صراخ وزعيق وضرب عالقفا وتخبيط.. ومواطن واخده عسكري متربط تربيط.. قاعد يبرطم بالكلام يا عيني بيلخبط لخابيط.. مش بيركز في كلامه بيهلفط تفتكره مجنون وللاّ عبيط.. قاعد يخرّف في الكلام وكأنه محتاج تظبيط..!! وقف قدام المحقق يلملم كلامه ويفتكر اللي كان.. وازاي العسكري عكشه ماسك فأس بيحفر الارض وناسي الوقت والزمان.. أتاري القرية الذكية كانت هي المكان.. الراجل مسكين كانت حالته جنان في جنان.. أتاريه يا عيني كان بيدوّر على خاتم سليمان.. نفسه يحقق الامل بأيديه ويحقق لأولاده الامان.. لكن ايه السبب وايه اللي حصل وكان..!! المحقق طلب من المواطن الجلوس بعد ما طلب منه الهدوء وحيّاه بالسلام.. وأعطاه الامان وطلب منه الكلام..!! الحكاية يا سيدي اني مواطن من البلد ديّة.. معايا رقم قومي وشهادة تفيد بأداء الخدمة العسكرية.. ومتربي على طيّب ونعم وحاضر والحكومة بتعتبرني فاقد الاهلية.. ورأيي في المواضيع اللي بتهمني زي عدمه ولا له لازمة عند حكومتنا الذكية.. وحاطط لساني في حلقي وأقول خليني في مشاكلي الشخصية.. أصل الولاد كبروا ومحتاجين رعاية ونفسهم يجربوا الحياة الزوجية.. دبت الأبوّة في نافوخي وقلت لازم احاول احل المشكلة ديّة.. ورحت ولملمت شقى عمري وفلوس غربتي وتابعت الاعلانات العقارية.. لقيت الاسعار حاجة رهيبة واللي شقيت بيه ما يكملش ثمن حيطة او عامود في منطقة عشوائية.. سألت اهل الخبرة قالوا مفيش غير انك تروح على وزارة الاسكان وتحجز لك شوية رمل في المناطق الصحراوية.. وتدفع اللي معاك والباقي ربنا يسهلها بالتقسيط على دفعات سنوية.. فرحت وقلت لنفسي والله فرصة ورحت علشان ألاقي مكان في طوابير الحجز بالمنافذ البنكية.. لقيت طابور طويل عريض ييجي من هنا للقرية الذكية.. وكنت فاكر ان حكومتنا فيها البركة وحتوزع علينا الاراضي من غير محسوبية.. لكن حسيت بالقلق لما سمعت عن وجود السماسرة والقمسيونجية.. ولقيت واحد بيقوللي تدفع كام وترسى عليك اي حته ارض من غير قرعة عشوائية.. قلت اكيد نصاب وجاهل بعدالة المسؤولين في الوزارة الاسكانية.. وبعد 5 ساعات وصلت للشباك ودفعت دفعة التقديم ألوف بالجنيهات المصرية.. وروّحت وأنا فرحان باحلم إزاي حاتصرف في الاقساط والبناء وإيه اللي وقعني في الورطة ديّه.. لكن قلت إنشا الله أبيع هدومي وأريّح ولادي في ايامهم اللي جاية.. ورحت اعد الايام وأستنى نتيجة القرعة وأنا واثق ميه في الميه.. قعدت أدوّر مالقيتش اسمي قلت يجوز غلطة مطبعية.. إزاي يكون اسمي مش موجود رغم ان الكبير امر ان كل واحد من الحاجزين حيكون له نصيب بالعدل والشرعية.. ولقيت اخطار من بنك الاسكان والتعمير تعالى خد فلوسك وروح دوّر في حتة تانية.. في لحظة ضاع حلم ولادي وماتت احلامنا الوردية.. قعدت واستنيت رحمة ربنا يمكن تكون هناك قرعة جايّة.. وبعد سنة وكام شهر اعلنوا عن اراضي جديدة بشروط بناء تعجيزية.. بعت دهب مراتي على حبة الفلوس اللي معايا ورحت احجز يمكن الحلم يتحقق في القرعة ديّة.. نفس الطابور والزحمة والسمسار إياه بالكربون مطبوعة بالفوضى والهمجية.. وانتظرت النتيجة لقيتها يا عيني نفس النتيجة زي ما هيّ.. قلت يمكن حظي دكر والظاهر مفيش لي نصيب في ارض بلدي الصحراوية.. لقيت واحد بيوشوش في وداني ويقول ليه بتضيّع وقتك وتقف في طوابير مع العامة والناس البيئة الشعبية.. روح ودوّر على خاتم سليمان وهو يحقق لك الحل والامنية.. روح وشوف الصحف وتابع اخبار النت واعرف مين اللي في إيده كل الحلول السحرية.. دوّرت وعرفت ان هناك مسؤول بالاسم ده وزع الاراضي بالفدادين بالواسطة والمحسوبية.. وخصص لأولاده وأقاربه آلاف الامتار من غير عدل او شفافية.. وحرمني أنا وأولادي وغيرنا كتير من شوية أمتار نبني بيت يلملمنا في أيامنا اللي جاية.. كل ده حصل عيني عينك تحت سمع وبصر حكومتنا الذكية.. ولما الريحة فاحت شالوه من منصبه مع احتفاظه بصفته النيابية.. وبعدين راحوا وعينوه في منصب بترولي بمرتب خيالي بالدولارات الاميركية.. بالذمة يا سعادة البيه مش ده يبقى مسلسل فكاهي من الاساطير الكوميدية.. العسكري بتاعك يا بيه افتكرني مجنون علشان بادوّر على خاتم سليمان في القرية الذكية.. مش البيه سليمان هو اللي وزع الاراضي عالحيتان والمهلباتية.. مش ده كان واحد من المسؤولين في حكومتنا البهية.. مش لو كنت لقيت الخاتم بتاعه يمكن يطلع لي واحد من الجان ويحقق الامنية.. انا عاوز اعرف انا ايه اللي غلطت فيه وايه هي القضية.. بالذمة لو انت مكاني تعمل ايه في المشكلة ديّه..!! السيد المحقق كان رجل محترم ووقور وعطوف.. امر بحفظ التحقيق تقديرا منه للظروف.. وطالب في تقريره بتحقيق العدل بين المواطنين بدلا من التعتيم والرقص عالدفوف.. وطالب بالقصاص من اللي فرّط في حق الشعب وقال حق المواطنين مش لازم يضيع او يطوف.. المواطن صاحب حق في خير بلاده مش بني آدم بدرجة خروف..!! هي دي واحدة من حكاوي واحد من شعب بهية.. نفسه يتمتع بالعدل والمساواة وينول حقوقه الشرعية.. وأمله في الكبير والقضاء يرجع له حقه من النماذج الفجة ديّة.. زي ما أنصف الناس من قانون الجباية العقارية.. وربنا يكفيك ويكفينا شر اختيارات حكومتنا الذكية.. تفتكر حيكون سليمان آخر حاجة وللا يا ترى حيكون فيه نسخة تانية.. يا ريت كل مسؤول علينا يعرف ان فيه رب عظيم حيسأل من اللي فرّط في حق الشعب والرعيّة.. بس يا ترى خاتم سليمان حيكون آخر حاجة وللا لسة حيطلع لينا مصباح علاء الدين او علي بابا وتبقى حياتنا كوسة على فتة بالمحسوبية..!!
Said_elmasry fahmy@hotmail.com