سارق الفرح..!! شفت المصريين..؟؟ شفت وسمعت فرحة الناس الطيبين..؟؟ شفت وسمعت وفرحت معانا بمنتخب الساجدين..؟؟ شفت وقت الشدة والجد بنكون قد إيه جامدين..شفت إنه صعب نسيب تارنا عند أي حد مهما كان مين..شفت الشوارع كانت إزاي مليانة ناس بتغني وترقص وبمنتخب بلدها مبسوطين..شفت معانا عالفضائيات أبطالنا إزاي كانوا في الملعب زي الوحوش جبارين..شفت عزيمتهم وأدائهم إزاي أبهر الملايين..شفت التكتيك والتكنيك وحنكة الجهاز الفني الأمين.. شفت الإرادة والسيادة والإصرار من الجميع لاعبين وفنيين..شفت الناس إزاي كانوا كلهم في الميادين متجمعين..بذمتك قدرت تعرف الفرق بين مسلمين ومسيحيين..بالذمة حد كان قادر يميًز بين بطرس أو أحمد أو جميان أو أمين..عرفت بقي اللي عاوز يولعها في نجح حمادي بيننا مين..!! بذمتك عرفت تعرف الفرق بين البهوات والغلابة المطحونين.. شفت قد إيه كلنا كنًا للفرحة محتاجين..سبحان الله ياأخي وكأنهم عطشانين فرحة ولتحقيق النصرملهوفين..هم دول المصريين..لوحاولوا بس يصمموا علي أي حاجة بتلاقيهم جبارين..يد واحدة وشعب واحد وطريقهم عارفينه رايح فين..لكن نحمد ربنا ونشكره إنه خلًي الناس دي تخرج في الشوارع فرحانين ..شوف وتخيًل كل الجموع دي خرجت تنفس عن فرحتها وهم مبسوطين..تخيًل كمان المشهد لو الناس دي خرجت تعبًرعن غضبها مقهورين..لازم نكمل للناس فرحتهم ونسهل عليهم حياتهم ويكونوا مرتاحين..ربنا يكفينا شر غضب المظلومين والمقهورين قول معانا آميييين..!! النصر الكروي كان للناس فرحة وبهجة بعد لحظات حسرة وانكسار.. وشعور منهم إن الشئ الوحيد اللي يواسيهم ويشغلهم أنسرق منهم خلاص وانهار..لكن سبحان الله العظيم اللي حاسس بينا وخلًي ظلام أيامنا نهار..ووهب لأولادنا العزيمة والإرادة وبعزيمتهم ردوا لينا الاعتبار..وكانوا صورة جميلة في الأداء وتنفيذ الخطط يعني بالمختصر المفيد فازوا بالبطولة باقتدار..واثبتوا للجميع أنهم وحوش أفريقيا والعالم كله كان في حالة انبهار..وهو ده المنتظر من منتخب الساجدين وأداءه الراقي الجبار..منتخب فاق كل التوقعات وخلي الكل محتار..فعلا أحفاد الفراعنة وسلالة محفوظ وزويل والفنان الجميل مختار..........................!!
