السلام عليكم ورحمه الله وبركاته وكل عام وانتم بخير يستغرب القارىء مع بدايه قراءه المقاله ولكن حين يتعمق فى المقال يرى ان كلامى صح ولنرى سويا كان الناس زمان ايام العز والرخص لا تترك اى مناسبه فى الاعياد او الميلاد او الافراح الا وتذهب الى ذويهم واهلهم وعائلتهم واصدقائهم ومعهم الزيارات من خير الله وهى ماتسمى فى الارياف ( مطله ) يعنى زياره فيها خيرات الله من ارز/ وسمن/ ولحم/ وزيت/ وشاى/ ومكرونات / المهم كل ما يلزمه البيت وتكونهذه الزياره ترد حين يكون هناك مناسبه اخر عند من ذهبت اليه يعنى ترد تانى فى اى مناسبه لمن راحت له الزياره وكان الكل راضى وصله الرحم كانت موصوله بين الاخوه والاحباء والاصدقاء وكانت الحياه حلوه جميله سلسه / ولكن الان وفى ظل الغلاء الفاحش القاتل المدمر الذى نعيش فيه الان كل واحد قافل على نفسه بيته وكانن زى النعامه خايف من اى مناسبه لاى احد من اخواته او اصدقائه او جيرانه نعم هو فرحان للمناسبه السعيده لاى احد لكن المشكله الكبرى حياخد معاه ايه للزياره وده طبعا واجب متعارف عليه وعيب ان الواحد يدخل فى اى مناسبه وهو ايد ورا وايد قدام يا عيب الشوم ولكن والله العظيم غصب عنه لانه اقل زياره للحبيب نقول مثلا 100 جنيه يجيب الواحد تورته او علبتين جاتوه ويدخل بيهم لكن من فين والرواتب كلها عايزه زياره ودعم والجنيه عملوه فضه والخمسه جنيه كمان واصبحت العمله والجنيه المصرى ما هو الا فضه فى فضه تخيل لو اخويه اتجوز وعايز ادخل عليه بمطله وقلنا المطله يعنى زياره حلوه تملا العين اقل شىء لازم اعمل حسابى فى 500 او 600 جنيه مثلا عشان اجيب حاجه حلوه من لحمه يا دنيا لحمه وارز وزيت وشويه حاجات كده وكمان انقط اخويه كمان يعنى حسبه تخلى الواحد والناس دلوقتى بيعملوا حجج عشان يهربوا من الواجب فواحد يقول والله انا مشى قدرت احضلر الفرح او اجى لك فى العيد اوفى اى مناسبه لانى كنت عيان/ كنت مسافر/ كان ابتى مريض المهم يخترع اىحجه لعدم ذهابه الى المناسبه لاخوه او صديقه او جاره وطبعا عنده حق لان الذهاب له فيه قطم وسط ويرجع اخوه او جاره او صديقه اللى كان عنده المناسبه ولم يحضر اخوه او اصدقائه تلف الايام وتكون المناسبه عنده هو الذى لم يحضر يرجع اخوه يقوله والله غصب عنى كنت عيان او مريض او ابنى عيان / وبذلك تنقطع صله الرحم بين الناس ويزعلوا مع بعض وده يقول لده ماهو ما حضرش وتكتر المشاكل والعتاب بين الناس والغلاء والحكومه هما السبب فى قطع صله الرحم بين الناس وارحمنا يا رب العالمين ،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، اخوكم / سليمان عبدون / محرر بجريده المعاصر الاخبارى / وعضو لجنه حقوق الانسان / ومؤسس حزب صير ايوب / ومقاطع اللحمه نهائيا