زغرودة حلوة رنت في بيتنا... لمت حارتنا وبنات حارتنا... زغرودة حلوة... لولولولولــــــــــــــــــــــــــــــوليّ... حلــــــــــــــــــــــــــــوة...!! هكذا بدأت وسائل الاعلام المختلفة يومها في اخبارها الافتتاحية... وأكده مصدر مسؤول كبير قوي خالص في احدى النشرات الرسمية... في تقليد حكومي جديد غير مسبوق من ايام الهكسوس حتى عصر الدولة العثمانية... وفي محاولة ظريفة ولطيفة لبث الابتهاج والسرور في الاوساط الشعبية... واثبات ان كل حاجة عندنا على عينك يا تاجر وواضحة وبمنتهى الشفافية... وان مفيش حاجة بتخبيها الحكومة علينا خالص وتعبيرا منها عن حسن النية... وده شيء اكيد ودليل واضح على الصراحة والمصداقية... وانه نظرا لحالة التقدم والاستقرار في حياتنا المعيشية... وازدهار احوال الناس وارتفاع مستوى حياتهم ونمو قدراتهم الاقتصادية... آن الاوان بقى تفرحوا وتنبسطوا ونفرجها كمان عليكم شوية... ونزف ليكم خبر زواج السيد رئيس حكومتنا متمنين لسيادته الفرحة والايام الهنية... وان يكون زواجا مباركا وفرصة للاستقرار والنظر بعين العطف لاحوال الرعية... واهي فرصة كمان نطلب منه يفرمل ابتكارات السيد البيه وزير المالية... ويخلي البيه وزير التضامن يبطل يعايرنا بالدعم والبطاقة التموينية... ويكلم الداخلية تخفف ايديها عننا في المخالفات المرورية... وكفاية علينا القطارات والعبارات وضرائب المبيعات وكمان العقارية... المهم ومن الآخر لازم نبارك لرئيس حكومتنا من القلب وبمنتهى حسن النية... ويارب يهنيه ويرزقه برزقنا ورزق الـ 80 مليون ضحية... اللي هم المعازيم والشهود واصحاب الفرح وفي الاول والآخر ولاد بهيه... ادعو معانا ربنا يتمم على سيادته بخير ويرزقه برزقها ويسيبه بقى من ايام العزوبية... مافيش احسن من الاستقرار علشان سيادته يرتاح ويفضى لمشاكلنا الازلية... المهم دلوقت نحاول نلم نفسنا ونروح في مظاهرة فرح شعبية... ونبعت الورد والياسمين لسيادته على نفس العنوان بالقرية الذكية... مع خالص الدعاء بالفرحة والسعادة وده دعاء من القلب والله العظيم وبمنتهى حسن النية...!! جواز رئيس حكومتنا اخرست كل حجج الشباب المستعجلين... ولما يوصلوا سن الـ 35 يصوتوا ويقولوا مش قادرين... ياعيني يتحججوا لاوظيفة ولاجوازة مش عارف على ايه متسرعين... هم ليه عايزين كل حاجة بسرعة وليه كده عاطفيين... الجواز محتاج امكانيات وحنكة اصحاب الخبرة العاقلين... لازم نتعلم من كبارنا ونكون لسيرة كفاحهم دارسين... قبل ما نتمنى حاجة لازم نعرف ايه حدودنا ونعرف احنا مين... وناخد قدوة من كبير حكومتنا وندعو له بالخير ونقول يارب آمين...!! السيد رئيس حكومتنا كان قدوة للشباب ومثال... واثبت ان مفيش شيء في الدنيا محال... وبرهن للشباب ان طول الصبر والعزيمة تحقق الآمال... ولازم شبابنا يتعظ من الدرس ويحقق المنال... وده اثبات اكيد ان تحقيق الاهداف مش بالكلام لكن بالافعال...!! شفافية كبير حكومتنا تستاهل من الجميع الاحترام والتحية... وخطوة غير مسبوقة وانجاز محسوب لحكومتنا الذكية... وبتوهب للشباب الامل وان الصبر جميل وطول البال بيحقق الامنية... وانه لا يأس مع الحياة وممكن الشباب يتهنى ويتجوز بس لو يصبر شوية... وياخدوا رئيس حكومتهم قدوة ونموذج للكفاح والعصامية... بس ياريت سيادته يكمل الحكاية الظريفة بمنتهى الشفافية... وبلاش يدور على واسطة نائب او وزير او شخصية حكومية... ويحاول يلاقي شقة 65 متر في مشروعات الشباب الاسكانية... بس ياريت يكون ثمنها بسيط علشان الغالي يرحمه من الضريبة العقارية... او يقدم في مشروع ابني بيتك ويلتزم بشروط البناء التعسفية... وياريت يقدر يوصل الغاز للبيت بدل من البهدلة في طوابير انابيب الغاز اليومية... وياريت البيت يكون جنب بيت الحكومة او جوة القرية الذكية... علشان سيادته مايتبهدلش في المواصلات او يركب قطار العياط وربنا يخليه لينا ويحفظه من الحوادث التصادمية... وياريت يسكن بعيد كمان عن الاراضي الزراعية... علشان ما يتعرضش سيادته لجاموسة تقف قدام القطار وتسبب كارثة بأفكارها الغبية... وبلاش يكون شهر العسل في العريش او اسوان علشان السيول الموسمية... ولو اصر سيادته عليهم فنرجو انه يبعد عن الاقامة في القرية الاوليمبية... اللي بنوها في عهد سيادته بممرات السيول بالهمبكة والعشوائية... ربنا يكفي سيادته شر الكوارث والسيول وكفاية نتحملها احنا بالرضى والصبر وحسن النية...!! مبروك ومليون مبروك من القلب لكبير حكومتنا الذكية... وربنا يرزقه بالخلف الصالح علشان يشعر بولادنا شوية... ويحاول يوفر لهم وظائف ويقدر ظروفهم المعيشية... وده شيء مش مستحيل من سيادته بروحه الحلوة الشبابية... الله يديم الافراح على شعب وحكومة بهية... من ايام فرحنا بفريقنا القومي واحتفظنا بالكأس الافريقية... ودلوقت بنفرح كمان بجواز كبير حكومتنا وبنقدم له التحية... لكن تفتكر بعد شهر العسل حتتغير الحكومة وتضيع الاحلام الوردية... وللا حيكون هناك شهر عسل بين حكومتنا والجماهير الشعبية... او حيحصل اللي بالي بالك ويتبدل الحال وتتحقق الأمنية...!
said_elmasryfahmy@hotmail.com