة بمليون وش ومليون ذمة أصحاب نكاح جهاد وزواج أطفال وإرضاع كبير وكأننا في عصر الجاهلية عايشين..وأحزاب دينية فاشية سطت على مفاصل الحكم في أكبر صفقة بين المصالح الإستعمارية وجماعات المتأسلمين..للأسف الوطن في خطر شديد وشايف تحت الترابيزه كلام مش سامعينه ولا عارفينه لكن بيه حاسين..
مفاوضات ومباحثات وأشتون رايحه وأشتون جايه وإحنا زي البلاليص مش فاهمين..وحكومة على ما تُفرج مش محسوسة من الناس وتشعر بانفصام واضح بينها وبين السادة اللي عنهم مسئولين..ومظاهرات أسبوعيه مريبة منظمة مدروسة رغم هيافتها ولكنها نغصة في حلق وطن يبحث عن استقرار مفقود بفعل فاعل مرفوع بإراده شعبية وأعداد خرجت الشارع بالملايين..ووضع اقتصادي حرج واجراءات غير محسوسة للمواطن العادي وأمنيته في رؤية طفرة في حياته اليومية وترجمة الخطط لإنفراجه حقيقية في حياة المواطنين..وحرب جهاد ضد أذناب المتأسلمين في سيناء أرض الفيروز ومهبط الرسالات ومآوى الأنبياء والمرسلين..كل ده وحاجات كتير محتاجة قرار حاسم وواضح ورغبة أكيده في معرفة الفرعون اللي جايً مين..مين اللي محتاجه الشعب ده اللي شال حكامه في لمح البصر بعد ما كان مستكين..يا ترى إحنا محتاجين فرعون وقائد بجد وللا رئيس والسلام يؤدي الغرض ومحاصر بالشللية والتابعين..
محتاجين كاريزما وزعامة وللا رئيس أي حزب وهمي رصيده شوية خطب على كام توك شو على حبة معجبين..يا ترى عاوز يكون شكل محمد على وللا عبد الناصر اللي حفر في قلوب البسطاء فكرة وطن عايش جواهم سنين..وللا زي السادات أو مبارك اللي جرف حياه السياسة الوطنية ولا عاد عندنا صف سياسي تاني ولا قيادات بديلة ولا حتى شبه سياسيين..وللا زي مرسي خادم جماعة دمرت حياته وحياة حلمها اللي ذهب مع الريح وطار في غمضة عين..يا تري محتاجين ديكتاتور حازم يحكمنا بالعدل وللا رئيس من غير هيبه يحكمنا من المكاتب والبطانة زي بعض المسئولين..المشكلة عويصة فعلا ومحتاجة حسن اختيار وأمانة ومصلحة وطن تحتم علينا إن الكل يبقى واعي ونكون كمان حريصين..يا ترى يكون مدني وللا عسكري أو بخلفية عسكرية ومتخفي في شكل المدنيين..أرجوك بص للساحة الآن وفكر في اللي حواليك وبعيدا عن أي ضغط شعبي لشخص بعينه إسأل نفسك اللي يقدر يحمنا مين..إختار ومن غير أسماء ولا تقوللي سيسي ولا برادعي أو حتى حمدين..لكن قبل ما تختار بلاش مبدأ قول حق يراد به باطل واشهد بالحق وقول مين اللي يصلح لها واحد مدني وللا من العسكريين..بس أرجوك قبل ما تقرر إسأل نفسك مين اللي كشف الغٌمة وأزاح كابوس من على صدور كل المصريين..مين اللي شال كفنه على إيديه ووقف ضد بطش وجبروت جماعة وقالها كلمة وكان قدها وحسم الأمر من ليه ولا كان ولا مين..مين اللي وعد وأوفي وحفظ كرامة كل مصري وهيبة جنودنا أبطالنا المجاهدين..مين اللي قال مصر مش للبيع ولا للإيجار وللا حكر على المتأسلمين والمتأخونين..الكلام كتير والخطب الرنانة مطبوعة وجاهزة للنشر لكن مهما كان لا عاد ينضحك علينا ولا عدنا نصدق غير الصادق الجاد الأمين..الملعب مكشوف واللعيبه معروفين وتاريخ كل واحد واضح والباقي بس نعرف نختار مين..!! علشان كده لازم نفكر في الإختيار لأن الوضع فعلا خطير..مصر بتتحول وبتتكون من جديد وبتعيش مرحلة صعبة ومحتاجة إنسان عارفها وحاسسها ويكون بيها خبير..مصر محتاجة فرعون صاحب رؤيا وحسم وقوة بصيرة وأداء موزون ورزين وقدير..عاوزين فرعون رحيم كل خارج عن القانون ويحمي كل مواطن بالحق والعدل ونشعر معاه بالأمن والتقدير.. زعيم مش مجرد رئيس ونشعر إن بلدنا اتغيرت فعلا وبجد وإن هناك تغيير..مصر محتاجه زعيم وبجد يبنيها معانا من جديد ويلملمها ويجمع شمل ولادها ويقودنا للإبداع والتطوير..مصر محتاجة زعيم صاحب رؤية وبصيرة وأفكار خلاقة بناءه وبصمات التغيير والتنوير..زعيم ديمقراطي بمنتهى الديكتاتورية حريص على الإختلاف في الرأي واسع الصدر مؤمن بقيمه وطنه قادر على التغيير..!!
الخلاصة مصر محتاجة وببساطة شخصية حازمة جريئة مدعومة بحب الناس ومنظومة راسخة قوية..شخصية مش من حزب واهي أو لا تابعة لغير المصريين وإرادتهم الصلبة الوطنية..شخصية تحس بالغلبان والبسيط وتحكم بالعدل وتبسط النظام على الجميع وتؤمن بالحوار والمشاركة السياسية..رئيس يكون من البشر زينا مش نصف إله لا نمجده ولا نعبده ولا نألهه بهتافات البطانة والشللية..رئيس مننا يكون من وسطنا دافع عن البلد دي بروحه ودمه ودايما قد المسئولية..مصر محتاجة زعيم مش مجرد رئيس وهي دي القضية..آي والله هي دي القضية..!!
said_elmasryfahmy@hotmail.com