لكن اللافت للنظر الإستقبال والتكريم من الريس في لفتة كريمة أبوية..كانت ملامحه كلها راحة وافتخار بأولاده أبطال الكأس الأفريقية..وشفنا الجميع ملموم حواليه فرحان بالتكريم والتقدير في مشهد رائع وحصري لأمة بهية..شئ حضاري وراقي من الكبير تكريم كل من أجاد وكان نموذج للإلتزام والمسئولية..لكن ياريت وطبقا لمبدأ الثواب والعقاب والقوانين الإنسانية..ياريت زي مابنكافئ اللي فرحنًا نحاسب اللي وجع قلبنا وعذبنا بوظيفته الرسمية..زي اللي وزع أرض بلادنا بالواسطة والكوسة والمحسوبية..أو اللي قهرنا بالجباية والضرائب وبالذات العقارية..أو اللي اتسبب في زيادة الأسعار علي الناس بالأساليب الإحتكارية..وكمان أصحاب الأراء الهدامة اللي بتجادل في قرارتنا السيادية..أوالجرائد الصفراء وأصحاب الأراء اللي بتشكك في كل حاجة بالشعارات الوهمية..ياريت نحافظ علي نشوة الإنتصار وتزيد مساحة الحرية..يارب تديم علينا الفرحة ونخلص بقي من أصحاب الفهلوة والأونطجية..زي اللي راحوا وحاولوا سلب فرحتنا وانتصارتنا الكروية ..وأعلنوا عن وفد للحزب الوطني لمساندة المنتخب في مظاهرة إعلامية..وزجوا باسم المواطنين جمال وعلاء وصبغوهم بصيغة حزبية..رغم إننا شفناهم قد إيه كانوا ممزوجين بالناس بأحاسيس بسيطة حقيقية..ونسينا أنهم ولاد الريس أو حد فيهم مسئول الأمانة السياسية..ولقينا صوتهم راح من الغناء والفرحة الكبيرة العفوية..سارق الفرح موجود بيننا عاوز يلهط التورتة والمهلبية..تلاقيه علي كل الموائد مستني أي مناسبة علشان يظهر في الصورة بالقصد والنية..!! وبلاش ننسي كمان أصحاب الفتاوي الكروية..اللي بيلهطوا الملايين في البرامج الرياضية..واللي كل واحد عنده برنامج ملاكي علي القنوات الفضائية..وعامل نفسه وحده صاحب الفكر الفني والمفهومية..واللي راحوا وهاجموا شحاتة بسبب إختياراته للاعبين واتهموه بالعشوائية..ولما استبعد بعض اللاعبين شرشحوه واتهموه بالمزاجية..ولما انتصر بإرادته وعزيمة ولاده راحوا وغيروا كلامهم وادعوا علينا المفهومية..وأسرفوا في المدح والإطراء بكتيبة شحاتة بمنتهي البجاحة والهمجية..ونفس الوجوه والأفواه راحت تتطبل وتزمر بعد البطولة التاريخية.. إمتي بقي نرتاح من كل النماذج الفجة دي حزبية وإعلامية..!!
حتي أعضاء الإتحاد اللي إتخانقوا علي المناصب واللجان الرياضية..واللي فضحوا بعضهم في الفضائيات والمجلات الكروية..فجأة لقيناهم بيقاسموا كتيبة شحاتة في الأوسمة الرياضية..وفبلها سافروا علشان يظهروا في الصورة مع الكأس ونشوفهم بالألوان الطبيعية..والغريب بقينا نسمع عن خطط مسبوقة وتجهيزات فنية..بالذمة مش ده نموذج لسارق الفرح وكدابين الزفة والأونطجية..!! مبروك علينا كلنا انتصارتنا الكروية..مبروك لشحاتة وكتيبته وإرادتهم القتالية..وياريت تكون الإنتصارات هي عنوان حياتنا اللي جاية..الناس محتاجة تفرح ومفيش فرحة أحلي من الشعور بالعدل والسواسية..شعب المحروسة شعب قدير يستاهل الفرحة والحرية..شعب محتاج اللي يطبطب علية بالعدل والرحمة والإنسانية..حرام كل أمانينا تتلخص في بطولة أو لعبة كروية..حرام نسيب الشعب ده لمسئول فاسد أو محتكر جبار أو لرؤية ضيقة حزبية..ربنا يكفيك ويكفينا شر سارق الفرح وبطانة السوء في كل مجالاتنا الحياتية..إحنا شعب المؤمنين القاهرين لكل الأطماع الخارجية..يارب أنصرنا علي سارق الفرح في كل مكان وثعابين جبهتنا الداخلية..يارب أنصر مصر وخلي للنصر عنوان أسمة المحروسة أم الدنيا بهية..!!
Said_elmasry fahmy@hotmail.com