الحلقة السادسة
ام عبير بياعة الفجل والجرجير مرشد قوى بجماعته ومرسى غير ذلك !!!
اثناء عودتى الى منزلي بأحد أحياء مصر الشعبية كانت ام عبير بياعة الفجل والجرجير والتي تتخذ من ناصية شارعنا مكان لبيع الفجل والجرجير وبعض الخضروات منذ سنين دأبنا على مشاهدتها فى هذا المكان حتى اصبحت عضو رئيسي في كل أسر المنطقة.. وجدتها جالسة تضع يدها على خدها فى حزن فاقتربت منها قائلا السلام عليكم يا ام عبير كيف الحال؟
ام عبير : بقولك اية يا بنى روح على بيتكم مش نقصاك انا النهارية قرفانة وعلى اخرى لو رمتني بفوله هتقسم اتنين ( فتابعت سؤال) خير يا ام عبير فى حد مزعلك ام عبير: اه ومين دة أم عبير :هتقعد على القفص ولا خايف على البدلة وبسرعة قمت بالرد :لا هقعد بس قولى ..وجلست على احد الأقفاص بجوارها وبدأت تحكى ام عبير : شوف انا ذى كل البلد كنت فرحانة بمرسى لما مسك وقلت خلاص الراجل مننا وعارف أحوالنا وعاش حياتة كلها راجل عادى وقال كلام حلو قوى فى الأول قلت خلاص كلها كام شهر والأحوال تتعدل ومصر تبدأ تمشى بدل ما هى عمالة تعرج بقالها سنين وفجأة حسيت ان الراجل بيتحارب من هنا وهناك من جوة ومن برة وفى ناس مش عايزاه ينجح قلت فى بالى وماله اكيد الرجل فاهم دة وهيظبط الأمور دة دكتور برضوا مش راجل عادى بس ولا فى حاجة اتغيرت وما بقتش عارفة هو مرسى الريس بتاعنا دة رايح بينا لفين انا خايفة ليخش بينا فى حيطة المهم قلت لا لا اكيد الرجل مضغوط علية من الجماعة بتوعه وطبعا حمدين والبرادعى وغيرهم بيصطادوا فى المية العكرة وخلو شكلة وحش قوى قدامنا وعم المرشد دة كمان زانق مرسى قوى عامل ذى اللى أبوه أشتراله جلابية وطلعت كبيرة علية وابوة لا عايزة يقلعهالو ولا عايز يساعدة يظبطها وعلى كدة كل ما الناس تشوفه لابس الجلابية يتريقوا علية
قمت بالرد على أم عبير : جلابية اية يا ام عبير فسرى كلامك
ام عبير : يا واد أفهم مرسى البلد مبهوقه علية ومش قادر يدورها العملية بظوطط منه على الأخر لا هو عارف يخرج من تحت ايد عمه المرشد ولا عارف ياخد حق ولا باطل مع المعارضة يمكن لو مرسى مسك البلد فى وقت عادى ومش فى الظروف الزفت دة كان يقدر يمشى البلد لكن مصر دلوقتى محتاجة واحد ذى عبد الناصر فى قوته وشخصيتة الجامدة وواحد ذى السادات فى ذكائة ومخة الكبير نفسى يطلع لنا راجل ونسميه عبد الناصر السادات وإلا فجأة هنلاقى نفسنا فى مصيبة فسألتها: طب ومين من اللى موجودين على الساحة ينفع يا ام عبير؟ ام عبير : شاكلك ما فهمتش حاجة بقولك واحد ذى عبد الناصر والسادات مع بعض وكل الموجدودين ولا واحد فيهم عندة اخلاص عبد الناصر لمصر ولا ذكاء وحب السادات لمصر كلهم عبيد لأعلام وقنوات ورجال أعمال وشخصياتهم كلهم أضعف من شخصية الرئيس مرسى قدام عمه المرشد هو مافيش اسهل من انى اقولك أنت ما تفهمش ولا عارف تسوق وهتلبس بينا وتخيش بس لو اللى بيتكلم قعد مكان السواق عشان يسوق مش هيعرف يحركها من مكانها من أصلة وسألتها : طب والحل يا ام عبير أم عبير الحل ان مرسى يطلق الجماعة بالتلاتة ويقعد المرشد فى البيت ويحل الجماعة دة ويكتفى بالحزب بتاعهم وينزل قوانين تظبط موضوع اسهال المظاهرات ويرجع الشرطة تضرب بأيد من حديد على كل مجرم وحرامى ابن كلب وكل واحد مستهبل فيها وفرحان ان البلد لا فيها ظابط ولا رابط ويغير قنديل بأيمن نور ويقفله كام قناه فضائية من اللى بتحرض الناس على البلطجة هيقولوا علية ديكتاتور .. مش مهم.. المهم البلد تقف على حيلها ويبطل يسافر برة ويلبس برانيط مش وقته خالص يخليه جوة البلد ويشوف كل حاجة بنفسة ويخلص موضوع القضاء الفاسد ويشوف هيعمل اية فى فلوسنا اللى برة دحنا شوية وهندور نشحت على الأبواب من الأخر لازم مرسى يمسك حكم مصر لأنة لغاية دلوقتى مامسكش حاجة خالص يأما كدة يأما يسبها خالص لو مش قادر عايزين الحق كلام أم عبير فى حاجات كتير صح فالرئيس المحترم مرسى لم تتضح معالم سياسته الإصلاحية حتى الأن كما اذا دققنا النظر فلن نجد له أجندة واضحة لصالح المواطن والوطن يقوم بتنفيذها وحتى الأن لم تظهر له هيبة الرئيس كما لم تظهر له شخصية ثابتة للأن فكلما قال يعود فما قاله ولم تحل مشكلة واحدة حل جذري والشعب المصرى لم يعد ذلك الشعب المستأنس لأول مرة أصبح الناس الآن جزء من المعادلة السياسية للبلاد وللاسف لم يستطع مرسى ان يشد من عزمه بالشعب وظل أسير وهم ان جماعتة هى من تحمية فشعب مصر التسعين مليون لو حذفنا منهم معارضو الرئيس وجماعته سيتبقى لمرسى أغلب الشعب المصرى الرجال البسطاء الذين يحلمون بالإصلاح وكانوا سيمثلون حائط صد منيع ضد جماعة الأخوان اذا حاولوا البطش بمرسى وكانوا ايضا سيدافعون عن مرسى ضد معارضية وسؤال اطرحة للرئيس... لماذا لم تستقوى بالشعب على الجميع ؟
لماذا خشيت ان تخرج من عباءة الأخوان بعدما ظهروا على حقيقتهم ؟ قل كلمة صدق واحدة وستجد مصر عن بكرة ابيها خلفك تدعمك ضد معارضيك وضد الأخوان !! أذا كان الأخوان يرهبونك فنحن معك ولكن قل الحق ولا تصمت يا سيادة الرئيس ؟
نريد ان ندافع عنك ولكن تصرفاتك تغل ايدينا ؟
نريد ان نقف خلفك ولكنننا لم نعد نراك المسافة بين شعبك وبينك تبعد وتبعد وأخذة فى البعد يا سيادة الرئيس وانى لأخشى عليك من هؤلاء وأولئك لم يعد فى الحديث بقية لأن مرارة الأحداث تغلف الوطن والمواطن والمتحدث ..أغفر لى إن تجاوزت فى عتابي لك فلو لم اجد فيك خيرا ما عاتبتك!!! Wael_lawyer_life@yahoo.com