في احدث اصدار فكاهي لانجازات حكومتنا النظيفة الذكية... ودليلا على حسن تعاونها مع نواب الشعب والقواعد الشعبية...وارضاء منها للسادة اصحاب الحظوة والحصانة النيابية، واللي بيمثلوا الناس الغلابة في كل مكان على ارض المحروسة بهية... واللي المفروض يحافظوا على مصالح المواطنين في دوائرهم الانتخابية... ويكونوا همزة وصل بين المواطنين والسادة المسؤولين في المصالح الحكومية... وده الهدف والخلاصة اللي بيحتاجها المواطن من العملية الانتخابية...! لكن وطبقا لنظرية خد وهات... وطمعا في اكتساب التأييد والهتافات... وتمرير القوانين الحكومية والتشريعات... والفوز برضا النواب لتحقيق الاهداف وتأييد القرارات... وده طبعا في نظر الحكومة الذكية... سبب وجيه لتحقيق الانجازات... طبقا للمبدأ المعروف ابوك السقا مات...!! حكومتنا الذكية تنازلت عن حقنا وحقها في علاج المواطنين... وسلمت مصير علاجهم للسادة النواب المحترمين... واذا كنت مواطن وعاوز تتعالج تلاقي نفسك لايص ولاعارف تروح فين ولمين... ولا تلاقي جهة ترضى تعالجك ولا تقدر توصل للمسؤولين... وعلشان تنول الرضا وتاخد تأشيرة علاج بألف او ألفين... ياعيني تكون استويت وبقيت من المجانين...!! العلاج علي نفقة الدولة حق دستوري لكل الجماهير... لكن سبحان الله بقى حق اساسي للصفوة والهوامير... مش مهم المواطن الغلبان المهم المسؤول الحزبي والسيد الوزير... صحة الباشا المسؤول او اي فنان عند الحكومة غالية علشان ده مسنود وبيصنفوهم علينا سفير... هو ده العدل ياناس؟؟ ناس تكسب الملايين وتتعالج ببلاش وناس تمرض وتموت زي الطراطير... هو ده العدل والمساواة وهو ده اللي بيقولوا عليه الضمير... ياترى فاضل للناس ايه ويارب ايه المصير...!! بعض النواب استباحوا لانفسهم التمتع بكعكة الغلابة العلاجية... واستغلوا احتياج الناس للعلاج في اغراض انتخابية... تحت غطاء دعائي وبريء بيقولوا عليه خدمات نيابية... وسابوا الناس للسماسرة والدلالين يتحكموا في مرضهم واحوالهم الصحية... وخلوا الحصول على موافقة المجلس الطبي حلم من الاحلام الوردية... وثلاثة منهم بس شفطوا نص الميزانية العلاجية... واكتشفوا اسماء ناس كتير مش موجودة وحالات كتير متوفية... مولد وصاحبه غايب وضمائر عديمة المسؤولية... وحكومة مش واخدة بالها او مطنشة بالقصد والنية... وصحوة مفاجئة لوزير الصحة وفين من زمان الاجهزة الرقابية... ومين يحاسب المجلس الطبي ومعاملته الجافة للمواطن بكل تعسف وسلبية... مواطن مش لاقي اللضى ونائب ياخد مئات التأشيرات في اقل من ثانية... ناس مش لاقية اللي يستر مرضها وناس تتعالج في اميركا واوروبا بمنح مجانية... وناس بتموت من المرض والقهر ووزير يتعالج بالملايين ده غير النقدية... مش كفاية المبيدات المسرطنة والمياه الملوثة والسحابة السوداء الموسمية... مش كفاية على الناس لحم الحمير والمحاصيل اللي بالمجاري مزروعة ومروية.. مش كفاية الاحتكار وطناش رجال الاعمال عن مساندة الوطن والمواطن بالمشاريع الخيرية... مش كفاية مش لاقين شيء محسوس ولو بسيط غير انتصاراتنا الكروية... مش كفاية علينا حالة الالهاء المقصود والمفروض علينا بالقصد والنية... بقى تاخدوا كل احلامنا وكمان تحرمونا من حقوقنا الصحية... بالذمة معقول تسيبوا مصيرنا وصحتنا مرهون بتأشيرة او واسطة مشبوهة نيابية... يعني لولا وجود نواب شرفاء ووزير معترض كان زماننا نايمين في العسل بنلهط المهلبية... ياناس ارحمونا وكفاية علينا هم البطالة والضريبة العقارية... بقى معقول توصل بينا الامور نتحرم حتى من ابسط الحقوق الانسانية والادمية...!! لكن السؤال ياترى ايه سر توقيت كشف فضيحة نواب الواوا الصحية... وايه اللي حيحصل في المرحلة اللي جاية... وللا علشان يلهونا عن سطوة اليهود على الحرم الابراهيمي واثارنا التاريخية... او علشان عودة البرادعي والانتخابات الرئيسية....!! والسؤال ببساطة للناس اللي غاويين يعذبونا... امتى تراعوا فينا ربنا وتبطلوا تبهدلونا... وليه مستكثرين علينا الدواء حتى العلاج الحكومي منه بتحرمونا... وليه سايبين علينا مسؤولين او نواب بيحاولوا دايما يقهرونا... يعني يحرقوا دمنا ويضيقوا علينا رزقنا وكمان مش عاوزين يعالجونا...!! الحل في الفوز بالعلاج المجاني وصفته لينا لهطة المهلبية بكلامها الهادف الصح... وبنسمعه كل يوم من غير ما ناخد بالنا واحنا في الليل والصبح... بوس الواوا... بوس الواوا... وقول للواوا دح... واللي ما يعرفش نائب او وساطة يا جماعة يمرض وما يقولش اح... حتى الدعم قولوا خلاص انسوه يعني ياعيني بح...!! الخلاصة روح نام واتغطى وانسى همومك الصحية... وحاول تطلب حقك في العلاج والعدل والحرية... وياريت تقاوم القهر والظلم والظواهر السلبية... وامنع صوتك عن اي نائب بيستغل مشاكلك الحياتية... واخيرا حافظ على صحتك وحياتك علشان ربنا يغنيك عن ولاد الذين والاونطجية... ولا نحتاج علاج في الداخل او الخارج وسيبه للبهوات يتمتعوا بيه مع بدل سفر على حبة ملوخية... وادعي معانا ربنا يرحمنا ويشفينا من نواب الواوا والتأشيرات الصحية... ويستر علينا دايما وحفظ لينا ام الدنيا بهية... الخلاصة صوتك أمانة اديه للي بيحافظ على كرامتك ويحميك وهي دي القضية.
..! Said_elmasryfahmy@hotmail.com